ಅರುಣಾಚಲ, ತೈವಾನ್‌ ಇಲ್ಲದ 30000 ವಿಶ್ವ ಭೂಪಟ ನಾಶ ಮಾಡಿದ ಚೀನಾ!

ಬೀಜಿಂಗ್‌: ಅರುಣಾಚಲ ಮತ್ತು ತೈವಾನ್‌ನ್ನು ಚೀನಾದ ಭಾಗಗಳೆಂದು ಉಲ್ಲೇಖಿಸದ 30000ಕ್ಕೂ ಅಧಿಕ ವಿಶ್ವ ಭೂಪಟಗಳನ್ನು ಅಲ್ಲಿನ ಕಸ್ಟಮ್ಸ್‌ ಅಧಿಕಾರಿಗಳು ನಾಶ ಮಾಡಿದ್ದಾರೆ ಎಂದು ಮಾಧ್ಯಮಗಳು ವರದಿ ಮಾಡಿವೆ.

ಚೀನಾವು ಭಾರತದ ಭಾಗವಾದ ಅರುಣಾಚಲ ಪ್ರದೇಶವನ್ನು ತನ್ನದೆಂದು ವಾದಿಸುತ್ತಿದ್ದು, ಅದನ್ನು ದಕ್ಷಿಣದ ಟಿಬೆಟ್‌ ಎನ್ನುತ್ತಿದೆ. ಭಾರತೀಯ ನಾಯಕರು ಅಲ್ಲಿಗೆ ಭೇಟಿ ನೀಡಿದರೂ ಆಕ್ಷೇಪಿಸುತ್ತಿದೆ. 3,488 ಕಿ.ಮೀ. ಉದ್ದದ ಗಡಿ ವಿವಾದವನ್ನು ಪರಿಹರಿಸಲು 21 ಸುತ್ತಿನ ಮಾತುಕತೆಗಳು ನಡೆದಿದ್ದರೂ ಅಂತಿಮ ತೀರ್ಮಾನಕ್ಕೆ ಬರಲಾಗಿಲ್ಲ. ಬಿಟ್ಟುಹೋಗಿರುವ ತೈವಾನ್‌ ಕೂಡಾ ತನ್ನದೆಂದು ಚೀನಾ ವಾದಿಸುತ್ತದೆ.

ಏನೀ ಭೂಪಟದ ಕತೆ?: ಈ ಭೂಪಟಗಳು ಚೀನಾದಲ್ಲಿ ಸಿದ್ಧವಾಗಿದ್ದು, ಯಾವುದೋ ಒಂದು ದೇಶಕ್ಕೆ ರಫ್ತು ಮಾಡಲಾಗುತ್ತಿತ್ತು. ವಿಮಾನ ನಿಲ್ದಾಣದಲ್ಲಿ ಕಸ್ಟಮ್ಸ್‌ ಅಧಿಕಾರಿಗಳು ಪರೀಕ್ಷಿಸಿದಾಗ ಅದರಲ್ಲ 'ತಪ್ಪು' ಕಂಡುಬಂತೆನ್ನಲಾಗಿದೆ. ಹಾಗಾಗಿ ಕೂಡಲೇ ಉನ್ನತ ಅಧಿಕಾರಿಗಳ ಸಮ್ಮತಿ ಪಡೆದು ನಾಶ ಮಾಡಲಾಯಿತೆನ್ನಲಾಗಿದೆ. ಭೂಪಟದಲ್ಲಿ ತೈವಾನ್‌ನ್ನು ಪ್ರತ್ಯೇಕ ರಾಷ್ಟ್ರವೆಂದು ಉಲ್ಲೇಖಿಸಲಾಗಿತ್ತು.