ಚೀನಾದಿಂದ ಇಡೀ ಜಗತ್ತಿಗೆ ಅಪಾರ ನಷ್ಟ: ನಿಲ್ಲದ ಡೊನಾಲ್ಡ್ ಟ್ರಂಪ್ ಸರಣಿ ವಾಗ್ದಾಳಿ!

ವಾಷಿಂಗ್ಟನ್: ಮಾರಕ ಕೊರೊನಾ ವೈರಸ್ ಕುರಿತು ಯಾವುದೇ ಮುನ್ಸೂಚನೆ ನೀಡದ ಚೀನಾದಿಂದ ಅಮೆರಿಕವೂ ಸೇರಿದಂತೆ ಇಡೀ ಜಗತ್ತಿಗೆ ಅಪಾರ ನಷ್ಟ ಉಂಟಾಗಿದೆ ಎಂದು ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಹೇಳಿದ್ದಾರೆ.

ಶ್ವೇತಭವನದಲ್ಲಿ ಪತ್ರಿಕಾಗೋಷ್ಠಿ ಉದ್ದೇಶಿಸಿ ಮಾತನಾಡಿದ ಡೊನಾಲ್ಡ್ ಟ್ರಂಪ್, ಚೀನಾ ತನ್ನ ಕುಕೃತ್ಯದಿಂದ ಇಡೀ ಜಗತ್ತಿಗೆ ಅಪಾಯವನ್ನು ತಂದೊಡ್ಡಿದೆ ಎಂದು ಹರಿಹಾಯ್ದರು.

ಚೀನಾ ವಿರುದ್ಧ ತಮ್ಮ ಸರಣಿ ವಾಗ್ದಾಳಿಯನ್ನು ಮುಂದುವರೆಸಿರುವ ಡೊನಾಲ್ಡ್ ಟ್ರಂಪ್, ಅಮೆರಿಕದಲ್ಲಿನ ಕೊರೊನಾ ವೈರಸ್ ಬಿಕ್ಕಟ್ಟಿಗೆ ಸಂಪೂರ್ಣವಾಗಿ ಚೀನಾವೇ ಕಾರಣ ಎಂದು ಹೇಳಿದ್ದಾರೆ.

ಚೀನಿ ವೈರಸ್ ಆಗಮನಕ್ಕೂ ಮೊದಲು ಅಮೆರಿಕದ ಸ್ಥಿತಿ ಚೆನ್ನಾಗಿತ್ತು: ಟ್ರಂಪ್ ಅಭಿಮತ!


ಚೀನಾ ಕೊರೊನಾ ವೈರಸ್ ಹಾವಳಿಯ ಸಂಗತಿಯನ್ನು ಮುಚ್ಚಿಟ್ಟಿದ್ದೇಕೆ ಎಂದು ಪ್ರಶ್ನಿಸಿರುವ ಡೊನಾಲ್ಡ್ ಟ್ರಂಪ್, ಇದರ ಹಿಂದಿನ ಹುನ್ನಾರವನ್ನು ಅರಿಯಲು ಬಹಳ ಬುದ್ಧಿವಂತಿಕೆ ಏನು ಬೇಕಿಲ್ಲ ಎಂದು ಮಾರ್ಮಿಕವಾಗಿ ಹೇಳಿದ್ದಾರೆ.

ಕೊರೊನಾ ವೈರಸ್ ಹಾವಳಿ ಹಾಗೂ ವಿವಿಧ ರಾಷ್ಟ್ರಗಳೊಂದಿಗೆ ಗಡಿ ತಕರಾರಿನ ಕಾರಣಕ್ಕೆ ಚೀನಾ ಇಡೀ ವಿಶ್ವದ ಕೆಂಗೆಣ್ಣಿಗೆ ಗುರಿಯಾಗಿದ್ದು, ಮುಂದೆಯೂ ಚೀನಾ ಹಲವು ಕಷ್ಟಗಳನ್ನು ಎದುರಿಸಬೇಕಾಗಿ ಬರಬಹುದು ಎಂದು ಟ್ರಂಪ್ ಹೇಳಿದ್ದಾರೆ.

ಒಪ್ಪಂದದ ಶಾಯಿ ಆರುವ ಮುನ್ನವೇ ವೈರಸ್ ಕಳುಹಿಸಿದ ಚೀನಾ: ಮತ್ತೆ ಗುಡುಗಿದ ಟ್ರಂಪ್!

ಇನ್ನು ಡೊನಾಲ್ಡ್ ಟ್ರಂಪ್ ಅವರ ಈ ಸರಣಿ ವಾಗ್ದಾಳಿಗಳಿಂದ ಹೈರಾಣಾಗಿರುವ ಚೀನಾ, ಪ್ರತಿ ಬಾರಿಯೂ ಟ್ರಂಪ್ ಸುಳ್ಳು ಹೇಳುತ್ತಿದ್ದಾರೆ ಎಂಬ ಒಂದು ಸಾಲಿನ ಪ್ರತಿಕ್ರಿಯೆ ಬಿಟ್ಟರೆ ಇನ್ನೇನೂ ಹೊಸದು ಹೇಳುತ್ತಿಲ್ಲ.