ಸ್ಟಾಕ್‌ಹೋಂ: ಅಮೆರಿಕದ ಖ್ಯಾತ ಸಂಗೀತಗಾರ ಮತ್ತು ಗೀತರಚನೆಕಾರ ಬಾಬ್‌ ಡೈಲನ್‌ ಕೊನೆಗೂ 2016 ನೇ ಸಾಲಿನ ನೊಬೆಲ್‌ ಸಾಹಿತ್ಯ ಪ್ರಶಸ್ತಿಯನ್ನು ಸ್ವೀಕರಿಸಿದ್ದಾರೆ. ಬಾಬ್‌ ಅವರು ಪ್ರಶಸ್ತಿ ಸ್ವೀಕರಿಸುವ ಕುರಿತು ಸಾಕಷ್ಟು ಅನುಮಾನಗಳು ಮತ್ತು ಊಹಾಪೋಹಗಳಿಗೆ ತೆರೆ ಎಳೆದಿರುವ ಸ್ವೀಡಿಶ್‌ ಅಕಾಡೆಮಿ, ಶನಿವಾರ ಸ್ಟಾಕ್‌ಹೋಮ್‌ನಲ್ಲಿ ನಡೆದ ಖಾಸಗಿ ಸಂಗೀತ ಸಮಾರಂಭದಲ್ಲಿಯೆ ಪ್ರಶಸ್ತಿ ನೀಡಿ ಗೌರವಿಸಿದೆ.
'ಸ್ಟಾಕ್‌ಹೋಮ್‌ನಲ್ಲಿ ನಡೆದ ಖಾಸಗಿ ವರ್ಣರಂಜಿತ ಸಮಾರಂಭದಲ್ಲಿ 12 ಜನ ಅಕಾಡೆಮಿ ಸದಸ್ಯರು ಹಾಜರಿದ್ದರು. ಸುಂದರ ಕೆತ್ತನೆಯುಳ್ಳ ಪ್ರಶಸ್ತಿ ಪದಕವನ್ನು ಕೆಲವು ಕಾಲ ದಿಟ್ಟಿಸಿದ ಅವರು, ವರ್ಜಿಲ್‌ರ ಏನೈಡ್‌ ಕಾವ್ಯದ ಕೆಲವು ಸಾಲುಗಳನ್ನು ವಾಚಿಸಿದರು,' ಎಂದು ಅಕಾಡೆಮಿಯ ಕಾಯಂ ಕಾರ್ಯದರ್ಶಿ ಸಾರಾ ಡೆನಿಯಸ್‌ ಹೇಳಿಕೆ ನೀಡಿದ್ದಾರೆ. ಪ್ರತಿಷ್ಠಿತ ನೊಬೆಲ್‌ ಸಾಹಿತ್ಯ ಪ್ರಶಸ್ತಿ ಪಡೆದ ಮೊಟ್ಟ ಮೊದಲ ಗೀತ ರಚನೆಕಾರ ಎಂಬ ಹೆಗ್ಗಳಿಕೆಗೆ ಬಾಬ್‌ ಪಾತ್ರರಾಗಿದ್ದಾರೆ.
ಕಳೆದ ಅಕ್ಟೊಬರ್‌ನಲ್ಲಿ 2016 ನೇ ಸಾಲಿನ ಪ್ರಶಸ್ತಿಗಳನ್ನು ಘೋಷಿಸಿದ ಅಕಾಡೆಮಿ, ' ಬಾಬ್‌ ಅಮೆರಿಕನ್‌ ಸಂಗೀತಲೋಕಕ್ಕೆ ಹೊಸ ಕಾವ್ಯಾತ್ಮಕ ಅಭಿವ್ಯಕ್ತಿಯನ್ನು ನೀಡಿದರು,' ಎಂದು ಬಣ್ಣಿಸಿತ್ತು. 60 ರ ದಶಕದಿಂದ ನೂರಾರು ಹಾಡುಗಳನ್ನು ಬರೆಯುತ್ತಿರುವ ಅವರು, ''ನನ್ನ ಹಾಡುಗಳನ್ನು ಸಾಹಿತ್ಯ ಎಂದು ಪರಿಗಣಿಸುವಿರೆ?' ಎಂದು ಪ್ರಶ್ನಿಸಿದ್ದರು.
ನವಂಬರ್‌ನಲ್ಲಿ ನಡೆದ ನೊಬೆಲ್‌ ಪ್ರಶಸ್ತಿ ಪ್ರದಾನ ಸಮಾರಂಭದಲ್ಲಿ ಬಾಬ್‌ ಪಾಲ್ಗೊಂಡಿರಲಿಲ್ಲ. ಹೀಗಾಗಿ ಅವರು ಪ್ರಶಸ್ತಿ ಸ್ವೀಕರಿಸುವ ಕುರಿತು ಸಾಕಷ್ಟು ಅನುಮಾನಗಳಿದ್ದವು. ಅವರ ಈ ವರ್ತನೆಗೆ ಸಾಕಷ್ಟು ಟೀಕೆಗಳು ಕೇಳಿ ಬಂದಿದ್ದವು.
ಸದ್ಯಕ್ಕೆ ಪ್ರಪಂಚದಾದ್ಯಂತ ಸಂಗೀತ ಪ್ರವಾಸ ಕೈಗೊಂಡಿರುವ ಡೈಲನ್‌, ಮೊದಲ ಪ್ರದರ್ಶನವನ್ನು ಸ್ಟಾಕ್‌ಹೋಮ್‌ನಲ್ಲಿ ನೀಡಿದರು. ಸಂಗೀತ ಕಾರ್ಯಕ್ರಮದ ನಡುವೆಯೆ ಅಕಾಡೆಮಿ ಈ ಕಲಾವಿದನಿಗೆ ನೊಬೆಲ್‌ ನೀಡಿ ಗೌರವಿಸಿದೆ. ನೊಬೆಲ್‌ ಅಕಾಡೆಮಿಯ ಸದಸ್ಯರು ಸೇರಿದಂತೆ ಸಾವಿರಾರು ಅಭಿಮಾನಿಗಳು ಡೈಲನ್‌ರ ಸಂಗೀತ ಕಾರ್ಯಕ್ರಮದಲ್ಲಿ ಪಾಲ್ಗೊಂಡಿದ್ದರು. ಕಾರ್ಯಕ್ರಮದಲ್ಲಿ ಡೈಲನ್‌ ಪ್ರಶಸ್ತಿಯ ಕುರಿತು ಏನೂ ಮಾತನಾಡಲಿಲ್ಲ ಎನ್ನಲಾಗಿದೆ. ನೊಬೆಲ್‌ ಸಾಹಿತ್ಯ ಪುರಸ್ಕಾರ ಚಿನ್ನದ ಪದಕ ಮತ್ತು 8.91 ಲಕ್ಷ ಡಾಲರ್‌ ನಗದು ಹಣವನ್ನು ಒಳಗೊಂಡಿದೆ.