ಮತ್ತೆ ಶುರುವಾದ ಕೊರೊನಾ ಕಾಟ: 5 ದಿನದಲ್ಲಿ ಸುಸಜ್ಜಿತ ಆಸ್ಪತ್ರೆ ನಿರ್ಮಿಸಿದ ಚೀನಾ!

ಬೀಜಿಂಗ್: ಚೀನಾದಲ್ಲಿ ಮತ್ತೆ ಕೊರೊನಾ ವೈರಸ್ ಸೋಂಕು ಹೆಚ್ಚುತ್ತಿದ್ದು, ಮಾರಕ ವೈರಾಣುವಿನ ಎರಡನೇ ದಾಳಿಯನ್ನು ಎದುರಿಸಲು ಚೀನಾ ಸಜ್ಜಾಗುತ್ತಿದೆ.

ಅದರಂತೆ ದಕ್ಷಿಣ ಬೀಜಿಂಗ್‌ನಲ್ಲಿ ಕೇವಲ ಐದು ದಿನಗಳಲ್ಲಿ ಸುಸಜ್ಜಿತ ಆಸ್ಪತ್ರೆಯನ್ನು ನಿರ್ಮಿಸಿರುವ ಚೀನಾ, ಕೋವಿಡ್ ಸೋಂಕಿತರ ಚಿಕಿತ್ಸೆಗೆ ಎಲ್ಲಾ ಸಿದ್ಧತೆಗಳನ್ನು ಪೂರ್ಣಗೊಳಿಸಿದೆ.

ಚೀನಾದ ಹೆಬೀ ಪ್ರಾಂತ್ಯದ ನ್ಯಾಗಾಂಗ್ ಪ್ರದೇಶದಲ್ಲಿ 6,500 ಹಾಸಿಗೆ ಸಾಮರ್ಥ್ಯದ ಒಟ್ಟು ಆರು ಆಸ್ಪತ್ರೆಗಳನ್ನು ನಿರ್ಮಿಸಲಾಗುತ್ತಿದೆ. ಈ ಎಲ್ಲಾ ಆಸ್ಪತ್ರೆಗಳನ್ನು ಮುಂದಿನ ವಾರದಿಂದಲೇ ಕಾರ್ಯಾರಂಭ ಮಾಡಲಿವೆ ಎಂದು ಚೀನಾದ ಅಧಿಕೃತ ಸರ್ಕಾರಿ ಮಾಧ್ಯಮ ವರದಿ ಮಾಡಿದೆ.

ಎಲ್ಲಿದೆ ಕೊರೊನಾ?: 10 ದಿನದಲ್ಲಿ ಕಟ್ಟಿದ್ದ ಬೃಹತ್ ಆಸ್ಪತ್ರೆಗೆ ಬೀಗ ಜಡಿದ ಚೀನಾ!
ಚೀನಾದ ವಿವಿಧ ಪ್ರಾಂತ್ಯಗಳಲ್ಲಿ ಕೊರೊನಾ ಸೋಂಕು ವೇಗವಾಗಿ ಹರಡುತ್ತಿದ್ದು, ಇದನ್ನು ತಡೆಗಟ್ಟಲು ಎಲ್ಲಾ ರೀತಿಯ ಕ್ರಮಗಳನ್ನು ಕೈಗೊಳ್ಳಲಾಗಿದೆ ಎಂದು ಚೀನಾದ ಅಧಿಕೃತ ಸರ್ಕಾರಿ ಮಾಧ್ಯಮ ಸ್ಪಷ್ಟಪಡಿಸಿದೆ.

ಕೋವಿಡ್ ಸೋಂಕಿತರಿಗೆ ಆಯಾ ಪ್ರದೇಶಗಳಲ್ಲೇ ಪ್ರತ್ಯೇಕವಾಗಿ ಚಿಕಿತ್ಸೆ ನೀಡಲು ಅನುಕೂಲವಾಗುವಂತೆ ಸುಸಜ್ಜಿತ ಆಸ್ಪತ್ರೆಗಳನ್ನು ನಿರ್ಮಿಸಲಾಗುತ್ತಿದ್ದು, ಆರು ಆಸ್ಪತ್ರೆಗಳ ಪೈಕಿ ಒಂದು ಆಸ್ಪತ್ರೆ ಈಗಾಗಲೇ ಸಂಪೂರ್ಣವಾಗಿ ಸಿದ್ಧವಾಗಿದೆ.

ಇಷ್ಟೇ ಅಲ್ಲದೇ ಕೊರೊನಾ ಸೋಂಕು ಕಂಡುಬಂದ ಪ್ರದೇಶಗಳ ಸಮಸ್ತ ಜನಸಂಖ್ಯೆಯನ್ನು ಕೊರೊನಾ ಪರೀಕ್ಷೆಗೆ ಚೀನಾ ಸರ್ಕಾರ ಗುರಿ ಮಾಡಲಿದ್ದು, ಕೊರೊನಾ ಪರೀಕ್ಷೆ ಪ್ರಮಾಣವನ್ನು ದ್ವಿಗುಣಗೊಳಿಸಿದೆ.

ವುಹಾನ್ ಪರೀಕ್ಷೆಗೆ ಬಂದವರಿಗೆ ಅಗ್ನಿ ಪರೀಕ್ಷೆ: WHO ತಂಡದ ಇಬ್ಬರು ಸದಸ್ಯರಿಗೆ ಕೊರೊನಾ ದೃಢ!
2020ರಲ್ಲಿ ಚೀನಾದ ವುಹಾನ್ ಪ್ರಾಂತ್ಯದಲ್ಲಿ ಮೊದಲ ಕೊರೊನಾ ವೈರಸ್ ಸೋಂಕು ಪತ್ತೆಯಾದಾಗಲೂ ಚೀನಾ ಇದೇ ರೀತಿಯ ಬೃಹತ್ ಆಸ್ಪತ್ರೆಯೊಂದನ್ನು ಕೇವಲ 10 ದಿನಗಳಲ್ಲಿ ನಿರ್ಮಿಸಿದ್ದನ್ನು ಇಲ್ಲಿ ಸ್ಮರಿಸಬಹುದು.