ಮದೀನಾದಲ್ಲಿ ತಾಯಿಯೆದುರೇ ಮಗುವಿನ ಕೊಲೆ: ಸುನ್ನಿ-ಶಿಯಾ ಪಂಥದ ಕಲಹ ಶಂಕೆ

ಬೆಚ್ಚಿಬೀಳಿಸುವ ಪ್ರಕರಣವೊಂದರಲ್ಲಿ ಸೌದಿ ಅರೇಬಿಯಾದ ಮದೀನಾದಲ್ಲಿ ತಾಯಿಯೆದುರೇ ಆಕೆಯ 6 ವರ್ಷದ ಮಗನನ್ನು ಟ್ಯಾಕ್ಸಿ ಡ್ರೈವರ್ ಕತ್ತುಸೀಳಿ ಹತ್ಯೆ ಮಾಡಿದ್ದಾನೆ.

ಮಸೀದಿಗೆ ತೆರಳಲು ಟ್ಯಾಕ್ಸಿ ಹತ್ತಿದ್ದ ತಾಯಿ-ಮಗ ಮಸೀದಿಗೆ ಸಮೀಪಿಸುತ್ತಲೇ ಟ್ಯಾಕ್ಸಿ ನಿಲ್ಲಿಸಿದ ಚಾಲಕ, ಮಗುವನ್ನು ಹೊರಗೆಳೆದು ಚೂಪಾದ ಗಾಜಿನಿಂದ ಬಾಲಕನ ಹತ್ಯೆ ಮಾಡಿದ್ದಾನೆ.

ಮಹಿಳೆಯರು ಹೊರಹೋಗುವುದಕ್ಕೆ ಕಠಿಣ ಕ್ರಮ ಮತ್ತು ನಿರ್ಬಂಧ ಇರುವ ಸೌದಿ ಅರೇಬಿಯಾದ ಮದೀನಾದಲ್ಲಿ ಮಗುವಿನ ಹತ್ಯೆಗೆ ಸುನ್ನಿ-ಶಿಯಾ ನಡುವಿನ ಕಲಹವೇ ಕಾರಣವಾಗಿರಬಹುದು ಎಂದು ಸ್ಥಳೀಯರು ಶಂಕೆ ವ್ಯಕ್ತಪಡಿಸಿದ್ದಾರೆ.

ದಾಳಿಯನ್ನು ತಡೆಯಲು ತಾಯಿ ಮತ್ತು ಪೊಲೀಸ್ ಓರ್ವ ಯತ್ನಿಸಿದರೂ ಪ್ರಯೋಜನವಾಗಿಲ್ಲ. ಹತ್ಯೆಗೆ ಟ್ಯಾಕ್ಸಿ ಚಾಲಕ ಮಾನಸಿಕ ಸ್ಥಿಮಿತ ಕಳೆದುಕೊಂಡಿರುವುದು ಕಾರಣ ಎಂದು ಹೇಳಲಾಗಿದ್ದರೂ, ಬಾಲಕ ಶಿಯಾ ಸಮುದಾಯಕ್ಕೆ ಸೇರಿದವನು. ಹೀಗಾಗಿ ಆತನ ಹತ್ಯೆ ಮಾಡಲಾಗಿದೆ ಎಂದು ಸ್ಥಳೀಯರು ಅನುಮಾನ ವ್ಯಕ್ತವಾಗಿದೆ.

ಸೌದಿ ಅರೇಬಿಯಾದ ಶಿಯಾ ಸಮುದಾಯ ಘಟನೆ ಬಗ್ಗೆ ತೀವ್ರ ಆಕ್ಷೇಪ ವ್ಯಕ್ತಪಡಿಸಿದ್ದು, ಅಲ್ಪಸಂಖ್ಯಾತರಿಗೆ ಸೂಕ್ತ ರಕ್ಷಣೆ ದೊರೆಯುತ್ತಿಲ್ಲ ಎಂದು ಆರೋಪಿಸಿದೆ.