2050ರೊಳಗೆ 100 ಕೋಟಿ ಮರಗಳನ್ನು ಬೆಳೆಸುತ್ತೇವೆ, ಆಸ್ಟ್ರೇಲಿಯಾ

ಬರ್ಲಿನ್‌: ಜಾಗತಿಕವಾಗಿ ಹೆಚ್ಚುತ್ತಿರುವ ವಾಯು ಮಾಲಿನ್ಯ ಮತ್ತು ಮರಗಳ ಸಂಖ್ಯೆ ಕಡಿಮೆಯಾಗುತ್ತಿರುವ ಹಿನ್ನೆಲೆ ವಿಶ್ವಾದ್ಯಂತ ಪರಿಣಾಮಕಾರಿ ನಿರ್ಧಾರಗಳನ್ನು ಕೈಗೊಳ್ಳುವ ನಿಟ್ಟಿನಲ್ಲಿ ಪ್ರಮುಖ ರಾಷ್ಟ್ರಗಳು ಹೆಜ್ಜೆ ಇರಿಸಿವೆ.

ಇತ್ತೀಚೆಗೆ ಅಮೆರಿಕದ ಬಾಹ್ಯಾಕಾಶ ಸಂಶೋಧನಾ ಸಂಸ್ಥೆ ನಾಸಾ ಕಳೆದ 20 ವರ್ಷಗಳಿಂದ ಭೂಮಿಯನ್ನು ಹಸಿರಾಗಿಸಲು ಭಾರತ ಮತ್ತು ಚೀನಾ ಅತ್ಯಂತ ಹೆಚ್ಚು ಶ್ರಮ ವಹಿಸಿವೆ ಎಂದಿತ್ತು. ಉಪಗ್ರಹದ ಡಾಟಾವನ್ನು ಆಧರಿಸಿ ಸಂಶೋಧಕರು ವಿಶ್ವದ ಹಸಿರಿನ ಹೆಚ್ಚಳದ ಬಗ್ಗೆ ಸಮೀಕ್ಷೆ ನಡೆಸಿ, ಭೂಮಿಯನ್ನು ಹಸಿರಾಗಿಸುವ ನಿಟ್ಟಿನಲ್ಲಿ ಭಾರತ ಮತ್ತು ಚೀನಾದ ಕೊಡುಗೆಯನ್ನು ವಿವರಿಸಿದ್ದರು.

ಇದೀಗ ದ್ವೀಪರಾಷ್ಟ್ರ ಆಸ್ಟ್ರೇಲಿಯಾ ತನ್ನ ನೆಲವನ್ನು ಹಸಿರುಮಯವಾಗಿಸಲು ದಿಟ್ಟ ನಿರ್ಧಾರ ಕೈಗೊಂಡಿದೆ. ಮುಂದಿನ 2050ರೊಳಗೆ ರಾಷ್ಟ್ರದಲ್ಲಿ ಬರೋಬ್ಬರಿ 100 ಕೋಟಿ ಮರಗಳನ್ನು ಬೆಳೆಸುವುದಾಗಿ ಶಪಥ ಮಾಡಿದೆ. ಈ ಮೂಲಕ ಪ್ರತಿ ವರ್ಷ 1.8 ಕೋಟಿ ಟನ್‌ ಇಂಗಾಲದ ಡೈಆಕ್ಸೈಡ್‌ ನಿಯಂತ್ರಿಸುವುದರ ಗುರಿಯನ್ನು ಇಟ್ಟುಕೊಂಡಿದೆ.

30 ವರ್ಷಗಳಲ್ಲಿ 100 ಕೋಟಿ ಮರಗಳನ್ನು ಬೆಳೆಸುವ ಗುರಿ ಹೊಂದಿರುವ ಆಸ್ಟ್ರೇಲಿಯಾ ಈ ನಿಟ್ಟಿನಲ್ಲಿ ಅಭಿಯಾನ ಆರಂಭಿಸುತ್ತಿದೆ. 'ನ್ಯೂ ಪ್ಯಾರಿಸ್‌ ಅಗ್ರಿಮೆಂಟ್‌' ನೀಡಿರುವ ಇಂಗಾಲದ ಡೈಆಕ್ಸೈಡ್‌ ನಿಯಂತ್ರಣದ ಗುರಿಯನ್ನು ಹಿಮ್ಮೆಟ್ಟಿಸಲು ಆಸ್ಟ್ರೇಲಿಯಾ ದಿಟ್ಟ ಹೆಜ್ಜೆ ಇಟ್ಟಿದೆ. ಪ್ರತಿ ವರ್ಷ ಬರೋಬ್ಬರಿ 1.8 ಕೋಟಿ ಟನ್‌ ಹಸಿರುಮನೆ ಅನಿಲವನ್ನು ನಿಯಂತ್ರಿಸುವ ಹೆಬ್ಬಯಕೆಯನ್ನು ಇರಿಸಿಕೊಂಡಿದೆ.

ಪ್ರಸ್ತುತ ಆಸ್ಟ್ರೇಲಿಯಾದಲ್ಲಿ ಪ್ರತಿ ವರ್ಷ ಸುಮಾರು 50 ಕೋಟಿ ಟನ್‌ ಇಂಗಾಲದ ಡೈಆಕ್ಸೈಡ್‌ ಉತ್ಪತಿಯಾಗುತ್ತಿದೆ.

ಇಟಿಎಚ್‌ ಜುರಿಚ್‌ನ ಹೊಸ ಸಂಶೋಧನೆಯನ್ನು ಆಧರಿಸಿ ನೂತನ ಯೋಜನೆ ಹಮ್ಮಿಕೊಳ್ಳಲಾಗಿದೆ. ಜಾಗತಿಕ ಹಸಿರುಮನೆ ಅನಿಲ ಬಿಡುಗಡೆಯನ್ನು ತಡೆಯಲು ರಾಷ್ಟ್ರಕ್ಕೆ 120 ಕೋಟಿ ಮರಗಳ ಅಗತ್ಯವಿದೆ. ಹವಮಾನ ಬದಲಾವಣೆ ವಿರುದ್ಧ ಹೋರಾಡುವುದು ನಮ್ಮ ಪ್ರಮುಖ ಗುರಿಯಾಗಿದೆ ಎಂದು ಸಂಶೋಧಕ ಸ್ಕಾಟ್‌ ಮೋರಿಸನ್‌ ತಿಳಿಸಿದ್ದಾರೆ.


ಭೂಮಿಯನ್ನು ಮತ್ತೆ ಹಸಿರಾಗಿಸಲು ಭಾರತ ಮತ್ತು ಚೀನಾದ ಕೊಡುಗೆಯೇ ಹೆಚ್ಚು: ನಾಸಾ