ಸಾರ್ವಜನಿಕರ ಎದುರಲ್ಲಿ ಈಜಿಪ್ಟ್‌ನ 2,500 ವರ್ಷಗಳಷ್ಟು ಹಳೆಯ ಮಮ್ಮಿ ಶವಪೆಟ್ಟಿಗೆ ತೆರೆದಾಗ..!

ಕೈರೋ: ಮಮ್ಮಿ(ರಕ್ಷಿತ ಶವ)ಗಳ ತಾಣ ಈಜಿಪ್ಟನ್‌ಲ್ಲಿ ಪ್ರಾಚೀನ ಶವ ಪೆಟ್ಟಿಗೆಗಳು ಸಿಗುವುದು ಹೊಸ ಸಂಗತಿಯೇನಲ್ಲ. ಆದರೆ ಈ ಬಾರಿ ಪುರಾತತ್ವಶಾಸ್ತ್ರಜ್ಞರು ಸಾರ್ವಜನಿಕರ ಎದುರಲ್ಲಿ ಮಮ್ಮಿಯ ಶವಪೆಟ್ಟಿಗೆಯೊಂದನ್ನು ತೆರೆದಿದ್ದಾರೆ.

ಇಲ್ಲಿನ ಸಕ್ಕಾರಾದಲ್ಲಿ ದೊರೆತ 2,500 ವರ್ಷಗಳಷ್ಟು ಹಳೆಯದಾದ ಪ್ರಾಚೀನ ಮಮ್ಮಿ ಶವಪೆಟ್ಟೆಗೆಯೊಂದನ್ನು ಸಾರ್ವಜನಿಕರ ಎದುರಲ್ಲೇ ಪುರಾತತ್ವಶಾಸ್ತ್ರಜ್ಞರು ಹೊರತೆಗೆದಿದ್ದಾರೆ.

ಸಕ್ಕಾರದಲ್ಲಿ ಕಳೆದ ವರ್ಷ ಒಟ್ಟು 59 ಪ್ರಾಚೀನ ಶವಪೆಟ್ಟಿಗೆಗಳು ದೊರೆತಿದ್ದು, ಈ ಪೈಕಿ ಮೊದಲನೆಯ ಶವಪೆಟ್ಟಿಗೆಯನ್ನು ತೆರೆಯಲಾಗಿದೆ. ಈ ಪೆಟ್ಟಿಗೆಯಲ್ಲಿ ಅತ್ಯಂತ ಸುರಕ್ಷಿತ ಸ್ಥಿತಿಯಲ್ಲಿರುವ ಪ್ರಾಚೀನ ಮೃತದೇಹ ದೊರೆತಿದೆ.

200 ವರ್ಷಗಳಿಂದ ಧ್ಯಾನದಲ್ಲಿರುವ ಸಂನ್ಯಾಸಿ!

ಈ ಕುರಿತು ಈಜಿಪ್ಟ್‌ನ ಪ್ರವಾಸೋದ್ಯಮ ಮತ್ತು ಪುರಾತತ್ವ ಇಲಾಖೆ ವಿಡಿಯೋ ಬಿಡುಗಡೆ ಮಾಡಿದ್ದು, 2,500 ವರ್ಷಗಳ ಹಿಂದಿನ ಮಮ್ಮಿಯ ವಿಡಿಯೋ ಇದೀಗ ಭಾರೀ ವೈರಲ್ ಆಗಿದೆ .

ಸಕ್ಕಾರಾ ಈಜಿಪ್ಟ್‌ನ ವಿಶಾಲವಾದ, ಪ್ರಾಚೀನ ಸ್ಮಶಾನವಾಗಿದ್ದು, ಇದು ಪ್ರಾಚೀನ ನಗರವಾದ ಮೆಂಫಿಸ್‌ನ ನೆಕ್ರೋಪೊಲಿಸ್ ಆಗಿ ಕಾರ್ಯನಿರ್ವಹಿಸಿತ್ತು. ಇ ಪ್ರದೇಶದಲ್ಲಿ ಸಾಕಷ್ಟು ಸಂಖ್ಯೆಯಲ್ಲಿ ಮಮ್ಮಿಗಳ ಶವಪೆಟ್ಟಿಗೆ ದೊರೆತಿವೆ.

ಸದ್ಯ ದೊರೆತಿರುವ ಮರದ ಶವಪೆಟ್ಟಿಗೆಯಲ್ಲಿರುವ ಮಮ್ಮಿ ಪ್ರಾಚೀನ ಈಜಿಪ್ಟ್‌ನ ಪುರೋಹಿತ ಅಥವಾ ಪ್ರತಿಷ್ಠಿತ ಸಮುದಾಯಕ್ಕೆ ಸೇರಿದ ವ್ಯಕ್ತಿಯದ್ದಾಗಿರಬಹುದು ಎಂದು ಅಂದಾಜಿಸಲಾಗಿದೆ.

ಇನ್ನು ಈ ಮಮ್ಮಿ ಶವಪೆಟ್ಟಿಗೆಯನ್ನು ಈಜಿಪ್ಟ್‌ನ ಗಿಜಾದ ಬೃಹತ್ ವಸ್ತು ಸಂಗ್ರಹಾಲಯಕ್ಕೆ ರವಾನಿಸಲಾಗುವುದು ಎಂದು ಪ್ರವಸೋದ್ಯಮ ಇಲಾಖೆ ಸ್ಪಷ್ಟಪಡಿಸಿದೆ.


ಅಂದಹಾಗೆ ಈ ಮಮ್ಮಿ ಶವಪೆಟ್ಟಿಗೆ ಹೊರ ತೆಗೆಯುವ ಸಂದರ್ಭದಲ್ಲಿ, ಈಜಿಪ್ಟ್‌ಗೆ ನ್ಯೂಜಿಲ್ಯಾಂಡ್ ರಾಯಭಾರಿಯಾಗಿರುವ ಗ್ರೇಗ್ ಲೆವಿಸ್ ಕೂಡ ಭಾಗವಹಿಸಿದ್ದು ವಿಶೇಷವಾಗಿತ್ತು.

ಈ ಕುರಿತು ಟ್ವೀಟ್ ಮಾಡಿರುವ ಗ್ರೇಗ್ ಲೆವಿಸ್, ಇಂತಹ ಅಪರೂಪದ ಕಾರ್ಯಕ್ರಮದಲ್ಲಿ ಭಾಗಿಯಾಗಿರುವುದು ಗೌರವದ ಸಂಗತಿ ಎಂದು ಸಂತಸ ಹಂಚಿಕೊಂಡಿದ್ದಾರೆ.