ಪರಮಾಣು ಪೂರೈಕೆದಾರರ ಒಕ್ಕೂಟ ಸೇರಲು ಭಾರತಕ್ಕೆ ಚೀನಾ ಅಡ್ಡಗಾಲು: ಅಮೆರಿಕ

[This story originally published in times of India on sept 13, 2018]

ವಾಷಿಂಗ್ಟನ್‌: ಪರಮಾಣು ಪೂರೈಕೆದಾರರ ಒಕ್ಕೂಟಕ್ಕೆ(ಎನ್‌ಎಸ್‌ಜಿ) ಭಾರತವನ್ನು ಸೇರಿಸಲು ಚೀನಾ ತಗಾದೆ ತೆಗೆದಿದೆ ಎಂದು ಅಮೆರಿಕ ತಿಳಿಸಿದೆ.

ಡೊನಾಲ್ಡ್‌ ಟ್ರಂಪ್‌ ಆಡಳಿತದ ಹಿರಿಯ ಅಧಿಕಾರಿಯೊಬ್ಬರು ಈ ವಿಚಾರ ತಿಳಿಸಿದ್ದು, ಅಮೆರಿಕ ಭಾರತಕ್ಕೆ ಸದಸ್ಯತ್ವ ನೀಡುವ ಬೆಂಬಲಕ್ಕೆ ಸಿದ್ಧವಾಗಿಯೇ ಇದೆ. ಆದರೆ ಚೀನಾ ಈ ವಿಚಾರದಲ್ಲಿ ತನ್ನ ಹಠ ಬಿಡುತ್ತಿಲ್ಲ ಎಂದು ಅವರು ಹೇಳಿದ್ದಾರೆ.

48 ಮಂದಿಯ ಪರಮಾಣು ಕ್ಲಬ್‌ನಿಂದ ಪರಮಾಣು ವ್ಯಾಪಾರ, ವ್ಯವಹಾರಗಳನ್ನು ನಿಯಂತ್ರಿಸಲಾಗುತ್ತದೆ. ಪಾಶ್ಚಿಮಾತ್ಯ ದೇಶಗಳ ಸದಸ್ಯರು ಭಾರತವನ್ನು ಒಕ್ಕೂಟಕ್ಕೆ ಸೇರಿಸಲು ಯಾವುದೇ ತಗಾದೆ ತೆಗೆದಿಲ್ಲ. ಆದರೆ ಚೀನಾ ಪರಮಾಣು ಪ್ರಸರಣ-ಮಾಡದಿರುವ ಒಡಂಬಡಿಕೆಗೆ (ಎನ್‌ಪಿಟಿ) ಸದಸ್ಯರು ಸಹಿ ಹಾಕಬೇಕು ಎಂದು ಪಟ್ಟು ಹಿಡಿದಿದ್ದು, ಇದರಿಂದ ಭಾರತವನ್ನು ಒಕ್ಕೂಟದ ಒಳಕ್ಕೆ ಸೇರಿಸಿಕೊಳ್ಳುವುದು ಕಷ್ಟಕರವಾಗಿದೆ ಎಂದು ತಿಳಿದು ಬಂದಿದೆ.

ಈ ಒಕ್ಕೂಟವು ಒಮ್ಮತದ ಅಭಿಪ್ರಾಯದ ಮೇರೆಗೆ ಕಾರ್ಯನಿರ್ವಹಿಸುವುದರಿಂದ ಕಷ್ಟದ ಸ್ಥಿತಿ ತಲುಪಲಾಗಿದೆ. ಭಾರತ ಎನ್‌ಪಿಟಿ ಒಡಂಬಡಿಕೆಗೆ ಸಹಿ ಹಾಕುವುದಿಲ್ಲ ಎಂದಿರುವ ಕಾರಣ ಕಷ್ಟಕರ ವಾತಾವರಣ ನಿರ್ಮಾಣ ವಾಗಿದೆ ಎಂದು ಹೇಳಲಾಗಿದೆ.

ಸೌತ್‌ ಮತ್ತು ಸೆಂಟ್ರಲ್‌ ಏಷ್ಯಾದ ಪ್ರಿನ್ಸಿಪಲ್‌ ಡೆಪ್ಯುಟಿ ಅಸಿಸ್ಟೆಂಟ್‌ ಸೆಕ್ರೆಟರಿ ಅಲೈಸ್‌ ವೆಲ್ಸ್‌ ಈ ಸಂಬಂಧ, ಚೀನಾ ತನ್ನ ಹಠಕ್ಕೆ ಬದ್ಧವಾಗಿ ನಿಂತಿದೆ. ಹಾಗೆಂದು ನಾವು ಭಾರತಕ್ಕೆ ನೀಡುವ ಬೆಂಬಲದಲ್ಲಿ ಯಾವುದೇ ಕೊರತೆ ಮಾಡೆವು. ಎಸ್‌ಟಿ-1 (ಸ್ಟ್ರಾಟಿಜಿಕ್‌ ಟ್ರೇಡ್‌ ಅಥರೈಸೇಷನ್‌) ಅನುಮತಿ ಸಂಬಂಧ ಈಗಾಗಲೇ ಕ್ರಮ ಕೈಗೊಳ್ಳಲಾಗಿದ್ದು, ಒಕ್ಕೂಟಕ್ಕೆ ಭಾರತವನ್ನು ಸೇರಿಸುವುದಕ್ಕೆ ಎಲ್ಲ ಪ್ರಯತ್ನ ಮಾಡಲಾಗುವುದು ಎಂದು ಹೇಳಿದ್ದಾರೆ.