ಖಶೋಗಿ ಹತ್ಯೆ ಪ್ರಕರಣ: ದೇಹದ ಭಾಗ ಸಾಗಿಸುತ್ತಿದ್ದ ದುಷ್ಕೃತ್ಯ ಸಿಸಿಟಿವಿಯಲ್ಲಿ ಸೆರೆ

ಅಂಕಾರ: ಸೌದಿ ಅರೇಬಿಯಾದ ಪತ್ರಕರ್ತ ಜಮಾಲ್ ಖಶೋಗಿ ಹತ್ಯೆ ಮತ್ತು ಮೃತದೇಹ ನಾಪತ್ತೆ ಪ್ರಕರಣ ಮತ್ತೆ ಸದ್ದುಮಾಡಿದ್ದು, ಇಸ್ತಾಂಬುಲ್‌ನ ಸೌದಿ ಕಾನ್ಸುಲೇಟ್‌ ಒಳಗಡೆ ದೊಡ್ಡ ಸೂಟ್‌ಕೇಸ್ ಮತ್ತು ಕಪ್ಪು ಚೀಲವನ್ನು ಮೂವರು ಕೊಂಡೊಯ್ಯುತ್ತಿರುವ ದೃಶ್ಯಾವಳಿಯನ್ನು ಸ್ಥಳೀಯ ಟಿವಿ ಪ್ರಸಾರ ಮಾಡಿದೆ.

ಸಿಸಿಟಿವಿ ದೃಶ್ಯಾವಳಿಯಲ್ಲಿ ಕಂಡಂತೆ ಭಾರಿ ಗಾತ್ರದ ಸೂಟ್‌ಕೇಸ್ ಹೊತ್ತ ಮೂವರು ಸೌದಿ ರಾಯಭಾರ ಕಟ್ಟಡವನ್ನು ಪ್ರವೇಶಿಸುತ್ತಾರೆ. ಸೌದಿಯಲ್ಲಿನ ಕೆಲವೊಂದು ವಿಚಾರಗಳ ಬಗ್ಗೆ ವಾಷಿಂಗ್ಟನ್‌ ಪೋಸ್ಟ್‌ಗೆ ಬರೆಯುತ್ತಿದ್ದ ಮತ್ತು ಸೌದಿಯ ಸಮಸ್ಯೆ ಬಗ್ಗೆ ದನಿಯೆತ್ತುತ್ತಿದ್ದ ಪತ್ರಕರ್ತ ಖಶೋಗಿಗೆ ಜೀವಬೆದರಿಕೆಯಿತ್ತು. ಅಲ್ಲದೆ ಆತ ಸೌದಿ ವಿರುದ್ಧ ಬರೆಯದಂತೆ ಒತ್ತಡ ಹೇರಲಾಗುತ್ತಿತ್ತು.


ನಂತರದಲ್ಲಿ ಆತನನ್ನು ಸಂಧಾನ ನೆಪದಲ್ಲಿ ಕರೆಸಿಕೊಂಡು ಹತ್ಯೆಗೈಯ್ಯಲಾಗಿತ್ತು ಎಂದು ಹೇಳಲಾಗಿದ್ದರೆ, ಮತ್ತೊಂದೆಡೆ ಖಶೋಗಿಯನ್ನು ಅಪಹರಿಸಿ, ರಹಸ್ಯವಾಗಿ ಹತ್ಯೆಗೈಯಲಾಗಿತ್ತು, ಅದಕ್ಕಾಗಿ 15 ಮಂದಿಯ ತಂಡ ಕಾರ್ಯಾಚರಣೆ ನಡೆಸಿತ್ತು ಎಂದು ವರದಿಗಳು ಹೇಳಿದ್ದವು.

ಖಶೋಗಿ ಹತ್ಯೆಯ ಬಳಿಕ ಮೃತದೇಹ ದೊರೆತಿರಲಿಲ್ಲ. ಖಶೋಗಿಯನ್ನು ಹತ್ಯೆಗೈದ ಬಳಿಕ ದೇಹವನ್ನು ತುಂಡು ತುಂಡಾಗಿ ಕತ್ತರಿಸಿ, ಆಸಿಡ್‌ನಲ್ಲಿ ಮುಳುಗಿಸಿ ಕರಗಿಸಲಾಗಿತ್ತು ಎಂದು ಮೂಲಗಳು ಹೇಳಿದ್ದವು. ಇದೀಗ ಅದಕ್ಕೆ ಪೂರಕವೆನ್ನುವಂತೆ ಸಿಸಿಟಿವಿ ದೃಶ್ಯಾವಳಿ ಲಭ್ಯವಾಗಿರುವುದು ಸೌದಿಗೆ ಮುಜುಗರ ಉಂಟುಮಾಡಿದೆ.