ಲೆಬನಾನ್‌ ಪ್ರಧಾನಿ ನಾಪತ್ತೆ: ಮಧ್ಯಪ್ರಾಚ್ಯದಲ್ಲಿ ಯುದ್ಧದ ಕಾರ್ಮೋಡ

ಬೈರೂತ್‌: ಕಳೆದ ವಾರ ದಿಢೀರ್‌ ವಿದೇಶ ಪ್ರವಾಸ ಕೈಗೊಂಡಿದ್ದ ಲೆಬನಾನ್‌ ಪ್ರಧಾನಿ ಸಾದ್‌ ಹ್ಯಾರಿರಿ ಹಠಾತ್‌ ನಾಪತ್ತೆಯಾಗಿದ್ದಾರೆ. ವಿದೇಶ ಪ್ರವಾಸದ ಭಾಗವಾಗಿ ಮೊದಲು ರಾಜಕೀಯ ಆಶ್ರಯದಾತ ಸೌದಿ ಅರೇಬಿಯಾಗೆ ಭೇಟಿ ನೀಡಿದ್ದರು. ಆದರೆ ಮರುದಿನವೇ ಅನಿರೀಕ್ಷಿತವಾಗಿ, ತಮ್ಮ ಹುದ್ದೆಗೆ ರಾಜೀನಾಮೆ ನೀಡಿರುವುದಾಗಿ ಸೌದಿ ರಾಜಧಾನಿ ರಿಯಾದ್‌ನಲ್ಲಿ ವೀಡಿಯೋ ಸಂದೇಶವೊಂದರಲ್ಲಿ ಪ್ರಕಟಿಸಿದರು. ಅವರು ಇನ್ನೂ ಲೆಬನಾನ್‌ಗೆ ಹಿಂದಿರುಗಿಲ್ಲ.

ಲೆಬನಾನ್‌ನ ಮೈತ್ರಿ ಸರಕಾರದ ಪಾಲುದಾರ ಹಾಗೂ ಇರಾನ್‌ ಬೆಂಬಲಿತ ಹಿಜ್ಬುಲ್ಲಾ ಮೂವ್‌ಮೆಂಟ್‌, ತಮ್ಮ ಪ್ರಧಾನಿಯನ್ನು ಅವರ ಇಚ್ಛೆಗೆ ವಿರುದ್ಧವಾಗಿ ಸೌದಿ ಹಿಡಿದಿಟ್ಟುಕೊಂಡಿದೆ ಎಂದು ಶುಕ್ರವಾರ ಆರೋಪಿಸಿತ್ತು. ಆದರೆ ಸೌದಿ ಈ ಆರೋಪಗಳನ್ನು ತಳ್ಳಿಹಾಕಿದ್ದು, ಅನಿರ್ದಿಷ್ಟ ಕೊಲೆ ಸಂಚಿನ ಹಿನ್ನೆಲೆಯಲ್ಲಿ ಲೆಬನಾನ್‌ ಪ್ರಧಾನಿಯನ್ನು ತಾನು ರಕ್ಷಿಸಿರುವುದಾಗಿ ಹೇಳಿದೆ.

ಸೌದಿ ಅರೇಬಿಯಾದಲ್ಲಿ ಭಾರಿ ಭ್ರಷ್ಟಾಚಾರ ವಿರೋಧಿ ಸಮರದ ನೆಪದಲ್ಲಿ ರಾಜಮನೆತನದ ಹಲವು ರಾಜಕುಮಾರರನ್ನು ಬಂಧಿಸಿ ಜೈಲಿಗೆ ತಳ್ಳಲಾಗಿದೆ. ಲೆಬನಾನ್‌ನಲ್ಲಿ ನೆಲೆಸಿರುವ ಸೌದಿಯ ಶ್ರೀಮಂತ ಉದ್ಯಮಿಗಳು ಕೂಡಲೇ ಸೌದಿಗೆ ಹಿಂದಿರುಗಬೇಕೆಂದು ಸೌದಿ ದೊರೆ ಗುರುವಾರ ಆದೇಶಿಸಿದ್ದರು. ಈ ಹಿನ್ನೆಲೆಯಲ್ಲಿ ಮಧ್ಯಪ್ರಾಚ್ಯದಲ್ಲಿ ಬಿಗುವಿನ ಪರಿಸ್ಥಿತಿ ನಿರ್ಮಾಣವಾಗಿದೆ. ಹ್ಯಾರಿರಿ ಪ್ರಕರಣದಿಂದಾಗಿ ಮಿಲಿಟರಿ ಸಂಘರ್ಷ ಆರಂಭವಾಗುವ ಸಾಧ್ಯತೆಯೂ ಇದೆ.

