ಚೀನಾ ವಿಮಾನ ಅಪಘಾತದ ಸ್ಫೋಟಕ ಮಾಹಿತಿ: ಉದ್ದೇಶಪೂರ್ವಕ ಕೃತ್ಯ ಎಂದ ಕಪ್ಪುಪೆಟ್ಟಿಗೆ ಡೇಟಾ!

ವಾಷಿಂಗ್ಟನ್: ಮಾರ್ಚ್ ತಿಂಗಳಲ್ಲಿ ಚೀನಾದ ಪರ್ವತ ಪ್ರದೇಶದಲ್ಲಿ ಅಪಘಾತಕ್ಕೀಡಾದ ಚೀನಾ ಈಸ್ಟರ್ನ್ ಏರ್‌ಲೈನ್ಸ್ ವಿಮಾನದ ಕಪ್ಪು ಪೆಟ್ಟಿಗೆಯಲ್ಲಿ ದೊರೆತ ಹಾರಾಟದ ಕುರಿತಾದ ಡೇಟಾ ಸ್ಫೋಟಕ ಮಾಹಿತಿಯನ್ನು ಹೊರಹಾಕಿದೆ. ಕಾಕ್‌ಪಿಟ್ ಒಳಗಿದ್ದವರಲ್ಲಿಯೇ ಯಾರೋ ಉದ್ದೇಶಪೂರ್ವಕವಾಗಿ ಈ ಅಪಘಾತ ಮಾಡಿದ್ದಾರೆ ಎಂದು ಅಮೆರಿಕ ಅಧಿಕಾರಿಗಳ ಪ್ರಾಥಮಿಕ ತನಿಖೆಯನ್ನು ಉಲ್ಲೇಖಿಸಿ ವಾಲ್ ಸ್ಟ್ರೀಟ್ ಜರ್ನಲ್ ವರದಿ ಮಾಡಿದೆ. ಪ್ರಾಥಮಿಕ ತನಿಖೆಯ ಬಳಿಕ, ವಿಮಾನದಲ್ಲಿ ತಾಂತ್ರಿಕ ದೋಷ ಕಂಡುಬಂದಿದ್ದಕ್ಕೆ ಯಾವುದೇ ಸುಳಿವು ಪತ್ತೆಯಾಗಿಲ್ಲ. ಹೀಗಾಗಿ ಸಿಬ್ಬಂದಿಯ ಚಟುವಟಿಕೆಗಳ ಮೇಲೆ ಗಮನ ಹರಿಸಿರುವುದಾಗಿ ಅಮೆರಿಕ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.
ಚೀನಾದಲ್ಲಿ ಭೀಕರ ವಿಮಾನ ದುರಂತ! 133 ಪ್ರಯಾಣಿಕರಿದ್ದ ವಿಮಾನ ಪತನ, ಪರ್ವತದಲ್ಲಿ ಬೆಂಕಿ

ಈ ಬಗ್ಗೆ ಪ್ರತಿಕ್ರಿಯೆ ನೀಡಲು ವಿಮಾನದ ತಯಾರಿಕಾ ಕಂಪೆನಿ ಬೋಯಿಂಗ್ ಕೋ ನಿರಾಕರಿಸಿದೆ. ಈ ಪ್ರಶ್ನೆಗೆ ಚೀನಾ ವಿಮಾನಯಾನ ನಿಯಂತ್ರಕರು ಉತ್ತರಿಸಬೇಕು ಎಂದು ಹೇಳಿದೆ. ಅಮೆರಿಕದ ರಾಷ್ಟ್ರೀಯ ಸಾರಿಗೆ ಸುರಕ್ಷತಾ ಮಂಡಳಿ (ಎನ್‌ಟಿಎಸ್‌ಬಿ) ತಕ್ಷಣಕ್ಕೆ ಪ್ರತಿಕ್ರಿಯೆ ನೀಡಿಲ್ಲ.

