ಕಳೆದ ವರ್ಷ ಒಬಾಮ ಕಟ್ಟಿದ ತೆರಿಗೆ 54.30 ಲಕ್ಷ ರೂ.

ವಾಷಿಂಗ್ಟನ್‌: ಅಮೆರಿಕ ಅಧ್ಯಕ್ಷ ಬರಾಕ್‌ ಒಬಾಮಾ ಮತ್ತು ಅವರ ಪತ್ನಿ ಮಿಶೆಲ್‌ ಒಬಾಮಾ ಅವರು ಕಳೆದ ವರ್ಷ (2015) ಗಳಿಸಿದ ಒಟ್ಟು ಆದಾಯಕ್ಕೆ ಪಾವತಿಸಿದ ತೆರಿಗೆ ಮೊತ್ತ ಎಷ್ಟು ಗೊತ್ತೆ? ಅದು 54.30 ಲಕ್ಷ ರೂಪಾಯಿ. ಅವರು 2015ರಲ್ಲಿ ಗಳಿಸಿದ ಒಟ್ಟು 3.18 ಕೋಟಿ ರೂಪಾಯಿ ಆದಾಯಕ್ಕೆ 19.6% ಪರಿಣಾಮಕಾರಿ ದರದಲ್ಲಿ ತೆರಿಗೆ ಪಾವತಿಸಿದ್ದಾರೆ.

ಅಧ್ಯಕ್ಷ ಬರಾಕ್‌ ಒಬಾಮಾ ಅವರು ಕಳೆದ ವರ್ಷ ಸಲ್ಲಿಸಿರುವ ಆದಾಯ ತೆರಿಗೆ ವಿವರವನ್ನು ಶ್ವೇತ ಭವನ ಶುಕ್ರವಾರ ಬಿಡುಗಡೆ ಮಾಡಿರುವುದನ್ನು ವಾಷಿಂಗ್ಟನ್‌ ಟೈಮ್ಸ್‌ ವರದಿ ಮಾಡಿದೆ.

ಒಬಾಮಾ ದಂಪತಿ ತಾವು ಗಳಿಸಿದ ಒಟ್ಟು ಆದಾಯದಲ್ಲಿ 14.7% ಹಣವನ್ನು ಅಂದರೆ 42.70 ಲಕ್ಷ ರೂ. ಹಣವನ್ನು ದಾನ ಮಾಡಿದ್ದಾರೆ. ಸುಮಾರು 34 ದತ್ತಿ ಸಂಸ್ಥೆಗಳಿಗೆ ಅವರು ಉದಾರ ದಾನ ನೀಡಿದ್ದಾರೆ. ರಾಕ್‌ವಿಲ್ಲೆಯಲ್ಲಿರುವ ಫಿಷರ್‌ ಹೌಸ್‌ ಫೌಂಡೇಷನ್‌ಗೆ ಗರಿಷ್ಠ ಎಂದರೆ 6.04 ಲಕ್ಷ ರೂ. ದೇಣಿಗೆ ನೀಡಿದ್ದಾರೆ. ಬೀ ಬಿಡೆನ್‌ ಪೌಂಡೇಷನ್‌ಗೆ 3.33 ಲಕ್ಷ ರೂ. ದಾನ ಮಾಡಿರುವುದು ತಿಳಿದುಬಂದಿದೆ.

ಅಮೆರಿಕ ಉಪಾಧ್ಯಕ್ಷ ಜೊ ಬಿಡೆನ್‌ ಮತ್ತು ಅವರ ಪತ್ನಿ ಜಿಲ್‌ ಅವರು 2015ರಲ್ಲಿ 60.98 ಲಕ್ಷ ರೂ. ತೆರಿಗೆ ಪಾವತಿಸಿದ್ದಾರೆ. ಅವರ ಒಟ್ಟು ಆದಾಯ 2.61 ಕೋಟಿ ರೂ. ಇತ್ತು. ಅದರಲ್ಲಿ ಅವರು 4.41 ಲಕ್ಷ ರೂ. ದಾನ ಮಾಡಿದ್ದಾರೆ ಎಂದು ವಾ,ಇಂಗ್ಟನ್‌ ಟೈಮ್ಸ್‌ ವರದಿ ಮಾಡಿದೆ.