ಹ್ಯೂಸ್ಟನ್(ಅಮೆರಿಕ): ಅಮೆರಿಕದ ಟೆಕ್ಸಾಸ್ ರಾಜ್ಯದ ಹ್ಯೂಸ್ಟನ್ ನಗರದಲ್ಲೀಗ ಮೋದಿ ಜಪ. ಅಮೆರಿಕದ ನಾಲ್ಕನೇ ಅತಿ ಜನಪ್ರಿಯ ನಗರ ಎಂದೇ ಹೆಸರುವಾಸಿಯಾಗಿರೋ ಹ್ಯೂಸ್ಟನ್‌ನಲ್ಲಿ, ಎಲ್ಲಿ ನೋಡಿದ್ರೂ ಮೋದಿ ಫ್ಲೆಕ್ಸ್‌ಗಳೇ ರಾರಾಜಿಸ್ತಿವೆ. ಭಾರತದ ತ್ರಿವರ್ಣ ಧ್ವಜ ಎಲ್ಲೆಡೆ ಹಾರಾಡ್ತಿದೆ. ಇದಕ್ಕೆಲ್ಲಾ ಕಾರಣ ಮೋದಿ ಮೆಗಾ ಶೋ! ಸೆಪ್ಟಂಬರ್ 22ರಂದು ನಡೆಯಲಿರುವ ‘ಹೌಡಿ! ಮೋದಿ’ ಕಾರ್ಯಕ್ರಮಕ್ಕೆ ನಡೆಯುತ್ತಿರುವ ಸಿದ್ದತೆ ಇದು.

‘ಹೌಡಿ! ಮೋದಿ’ ಅಂದ್ರೆ, ಹೌದಾ ಮೋದಿ ಅಥವಾ ‘ಹೇಗಿದ್ದೀರಿ ಮೋದಿ’ ಎಂತಲೂ ಹೇಳಬಹುದು. ಸುಮಾರು 50 ಸಾವಿರಕ್ಕೂ ಹೆಚ್ಚು ಜನ ಈಗಾಗಲೇ ‘ಹೌದಾ, ಮೋದಿ!’ ಕಾರ್ಯಕ್ರಮಕ್ಕೆ ತಮ್ಮ ಹೆಸರು ನೋಂದಾಯಿಸಿಕೊಂಡಿದ್ದಾರೆ. ಹ್ಯೂಸ್ಟನ್‌ನ ಎನ್‌ಆರ್‌ಜಿ ಮೈದಾನದಲ್ಲಿ ಮೋದಿ ಮೆಗಾ ಶೋಗೆ ಸ್ಥಳ ನಿಗದಿ ಮಾಡಲಾಗಿದೆ. ಟೆಕ್ಸಾಸ್ ಭಾರತ ವೇದಿಕೆ ಎಂಬ ಹ್ಯೂಸ್ಟನ್ ಮೂಲದ ಲಾಭರಹಿತ ಸಂಸ್ಥೆಯೊಂದು ಕಾರ್ಯಕ್ರಮವನ್ನು ಆಯೋಜಿಸಿದೆ.

ಮೋದಿ ಹೈ ತೋ ಮಮ್ಕಿನ್ ಹೈ: ಅಮೆರಿಕ ರಾಜ್ಯ ಕಾರ್ಯದರ್ಶಿ

ಅಮೆರಿಕ ದೇಶದಾದ್ಯಂತ ಪ್ರಮುಖ ಹೆದ್ದಾರಿಗಳಲ್ಲಿ ಮೋದಿ ಹಾಗೂ ಭಾರತದ ತ್ರಿವರ್ಣ ಧ್ವಜದ ಫ್ಲೆಕ್ಸ್‌ಗಳು ರಾರಾಜಿಸುತ್ತಿವೆ. ಹಲವಾರು ಜನ ತಮ್ಮ ಮನೆಗಳ ಎದುರು ಅಮೆರಿಕ ಹಾಗೂ ಭಾರತದ ಧ್ವಜಗಳನ್ನು ನೆಟ್ಟಿದ್ದಾರೆ. ಮೋದಿಯವರ ಈ ಐತಿಹಾಸಿಕ ಕಾರ್ಯಕ್ರಮಕ್ಕೆ ಹ್ಯೂಸ್ಟನ್ ನಗರದಲ್ಲಿ ಈಗ ದಿನಗಣನೆ ಶುರುವಾಗಿದೆ.

