ಐರೋಪ್ಯ ಒಕ್ಕೂಟದಿಂದ ಬ್ರಿಟನ್‌ ಹೊರಬರುವುದು ಖಚಿತ

ಲಂಡನ್‌: ಇದೇ 31ರಂದು ಐರೋಪ್ಯ ಒಕ್ಕೂಟದಿಂದ ಬ್ರಿಟನ್‌ ಹೊರಬರುವುದು ಖಚಿತ ಎಂದು ಪ್ರಧಾನಿ ಬೋರಿಸ್‌ ಜಾನ್ಸನ್‌ ನೇತೃತ್ವದ ಸರಕಾರ ಸ್ಪಷ್ಟಪಡಿಸಿದೆ.

ಸೋಮವಾರ ಸಂಸತ್‌ ಅಧಿವೇಶನ ಉದ್ದೇಶಿಸಿ ಮಾತ­ನಾಡಿದ ರಾಣಿ ಎಲಿಜ­ಬೆತ್‌-2 ಅವರು, ಐರೋಪ್ಯ ಒಕ್ಕೂಟ­ದಿಂದ ಬೇರ್ಪಡು­ವುದೇ ತಮ್ಮ ಸರಕಾರದ ಆದ್ಯತೆಯಾಗಿದೆ ಎಂದು ಹೇಳಿದರು.

''ಐರೋಪ್ಯ ಒಕ್ಕೂಟದಿಂದ ಉತ್ತಮ ಡೀಲ್‌ನೊಂದಿಗೆ ಇದೇ ಅ.31ರಂದು ಹೊರಬರುವುದು ಸರಕಾರದ ಆದ್ಯತೆಯಾಗಿದೆ. ಮುಕ್ತ ವ್ಯಾಪಾರ ಮತ್ತು ಸೌಹಾರ್ದ ಸಹಕಾರದ ಆಧಾರದ ಮೇಲೆ ಐರೋಪ್ಯ ಒಕ್ಕೂಟದ ಜತೆಗಿನ ಮುಂದಿನ ಸಂಬಂಧ ಹೇಗಿರಬೇಕು ಎನ್ನುವುದು ನಿರ್ಧಾರ­ವಾಗಲಿದೆ,'' ಎಂದು ರಾಣಿ ತಿಳಿಸಿದರು.

''ಬ್ರೆಕ್ಸಿಟ್‌ಗೆ ಸಂಬಂಧಿಸಿ ಉತ್ತಮ ಒಪ್ಪಂದ ಏರ್ಪಡಲಿದೆ ಮತ್ತು ಅದು ಈ ತಿಂಗಳಲ್ಲಿಯೇ ನಡೆಯಲಿದೆ,'' ಎಂದು ಐರಿಷ್‌ ಉಪ ಪ್ರಧಾನಿ ಸೈಮನ್‌ ಕೊವ್ನಿ ಭಾನುವಾರವಷ್ಟೇ ಹೇಳಿದ್ದರು. ಅದರ ಬೆನ್ನಲ್ಲಿಯೇ ಸರಕಾರದ ನಿಲುವು ಪ್ರಕಟ­ವಾಗಿದೆ. ಬ್ರೆಕ್ಸಿಟ್‌ಗೆ ಸಂಬಂಧಿಸಿದ ಅಂತಿಮ ಮಾತುಕತೆ ಬ್ರುಸೆಲ್ಸ್‌ನಲ್ಲಿಇದೇ ಗುರುವಾರ­ದಿಂದ ಆರಂಭವಾಗಲಿದೆ. ಅಲ್ಲಿ ಬ್ರೆಕ್ಸಿಟ್‌ನ ಷರತ್ತುಗಳು ಹಾಗೂ ಪ್ರಕ್ರಿಯೆ ನಿರ್ಧಾರವಾ­ಗಲಿದೆ.

ಒಂದೊಮ್ಮೆ ಶನಿವಾರದ ಒಳಗಾಗಿ ಬ್ರೆಕ್ಸಿಟ್‌ ಒಪ್ಪಂದ ಕುದುರದೇ ಇದ್ದಲ್ಲಿ ಪ್ರಧಾನಿ ಬೋರಿಸ್‌ ಜಾನ್ಸನ್‌ ಅವರು ಬ್ರೆಕ್ಸಿಟ್‌ ಪ್ರಕ್ರಿಯೆಯನ್ನು ಮೂರನೇ ಬಾರಿಗೆ ಮುಂದೂಡುವಂತೆ ಐರೋಪ್ಯ ಒಕ್ಕೂಟವನ್ನು ಮನವಿ ಮಾಡಿಕೊಳ್ಳುವುದು ಅನಿವಾರ್ಯವಾಗಲಿದೆ.