ಚೀನಾದ ಕುನ್ಮಿಂಗ್‌ನಿಂದ ಗುವಾಂಗ್‌ಝೌಗೆ ತೆರಳುತ್ತಿದ್ದ ಬೋಯಿಂಗ್ 737- 800 ಜೆಟ್ ವಿಮಾನವು ಮಾರ್ಚ್ ತಿಂಗಳಲ್ಲಿ ಗುವಾಂಗ್ಸಿ ಪರ್ವತ ಪ್ರದೇಶದಲ್ಲಿ ಅಪಘಾತಕ್ಕೀಡಾಗಿತ್ತು. ಎತ್ತರದಲ್ಲಿ ಸಾಗುತ್ತಿದ್ದ ವಿಮಾನ, ಏಕಾಏಕಿ ಕೆಳಕ್ಕೆ ನುಗ್ಗಿ ಬೆಟ್ಟಕ್ಕೆ ಅಪ್ಪಳಿಸಿದ ಪರಿಣಾಮ ಭೀಕರ ಅಪಘಾತ ಸಂಭವಿಸಿತ್ತು. ವಿಮಾನದಲ್ಲಿದ್ದ ಎಲ್ಲ 123 ಪ್ರಯಾಣಿಕರು ಮತ್ತು 9 ಸಿಬ್ಬಂದಿ ಮೃತಪಟ್ಟಿದ್ದರು. ಕಳೆದ 28 ವರ್ಷಗಳಲ್ಲಿಯೇ ಚೀನಾದಲ್ಲಿ ಸಂಭವಿಸಿದ ಅತ್ಯಂತ ಭಯಾನಕ ಅಪಘಾತ ಇದು ಎಂದು ಹೇಳಲಾಗಿದೆ.
ಚೀನಾ ವಿಮಾನ ಅಪಘಾತ: ಒಂದು ಕಪ್ಪು ಪೆಟ್ಟಿಗೆ ಪತ್ತೆ, ಇನ್ನೂ ಪ್ರಯಾಣಿಕರ ಸುಳಿವಿಲ್ಲ!

ಏಪ್ರಿಲ್ ಮಧ್ಯಭಾಗದಲ್ಲಿ ಚೀನಾ ಈಸ್ಟರ್ನ್ ಏರ್‌ಲೈನ್ಸ್ ತನ್ನ 737- 800 ವಿಮಾನಗಳ ಬಳಕೆಯನ್ನು ಮರು ಆರಂಭಿಸಿತ್ತು. ಕಳೆದ ತಿಂಗಳು ಪ್ರಾಥಮಿಕ ಅಪಘಾತ ವರದಿಯ ಸಾರಾಂಶದಲ್ಲಿ ಚೀನಾ ಅಧಿಕಾರಿಗಳು 737-800 ವಿಮಾನದಲ್ಲಿ ಯಾವುದೇ ತಾಂತ್ರಿಕ ಶಿಫಾರಸುಗಳನ್ನು ಸೂಚಿಸಿರಲಿಲ್ಲ. ಇದು 1997ರಿಂದಲೂ ಬಹಳ ಸುರಕ್ಷಿತ ದಾಖಲೆಗಳೊಂದಿಗೆ ಸೇವೆಯಲ್ಲಿದೆ ಎಂದು ಪರಿಣತರು ತಿಳಿಸಿದ್ದಾರೆ.

ಚೀನೀಯರ ತನಿಖೆಗೆ ನೆರವು ನೀಡಲು ಸಹಾಯ ಮಾಡುವ ಸಲುವಾಗಿ ಎನ್‌ಟಿಎಸ್‌ಬಿ ಮಂಡಳಿಯ ತನಿಖಾಧಿಕಾರಿಗಳು ಮತ್ತು ಬೋಯಿಂಗ್ ಸಿಬ್ಬಂದಿ ಚೀನಾಕ್ಕೆ ತೆರಳಿದ್ದಾರೆ ಎಂದು ಕಳೆದ ವಾರ ಎನ್‌ಟಿಎಸ್‌ಬಿ ಅಧ್ಯಕ್ಷೆ ಜೆನಿಫರ್ ಮೊಮೆಂಡಿ ತಿಳಿಸಿದ್ದರು. ಇದುವರೆಗೂ ನಡೆಸಿದ ತನಿಖೆಯಲ್ಲಿ ಸುರಕ್ಷತೆಗೆ ಸಂಬಂಧಿಸಿದ ಯಾವುದೇ ಸಮಸ್ಯೆ ಪತ್ತೆಯಾಗಿಲ್ಲ. ಹೀಗಾಗಿ ಹಾಲಿ ಇರುವ ವಿಮಾನಗಳಲ್ಲಿ ಯಾವುದೇ ತುರ್ತು ಬದಲಾವಣೆಯ ಕೆಲಸಗಳ ಅಗತ್ಯವಿಲ್ಲ ಎಂದು ಹೇಳಿದ್ದರು.