ಚೀನಾ ಆ್ಯಪ್‌ಗಳನ್ನು ಭಾರತ ನಿಷೇಧಿಸಿದಕ್ಕೆ ಆಕ್ಷೇಪ ವ್ಯಕ್ತಪಡಿಸಿದ ಡ್ರ್ಯಾಗನ್‌ ದೇಶ, ಏನೆಂದು ಹೇಳಿತು?

ಬೀಜಿಂಗ್‌: ರಾಷ್ಟ್ರೀಯ ಸುರಕ್ಷತೆಗೆ ಧಕ್ಕೆ ಆಗುವ ಹಿನ್ನೆಲೆಯಲ್ಲಿ ಮುಂಜಾಗ್ರತಾ ಕ್ರಮವಾಗಿ ಚೀನಾ ಮೂಲದ 43 ಆ್ಯಪ್‌ಗಳಿಗೆ ಕೇಂದ್ರ ಸರಕಾರ ನಿರ್ಬಂಧ ಹೇರಿದ್ದನ್ನು ಚೀನಾ ತೀವ್ರವಾಗಿ ವಿರೋಧಿಸಿದೆ. ಈ ಕ್ರಮದಿಂದ ವಿಶ್ವ ವ್ಯಾಪಾರ ಸಂಸ್ಥೆ (ಡಬ್ಲುಟಿಒ) ನಿಯಮಾವಳಿಗಳ ಉಲ್ಲಂಘನೆಯಾಗಿದೆ.

ಚೀನಾ ಕಂಪನಿಗಳ ಹಕ್ಕುಗಳು ಹಾಗೂ ಹಿತಾಸಕ್ತಿಗಳನ್ನು ನಿರ್ಲಕ್ಷಿಸಲಾಗುತ್ತಿದೆ ಎಂದು ಚೀನಾ ವಿದೇಶಾಂಗ ಸಚಿವಾಲಯ ವಕ್ತಾರ ಝಾವೊ ಲಿಜಿಯಾನ್‌ ಸುದ್ದಿಗಾರರಿಗೆ ತಿಳಿಸಿದ್ದಾರೆ. ಭಾರತ ಸರಕಾರದಿಂದ ಆಗುತ್ತಿರುವ ಈ ತಾರತಮ್ಯ ಧೋರಣೆ ಭವಿಷ್ಯದಲ್ಲಿ ದ್ವಿಪಕ್ಷೀಯ ಸಹಕಾರಕ್ಕೆ ಧಕ್ಕೆ ತರಬಾರದು ಎಂದು ನಾವು ಆಶಿಸುತ್ತೇವೆ ಎಂದು ಲಿಜಿಯಾನ್‌ ಪರೋಕ್ಷ ಎಚ್ಚರಿಕೆ ನೀಡಿದ್ದಾರೆ.

ಇಂಡಿಯನ್‌ ಸೈಬರ್‌ ಅಪರಾಧ ಸಮನ್ವಯತೆ ಕೇಂದ್ರದಿಂದ ಚೀನಾ ಮೂಲದ ಅಲಿಎಕ್ಸ್‌ಪ್ರೆಸ್‌ , ಲಾಲಾಮೂವ್‌ ಸೇರಿದಂತೆ ಹಲವು ಆ್ಯಪ್‌ಗಳು ಕೆಲವು ಮಾಹಿತಿಗಳ ಸೋರಿಕೆಯಲ್ಲಿ ನಿರತವಾಗಿರುವ ಬಗ್ಗೆ ಎಚ್ಚರಿಸಿತ್ತು. ಇದನ್ನು ಆಧರಿಸಿ ಕೇಂದ್ರ ಗೃಹ ಸಚಿವಾಲಯ 43 ಆ್ಯಪ್‌ಗಳ ಕಾರ್ಯನಿರ್ವಹಣೆಯನ್ನು ತ‌ಕ್ಷಣ ನಿಲ್ಲಿಸುವಂತೆ ನ. 24ರಂದು ಆದೇಶ ಹೊರಡಿಸಿದೆ.

ಬಿಡೆನ್ ಅಭಿನಂದಿಸಿದ ಕ್ಸಿ ಜಿನ್‌ಪಿಂಗ್: ಅಮೆರಿಕದ ಅಧ್ಯಕ್ಷರಿಗೆ ಪತ್ರ ಸಂದೇಶ ಕಳುಹಿಸಿದ ಚೀನಾ ಅಧ್ಯಕ್ಷ!

ಕಳೆದ ಜೂನ್‌ನಿಂದ ಇದುವರೆಗೂ ಒಟ್ಟು 220 ಚೀನಾ ಮೂಲದ ಆ್ಯಪ್‌ಗಳನ್ನು ಕೇಂದ್ರ ಸರಕಾರ ಬ್ಲಾಕ್‌ ಮಾಡಿದೆ. ಜೂನ್‌ 29ರಂದು 59 ಮೊಬೈಲ್‌ ಆ್ಯಪ್‌ಗಳು, ಸೆ.2 ರಂದು 118 ಆ್ಯಪ್‌ಗಳನ್ನು ಐಟಿ ಕಾಯಿದೆ ಅಡಿಯಲ್ಲಿ ನಿರ್ಬಂಧಿಸಲಾಗಿದೆ.