ನಡೆಯಲು ಕಷ್ಟ ಪಡುತ್ತಿದ್ದ ಜಿರಾಫೆ ಮರಿಗೆ ವಿಶೇಷ ಶೂ

ಸಿಯಾಟಲ್: ಇನ್ನು ಹೆಸರಿಡದ ಆ ಜಿರಾಫೆ ಮರಿ ನಡೆಯಲು ಕಷ್ಟ ಪಡುತ್ತಿತ್ತು. ಮತ್ತೀಗ ಅದಕ್ಕೆ ವಿಶೇಷವಾಗಿ ತಯಾರಿಸಲಾದ ಶೂ ತೊಡಿಸಲಾಗಿದ್ದು ಕಾಲಿನ ಸಮಸ್ಯೆ ಸರಿ ಹೋಗುವ ವಿಶ್ವಾಸ ವೈದ್ಯರದ್ದು.

ಸಿಯಾಟಲ್‌ನ ವುಡ್‌ಲ್ಯಾಂಡ್ ಪಾರ್ಕ್ ಮೃಗಾಲಯದಲ್ಲಿ ಮೇ 2 ರಂದು ಹುಟ್ಟಿದ್ದ ಈ ಮುದ್ದು ಮರಿಗೆ ಹಿಂದಿನೆರಡು ಕಾಲುಗಳಲ್ಲಿ ಸಮಸ್ಯೆ ಇತ್ತು. ಅದು ಹೈಪರ್‌ಎಕ್ಸಟೆಂಡೆಂಡ್ ಫೆಟ್‌ಲಾಕ್ಸ್ ಸಮಸ್ಯೆಯಿಂದ ಬಳಲುತ್ತಿದೆ ಎಂದು ಪಶುವೈದ್ಯರು ಗುರುತಿಸಿದ್ದರು. ಅದರ ಅಂಗ ಊನತೆಗೆ ಪರಿಹಾರ ನೀಡಲು ವಿಶೇಷ ಶೂ ವಿನ್ಯಾಸ ಮಾಡಿ ತೊಡಿಸಲಾಗಿದೆ.

ಕಸ್ಟಮ್ ಫಿಟ್ಟೆಡ್ ಶೂ ವಿಶಿಷ್ಟ ಬೂಟುಗಳನ್ನು ಧರಿಸಿರುವ ಪುಟ್ಟ ಮರಿ ಅದರ ಸಹಾಯದಿಂದ ನಡೆಯಲು ಕಲಿಯುತ್ತಿದೆ.

ಮರಿಯ ಕಾಲು ಸರಿ ಹೋಗಲು ಹಲವಾರು ತಿಂಗಳ ಚಿಕಿತ್ಸೆ ನೀಡಬೇಕಾಗುತ್ತದೆ ಎಂದು ಮೃಗಾಲಯದ ಸಿಬ್ಬಂದಿ ಹೇಳುತ್ತಿದ್ದಾರೆ.

ತಾತ್ಕಾಲಿಕವಾಗಿ ತಾಯಿ ಮಗುವನ್ನು ಪ್ರವಾಸಿಗಳ ವೀಕ್ಷಣೆಯಿಂದ ದೂರವಿರಿಸಲಾಗಿದೆ.