ಪ್ರಧಾನಿ ಮೋದಿ ಅವರ ಈ ಕಾರ್ಯಕ್ರಮವನ್ನು ಸ್ಮರಣೀಯವನ್ನಾಗಿಸಲು, ಮುಂದಿನ ಪೀಳಿಗೆ ಕೂಡಾ ನೆನಪಿನಲ್ಲಿ ಇಟ್ಟುಕೊಳ್ಳುವಂತೆ ಮಾಡಲು ಸಕಲ ಸಿದ್ದತೆ ನಡೆಯುತ್ತಿದೆ. ಮೋದಿಯವರ ಈ ಕಾರ್ಯಕ್ರಮ, ಅನಿವಾಸಿ ಭಾರತೀಯರು ಹಾಗೂ ಅಮೆರಿಕನ್ನರನ್ನು ಇನ್ನಷ್ಟು ಸನಿಹಕ್ಕೆ ತರಲು ನೆರವಾಗಲಿದೆ ಎಂದು ಸಂಘಟಕರು ಆಶಯ ವ್ಯಕ್ತಪಡಿಸಿದ್ದಾರೆ.


ಪ್ರಧಾನಿ ಮೋದಿ ಅವರ ಭಾಷಣಕ್ಕೂ ಮುನ್ನ ಸಾಂಸ್ಕೃತಿಕ ಕಾರ್ಯಕ್ರಮಗಳು ನಡೆಯಲಿವೆ. ಭಾರತ ಹಾಗೂ ಅಮೆರಿಕ ನಡುವಣ ಬಾಂಧವ್ಯ ಸಾರುವ 90 ನಿಮಿಷಗಳ ಸಾಂಸ್ಕೃತಿಕ ಕಾರ್ಯಕ್ರಮ ಇದಾಗಿದೆ. ಬಳಿಕ ಭಾರತ-ಅಮೆರಿಕ ನಡುವಣ ಸಾಮಾಜಿಕ, ಬೌದ್ಧಿಕ ಸಂಬಂಧವನ್ನು ವಿವರಿಸುವ ಕಾರ್ಯಕ್ರಮ ಆಯೋಜಿಸಲಾಗಿದೆ. ಈ ಕಾರ್ಯಕ್ರಮಗಳಿಗಾಗಿ ಸೇವಾ ಇಂಟರ್‌ ನ್ಯಾಷನಲ್ ಎಂಬ ಸಂಸ್ಥೆ ದೇಣಿಗೆ ಸಂಗ್ರಹಿಸುತ್ತಿದೆ. ಕಾರ್ಯಕ್ರಮವನ್ನು ಮನೆಯಿಂದಲೇ ನೋಡುವವರಿಗಾಗಿ ನೇರಪ್ರಸಾರವೂ ಇರಲಿದೆ.

2014ರಲ್ಲಿ ಮೋದಿ ಪ್ರಧಾನಿಯಾದಾಗಿನಿಂದ ಈವರೆಗೂ 2 ಬಾರಿ ಅಮೆರಿಕದಲ್ಲಿ ಸಾರ್ವಜನಿಕ ಭಾಷಣ ಮಾಡ್ತಿದ್ದಾರೆ. ಹ್ಯೂಸ್ಟನ್‌ನಲ್ಲಿ 3ನೇ ಬಾರಿ ಪ್ರಧಾನಿ ಭಾಷಣ ಮಾಡಲಿದ್ದು, 2019ರ ಪ್ರಚಂಡ ಗೆಲುವಿನ ಬಳಿಕ ಅಮೆರಿಕದಲ್ಲಿ ಮಾಡುತ್ತಿರುವ ಮೊದಲ ಭಾಷಣ ಇದಾಗಿದೆ. ಈ ಹಿಂದೆ 2014ರಲ್ಲಿ ನ್ಯೂಯಾರ್ಕ್‌ನ ಮ್ಯಾಡಿಸನ್ ಸ್ಕ್ವೇರ್ ಗಾರ್ಡನ್‌ನಲ್ಲಿ ಮೋದಿ ಭಾಷಣ ಮಾಡಿದ್ದರು. 2016ರಲ್ಲಿ ಸಿಲಿಕಾನ್ ವ್ಯಾಲಿಯಲ್ಲಿ ಮೋದಿ ಸಾರ್ವಜನಿಕರನ್ನು ಉದ್ದೇಶಿಸಿ ಮಾತನಾಡಿದ್ದರು. ಎರಡೂ ಕಾರ್ಯಕ್ರಮಗಳಲ್ಲಿ 20 ಸಾವಿರಕ್ಕೂ ಹೆಚ್ಚು ಜನರು ಭಾಗವಹಿಸಿದ್ದರು. ಇದೀಗ ಹ್ಯೂಸ್ಟನ್‌ನಲ್ಲಿ 3ನೇ ಬಾರಿ ಭಾಷಣ ಮಾಡಲಿರುವ ಮೋದಿ, 50 ಸಾವಿರ ಜನರನ್ನು ಉದ್ದೇಶಿಸಿ ಮಾತನಾಡಲಿದ್ದಾರೆ.

ಮೋದಿ ಅಮೆರಿಕ ಭೇಟಿಗೆ ವೇದಿಕೆ ಸಜ್ಜು