ಡೋಕ್ಲಾಂ ನಮ್ಮದೇ: ಹಠ ಮುಂದುವರಿಸಿದ ಚೀನಾ

ಬೀಜಿಂಗ್: ಭಾರತ ಹಾಗೂ ಚೀನಾದ ಗಡಿ ಭಾಗ ಡೋಕ್ಲಾಂ ಬಗ್ಗೆ ಇರುವ ಗೊಂದಲ ಬಗೆ ಹರಿಯುವಂತೆ ಕಾಣಿಸುತ್ತಿಲ್ಲ. ಉಭಯ ದೇಶಗಳ ಮಾತುಕತೆ ಮೇರೆಗೆ, ಈ ಭಾಗದಲ್ಲಿ ನಿಯೋಜಿಸಿದ್ದ ಸೇನೆಯನ್ನು ಚೀನಾ ವಾಪಸು ಕರೆಯಿಸಿಕೊಂಡಿತ್ತು. ಆದರೆ, ಇದೀಗ ದೊಡ್ಡ ಪ್ರಮಾಣದ ಸೇನೆಯನ್ನು ಚೀನಾ ಚಳಿಗಾದಲ್ಲಿ ನಿಯೋಜಿಸುತ್ತಿದ್ದು, ತನ್ನ ಹಠವನ್ನು ಮುಂದುವರಿಸುತ್ತಿದೆ.

ಈ ಗಡಿ ಭಾಗದ ವಿಷಯವಾಗಿ ಭಾರತ ಹಾಗೂ ಚೀನಾ ನಡುವೆ ಯುದ್ಧ ಭೀತಿಯೇ ಸೃಷ್ಟಿಯಾಗಿತ್ತು. ಸುಮಾರು 73 ದಿನಗಳು ಹಗ್ಗ ಜಗ್ಗಾಟ ನಡೆದು, ನಂತರ ಈಶಾನ್ಯ ಭಾಗದೊಂದಿಗೆ ಭಾರತವನ್ನು ಸೇರಿಸುವ ಭಾಗದಲ್ಲಿ ನಿಯೋಜಿಸಿದ್ದ ಸೇನೆಯನ್ನು ಚೀನಾ ಆಗಸ್ಟ್ 28ರಂದು ಹಿಂಪಡೆದಿತ್ತು. ಈ ಭಾಗದಲ್ಲಿ ನಿರ್ಮಿಸಲು ಉದ್ದೇಶಿಸಿದ್ದ ರಸ್ತೆ ನಿರ್ಮಾಣ ಕಾಮಗಾರಿಯನ್ನು ಸ್ಥಗಿತಗೊಳಿಸಿತ್ತು.

ಆದರೀಗ ಚೀನಾ ಮತ್ತೆ ಈ ಗಡಿ ಪ್ರದೇಶ ಚೀನಾಗೆ ಸೇರಿದ್ದೆಂದು ಹೇಳಿ ಕೊಳ್ಳುತ್ತಿದೆ. ಈ ಪ್ರದೇಶದಲ್ಲಿ ಮತ್ತೆ ದೊಡ್ಡ ಪ್ರಮಾಣದ ಸೇನೆ ನಿಯೋಜನೆಗೆ ಸಂಬಂಧಿಸಿದಂತೆ ಪತ್ರಕರ್ತರು ಕೇಳಿದ ಪ್ರಶ್ನೆಗೆ, ಉತ್ತರಿಸಿದ ಚೀನಾ ರಕ್ಷಣಾ ಸಚಿವಾಲಯದ ವಕ್ತಾರ ಕ.ವೂ. ಖಿಯಾನ್, 'ಡೋಕ್ಲಾಂ ಚೀನಾದ್ದು. ಈ ಕಾರಣದಿಂದ ಇಲ್ಲಿ ಸೇನೆಯನ್ನು ನಿಯೋಜಿಸಿದ್ದೇವೆ,' ಎಂದು ಹೇಳಿದ್ದು, ಭಾರತಕ್ಕೆ ಮತ್ತೆ ತಲೆ ನೋವಾಗಿದೆ.

ಆದರೆ, ನ.17ರಂದು ಭಾರತ ಹಾಗೂ ಚೀನಾ ನಡುವೆ ನಡೆದ 10ನೇ ಸುತ್ತಿನ ಭಾರತ-ಚೀನಾ ಗಡಿ ವ್ಯವಹಾರ ಸಮಾಲೋಚನೆ ಮತ್ತು ಸಮನ್ವಯ ಕಾರ್ಯವಿಧಾನದ ಮಾತುಕತೆಯಲ್ಲಿ ಈ ವಿಷಯ ಪ್ರಸ್ತಾಪವಾದ ಬಗ್ಗೆ ಸ್ಪಷ್ಟ ಮಾಹಿತಿಯಿಲ್ಲ. ಗಡಿ ವಿಷಯಕ್ಕೆ ಸಂಬಂಧಿಸಿದಂತೆ ಉಭಯ ದೇಶಗಳು ವಿಶ್ವಾಸಕ್ಕೆ ತೆಗೆದುಕೊಂಡು, ಕಾರ್ಯನಿರ್ವಹಿಸಲು ನಿರ್ಧರಿಸಿದೆ ಎನ್ನಲಾಗಿತ್ತು.