ಇಸ್ಲಾಮಿಕ್‌ ಬರಹಗಳನ್ನು ರೆಸ್ಟೋರೆಂಟ್‌ನಿಂದ ತೆಗೆದುಹಾಕಲು ಚೀನಾ ಅಧಿಕಾರಿಗಳ ಆದೇಶ

ಬೀಜಿಂಗ್‌: ಚೀನಾ ರಾಜಧಾನಿಯಲ್ಲಿನ ಎಲ್ಲ ಹಲಾಲ್‌ ರೆಸ್ಟೋರೆಂಟ್‌ಗಳು ಮತ್ತು ಆಹಾರ ಮಳಿಗೆಗಳಿಂದ ಅರೇಬಿಕ್‌ ಹಾಗೂ ಇಸ್ಲಾಮಿಕ್‌ ಬರಹಗಳನ್ನು ತೆಗೆದುಹಾಕುವಂತೆ ಸ್ಥಳೀಯ ಆಡಳಿತಾಧಿಕಾರಿಗಳು ಆದೇಶ ಹೊರಡಿಸಿದ್ದಾರೆ. ''ಮಳಿಗೆಗಳ ಮೇಲೆ ಹಾಕಲಾಗಿರುವ ಹೋರ್ಡಿಂಗ್‌ಗಳಲ್ಲಿ ಕೂಡ ಅರೇಬಿಕ್‌ ಭಾಷೆ ಬಳಸಬೇಡಿ. ಸ್ಥಳೀಯ ಚೀನಾ ಸಂಸ್ಕೃತಿಗೆ ಒಗ್ಗಿಕೊಂಡು, ಇಲ್ಲಿನ ಭಾಷೆಯನ್ನು ಹೆಚ್ಚಾಗಿ ಬಳಸಿ ಎಂಬುದಾಗಿ ಅಂಗಡಿ ಮಾಲೀಕರಿಗೆ ಅಧಿಕಾರಿಗಳು ಸೂಚಿಸಿದ್ದಾರೆ,'' ಎಂದು ರ್ಯೂಟರ್ಸ್‌ ವರದಿ ಮಾಡಿದೆ. ಸದ್ಯ ಚೀನಾ ಅಧ್ಯಕ್ಷ ಕ್ಸಿ ಜಿನ್‌ಪಿಂಗ್‌ ಅವರ ಆಡಳಿತದಲ್ಲಿ ವಿದೇಶಿ ಸಂಸ್ಕೃತಿಗಳನ್ನು ಹತ್ತಿಕ್ಕಲು ಹಲವು ಆದೇಶಗಳನ್ನು ಹೊರಡಿಸಲಾಗಿದೆ. ಮಸೀದಿಗಳ ಮೇಲಿನ ಡೋಮ್‌ ಮಾದರಿ ಆಕಾರಗಳನ್ನು ತೆಗೆದುಹಾಕುವುದು, ನೆಲಮಾಳಿಗೆಯಿದ್ದಂಥ ಚರ್ಚ್‌ಗಳನ್ನು ಮುಚ್ಚಿಸುವುದಕ್ಕೆ ಕೂಡ ಅಧಿಕಾರಿಗಳು ಮುಂದಾಗಿದ್ದಾರೆ. ಚೀನಾದಲ್ಲಿ ಒಟ್ಟು 2 ಕೋಟಿ ಮುಸ್ಲಿಂ ಸಮುದಾಯದವರು ವಾಸವಾಗಿದ್ದಾರೆ.