ಅಮೆರಿಕದಲ್ಲಿ ಸೆಲ್ಫಿ ಕ್ಲಿಕ್ಕಿಸುವಾಗ 800 ಅಡಿ ಕಂದಕಕ್ಕೆ ಬಿದ್ದಿದ್ದ ಭಾರತೀಯ ಜೋಡಿ ಕುಡಿದಿದ್ದರಂತೆ!

ನ್ಯೂಯಾರ್ಕ್‌: ಕ್ಯಾಲಿಫೋರ್ನಿಯಾದ ಅತ್ಯಂತ ಪ್ರಸಿದ್ಧ ಪ್ರವಾಸಿ ತಾಣ ಯೊಸೆಮೈಟ್‌ ನ್ಯಾಷನಲ್‌ ಪಾರ್ಕ್‌ನ 800 ಅಡಿ ಕಂದಕದ ಸಮೀಪ ಸೆಲ್ಫಿ ಕ್ಲಿಕ್ಕಿಸಿಕೊಳ್ಳುವ ವೇಳೆ ಬಿದ್ದು ಸಾವನ್ನಪ್ಪಿದ ಭಾರತೀಯ ಜೋಡಿ ಪಾನಮತ್ತರಾಗಿದ್ದರು ಎಂಬುದು ಶವಪರೀಕ್ಷೆಯಲ್ಲಿ ತಿಳಿದು ಬಂದಿದೆ.

ಕೇರಳ ಮೂಲದ ಇಂಜಿನಿಯರ್‌ಗಳಾದ 29 ವರ್ಷ ವಿಷ್ಣು ವಿಶ್ವನಾಥ್‌ ಮತ್ತು 30 ವರ್ಷದ ಮೀನಾಕ್ಷಿ ಮೂರ್ತಿ ಕಳೆದ ವರ್ಷ ಅಕ್ಟೋಬರ್‌ 25ರಂದು 800 ಅಡಿ ಆಳದ ಕಂದಕಕ್ಕೆ ಬಿದ್ದು ಸಾವನ್ನಪ್ಪಿದ್ದರು. ಈ ವೇಳೆ ಈಥೈಲ್‌ ಆಲ್ಕೋಹಾಲ್‌ ಸೇವಿಸಿದ್ದರು ಎಂಬುದು ತಿಳಿದು ಬಂದಿದೆ. ಆದರೆ ದೇಹದಲ್ಲಿ ಡ್ರಗ್ಸ್‌ ಅಂಶ ಪತ್ತೆಯಾಗಿಲ್ಲ ಎಂಬುದು ಶವಪರೀಕ್ಷೆಯಲ್ಲಿ ತಿಳಿದುಬಂದಿರುವುದಾಗಿ ಅಮೆರಿಕ ಮಾಧ್ಯಮಗಳು ವರದಿ ಮಾಡಿವೆ.

ಬಿಯರ್‌, ವೈನ್‌ ಮತ್ತು ಲಿಕ್ಕರ್‌ನಲ್ಲಿ ಈಥೈಲ್‌ ಆಲ್ಕೋಹಾಲ್‌ ಇರುತ್ತದೆ. ಕಂದಕಕ್ಕೆ ಬೀಳುವ ಸಂದರ್ಭ ಎಷ್ಟು ಆಲ್ಕೋಹಾಲ್‌ ಸೇವಿಸಿದ್ದರು ಎಂಬುದನ್ನು ಪತ್ತೆ ಮಾಡಲು ಸಾಧ್ಯವಾಗಿಲ್ಲ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

2014ರಲ್ಲಿ ಮೂರ್ತಿ ಮತ್ತು ವಿಶ್ವನಾಥ್‌ ವಿವಾಹವಾಗಿದ್ದರು. ವಿಶ್ವ ಸುತ್ತುವ ಗುರಿ ಹೊಂದಿದ್ದ ಜೋಡಿ ಗ್ರಾಂಡ್‌ ಕೆನಿಯನ್‌, ಪ್ಯಾರಿಸ್‌, ನ್ಯೂಯಾರ್ಕ್‌, ನಯಾಗರ ಫಾಲ್ಸ್‌, ಲಂಡನ್‌ ಮತ್ತಿತರ ಜಗತ್‌ಪ್ರಸಿದ್ಧ ಪ್ರವಾಸಿ ತಾಣಗಳಿಗೆ ಭೇಟಿ ನೀಡಿದ್ದರು.