ಹಾಕಾಂಗ್‌ ವಿರುದ್ಧ ವಿವಾದಿತ ಕಾನೂನು ಜಾರಿಗೆ ಮುಂದಾದ ಚೀನಾ

ಬೀಜಿಂಗ್‌: ಸ್ವಾಯತ್ತ ಸರಕಾರಕ್ಕಾಗಿ ಸುದೀರ್ಘ ಹೋರಾಟ ನಡೆಸುತ್ತಿದ್ದ ಹಾಂಕಾಂಗ್‌ನ ಹೋರಾಟಗಾರರಿಗೆ ಚೀನಾ ಸರಕಾರ ಶುಕ್ರವಾರ ಶಾಕ್‌ ನೀಡಿದೆ. ಪ್ರಾಂತ್ಯಕ್ಕಿರುವ ವಿಶೇಷಾಧಿಕಾರ ಮೊಟಕುಗೊಳಿಸುವ ವಿವಾದಿತ ರಾಷ್ಟ್ರೀಯ ಭದ್ರತಾ ಕಾನೂನು ಕರಡನ್ನು ಚೀನಾ ಸರಕಾರ ಶುಕ್ರವಾರ ಮಂಡನೆ ಮಾಡಿದೆ.

ಹಾಂಕಾಂಗ್‌ ಹೊಂದಿದ್ದ ‘ಒಂದು ದೇಶ, ಎರಡು ವ್ಯವಸ್ಥೆ’ ಅಧಿಕಾರವನ್ನು ತೆಗೆದು ಹಾಕಿ ‘ಒಂದು ದೇಶ ಒಂದೇ ವ್ಯವಸ್ಥೆ’ ಜಾರಿ ಮಾಡುವುದು ಹೊಸ ಕಾನೂನಿನ ಉದ್ದೇಶವಾಗಿದೆ.

1997ರ ತನಕ ಬ್ರಿಟಿಷ್‌ ಕಾಲೊನಿಯಾಗಿದ್ದ ಹಾಂಕಾಂಗ್‌, 1997ರ ಜುಲೈ 1 ರಂದು ಚೀನಾಕ್ಕೆ ಸೇರ್ಪಡೆಯಾಗಿತ್ತು. ಇದಕ್ಕೂ ಮೊದಲು ನಡೆದ ಒಪ್ಪಂದದ ಪ್ರಕಾರ ಅಲ್ಲಿನ ಆಡಳಿತಕ್ಕೆ ಕೆಲವೊಂದು ವಿಶೇಷಾಧಿಕಾರ ನೀಡಲಾಗಿತ್ತು. ಆ ವಿಶೇಷಾಧಿಕಾರಗಳು ರಾಷ್ಟ್ರೀಯ ಭದ್ರತೆಗೆ ಧಕ್ಕೆ ತರುತ್ತವೆ ಎಂಬ ನೆಪ ಹೇಳಿ ಚೀನಾ ಸರಕಾರ ಹೊಸ ಕಾನೂನು ಜಾರಿಗೆ ಮುಂದಾಗಿದೆ.

ಕಳೆದ ವರ್ಷ ಹೊಸ ಕಾಯಿದೆಯ ಪ್ರಸ್ತಾಪ ಮಾಡಿದ ಬಳಿಕ ಹಾಂಕಾಂಗ್‌ನಲ್ಲಿ ಬೀದಿಗಿಳಿದಿದ್ದ 5 ಲಕ್ಷಕ್ಕೂ ಅಧಿಕ ಪ್ರಜಾಪ್ರಭುತ್ವ ಪರ ಹೋರಾಟಗಾರರು ಭಾರೀ ಪ್ರತಿಭಟನೆ ನಡೆಸಿದ್ದರು. ಆದರೆ ಇದಕ್ಕೆ ಸೊಪ್ಪು ಹಾಕದ ಚೀನಾ ಇದೀಗ ರಾಷ್ಟ್ರೀಯ ಭದ್ರತಾ ಕಾನೂನನ್ನು ಜಾರಿಗೆ ತರಲು ಹೊರಟಿದೆ.