ಪಾಕ್‌ ಉಗ್ರರಿಗೆ ಬ್ರಿಟನ್‌ ತೆರಿಗೆದಾರರ ಹಣ!

ಲಂಡನ್‌: ಬ್ರಿಟನ್‌ನಲ್ಲಿರುವ ಏಷ್ಯಾ ಮೂಲದ ಪಾತಕಿಗಳು ತೆರಿಗೆ ವಂಚನೆ ಮೂಲಕ ಸಂಪಾದಿಸಿದ ಕೋಟ್ಯಂತರ ರೂಪಾಯಿ ಹಣವನ್ನು ಪಾಕಿಸ್ತಾನ ಮತ್ತು ಅಫಘಾನಿಸ್ತಾನದ ಉಗ್ರ ಸಂಘಟನೆಗಳಿಗೆ ಆರ್ಥಿಕ ನೆರವು ನೀಡಲು ಬಳಕೆ ಮಾಡಿರುವುದು ಬೆಳಕಿಗೆ ಬಂದಿದೆ.

ಗುಪ್ತಚರ ಸಂಸ್ಥೆ ಹಾಗೂ ಪೊಲೀಸ್‌ ಇಲಾಖೆಗಳ ರಹಸ್ಯ ಕಡತಗಳನ್ನು ಆಧರಿಸಿ ಬ್ರಿಟನ್‌ನ ಮಾಧ್ಯಮವೊಂದು ಪ್ರಕಟಿಸಿರುವ ಸ್ಫೋಟಕ ವರದಿಯಲ್ಲಿ ಈ ವಿಷಯ ಬಯಲಾಗಿದೆ.

ಲಂಡನ್‌, ಬಕಿಂಗ್‌ಹ್ಯಾಮ್‌ಶೈರ್‌, ಬರ್ಮಿಂಗ್‌ಹ್ಯಾಂನಲ್ಲಿ ತಳವೂರಿರುವ ಗ್ಯಾಂಗ್‌ಸ್ಟರ್‌ಗಳು ಸರಕಾರಕ್ಕೆ ತೆರಿಗೆ ವಂಚನೆ ಮಾಡಿದ ಕೋಟ್ಯಂತರ ರೂ. ಹಣದಲ್ಲಿ ಶೇ. 1ರಷ್ಟನ್ನು ಅಲ್‌-ಖಾಯಿದಾ ಸಂಘಟನೆಗೆ ನೀಡಿದ್ದಾರೆ. ಮದರಸಾಗಳು, ಉಗ್ರರ ತರಬೇತಿ ಕೇಂದ್ರಗಳ ನಿರ್ವಹಣೆ ಹಾಗೂ ಉಗ್ರ ಚಟುವಟಿಕೆಗಳಿಗಾಗಿ ಈ ಹಣವನ್ನು ಬಳಕೆ ಮಾಡಲಾಗಿದೆ ಎಂದು ವರದಿ ತಿಳಿಸಿದೆ.

ವಂಚಕರು ಬ್ರಿಟನ್‌ ಸರಕಾರಕ್ಕೆ ಸುಮಾರು 700 ಕೋಟಿಗಿಂತಲೂ ಅಧಿಕ ಮೊತ್ತದ ತೆರಿಗೆ ವಂಚನೆ ಮಾಡಿದ್ದಾರೆ ಎಂದು ಮೂಲಗಳು ತಿಳಿಸಿವೆ.