'ಲೆಬನಾನ್‌ ಒಳಗೆ ಅಥವಾ ಹೊರಗಿನ ಯಾವುದೇ ಪಕ್ಷ ಲೆಬನಾನ್‌ ಅನ್ನು ಛಾಯಾ ಸಮರದ ತಾಣವಾಗಿ ಬಳಸುವ ಮೂಲಕ ಆ ದೇಶದ ಅಭದ್ರತೆಗೆ ಕಾರಣವಾದಲ್ಲಿ ಪರಿಸ್ಥಿತಿ ನೆಟ್ಟಗಿರದು'' ಎಂದು ಅಮೆರಿಕದ ವಿದೇಶಾಂಗ ಕಾರ್ಯದರ್ಶಿ ರೆಕ್ಸ್‌ ಟಿಲ್ಲರ್‌ಸನ್‌ ಶುಕ್ರವಾರ ಎಚ್ಚರಿಕೆ ನೀಡಿದ್ದರು. ಇದು ಹಿಜ್‌ಬುಲ್ಲಾ, ಸೌದಿ ಅರೇಬಿಯಾ ಮತ್ತು ಇರಾನ್‌ಗಳನ್ನು ಉದ್ದೇಶಿಸಿ ನೀಡಿದ ಎಚ್ಚರಿಕೆಯಾಗಿತ್ತು.

ಸೌದಿಯ ಯುವ ದೊರೆ ಮೊಹಮ್ಮದ್‌ ಬಿನ್ ಸಲ್ಮಾನ್‌ ಅವರ ಆಕ್ರಮಣಕಾರಿ ಆಡಳಿತ ಶೈಲಿ, ಇದಕ್ಕೆ ಪೂರಕವಾಗಿ ಟ್ರಂಪ್‌ ಆಡಳಿತ ಸೌದಿ ದೊರೆಯ ನೀತಿಗಳಿಗೆ ನೀಡುತ್ತಿರುವ ಬೆಂಬಲದಿಂದಾಗಿ ಇರಾನಿನ ಪ್ರಭಾವ ಕುಗ್ಗಿಸಲು ಹಿಜ್ಬುಲ್ಲಾ ಜೊತೆ ಇನ್ನೊಂದು ಯುದ್ಧ ಆರಂಭವಾದರೂ ಅಚ್ಚರಿಯಿಲ್ಲ.

ಯೆಮೆನ್‌ನಿಂದ ಕ್ಷಿಪಣಿಯೊಂದು ಹಾರಿ ಬಂದು ಸೌದಿ ಗಡಿಯೊಳಗೆ ಬಿದ್ದಿರುವುದನ್ನು ಇರಾನ್‌ ಮತ್ತು ಲೆಬನಾನ್‌ ಸಾರಿದ ಯುದ್ಧ ಎಂದು ಸೌದಿ ಪರಿಗಣಿಸಿದೆ. ಹೀಗಾಗಿ ಕೂಡಲೇ ಲೆಬನಾನ್‌ನಿಂದ ಎಲ್ಲ ಸೌದಿ ಪ್ರಜೆಗಳು ತೆರವು ಮಾಡುವಂತೆ ಸೌದಿ ಸೂಚನೆ ನೀಡಿದೆ.

ಸೌದಿ ತಾನಾಗಿಯೇ ಯೆಮೆನ್‌ ಮೇಲೆ ದಾಳಿ ನಡೆಸುವ ಸಾಧ್ಯತೆಯಿಲ್ಲ. ಆದರೆ 2006ರಲ್ಲಿ ಹಿಜ್ಬುಲ್ಲಾ ವಿರುದ್ಧ ಯುದ್ಧ ಸಾರಿದ್ದ ಇಸ್ರೇಲ್‌, ತನ್ನ ಉತ್ತರದ ಗಡಿಯಲ್ಲಿ ಹಿಜ್ಬುಲ್ಲಾದ ಪ್ರಭಾವ ಹೆಚ್ಚುತ್ತಿರುವ ಬಗ್ಗೆ ಕಳವಳ ವ್ಯಕ್ತಪಡಿಸಿದೆ. ಹೀಗಾಗಿ ಇಸ್ರೇಲ್‌ ಲೆಬನಾನ್‌ ಮೇಲೆ ದಾಳಿ ಆರಂಭಿಸುವ ಸಾಧ್ಯತೆಯನ್ನು ತಳ್ಳಿಹಾಕುವಂತಿಲ್ಲ.

ಲೆಬನಾನ್‌ ಪ್ರಧಾನಿ ಹ್ಯಾರಿರಿ ಅವರನ್ನು ಅಪಹರಿಸಿದ ಬಳಿಕ ಲೆಬನಾನ್‌ ಮೇಲೆ ದಾಳಿ ಮಾಡುವಂತೆ ಇಸ್ರೇಲ್‌ಗೆ ಸೌದಿ ಅರೇಬಿಯಾ ಕೋರಿದೆ ಎಂದು ಹಿಜ್ಬುಲ್ಲಾ ನಾಯಕ ಹಸನ್‌ ನಸ್ರುಲ್ಲಾಆರೋಪಿಸಿದ್ದಾರೆ.

'ನಾನು ಯಾವುದೇ ವಿಶ್ಲೇಷಣೆಗಳನ್ನು ಬಯಸುತ್ತಿಲ್ಲ. ನನಗೆ ದೊರೆತ ಮಾಹಿತಿಯನ್ನು ಹಂಚಿಕೊಂಡಿದ್ದೇನೆ. ಲೆಬನಾನ್‌ ಮೇಲೆ ದಾಳಿ ಮಾಡುವಂತೆ ಇಸ್ರೇಲ್‌ಗೆ ಸೌದಿ ಅರೇಬಿಯಾ ಸೂಚಿಸಿದೆ' ಎಂದು ಹಿಜ್ಬುಲ್ಲಾ ನಾಯಕ ಹೇಳಿದ್ದಾರೆ.