ಆಫ್ರಿಕನ್ ಜ್ವರ: ಭಾರತದಿಂದ ಹಂದಿಗಳ ಆಮದಿಗೆ ತಡೆ ನೀಡಿದ ಚೀನಾ!

ಬಿಜಿಂಗ್: ಆಫ್ರಿಕನ್ ಹಂದಿ ಜ್ವರ ಹೆಚ್ಚಾಗಿರುವ ಕಾರಣಕ್ಕೆ ಭಾರತದಿಂದ ಹಂದಿಗಳು ಮತ್ತು ಕಾಡು ಹಂದಿಗಳ ಆಮದನ್ನು ಚೀನಾ ನಿಲ್ಲಿಸಿದೆ. ಈ ಕುರಿತು ಚೀನಾದ ಅಧಿಕೃತ ಮಾಧ್ಯಮ ಮಾಹಿತಿ ನೀಡಿದೆ.

ಭಾರತದ ಅಸ್ಸಾಂನಲ್ಲಿ ಆಫ್ರಿಕನ್ ಹಂದಿ ಜ್ವರ ಅಧಿಕವಾಗಿದ್ದು, ಸಾವಿರಾರು ಸಂಖ್ಯೆಯಲ್ಲಿ ಹಂದಿಗಳು ಸಾವನ್ನಪ್ಪಿವೆ. ಇದೇ ಕಾರಣಕ್ಕೆ ಭಾರತಿಂದ ಹಂದಿ ಮತ್ತು ಕಾಡು ಹಂದಿಗಳ ಆಮದನ್ನು ತಾತ್ಕಾಲಿಕವಾಗಿ ನಿಲ್ಲಿಸುವುದಾಗಿ ಚೀನಾ ಹೇಳಿದೆ.

ಈ ಕುರಿತು ಮಾಹಿತಿ ನೀಡಿರುವ ಚೀನಾದ ಕೃಷಿ ಮತ್ತು ಗ್ರಾಮೀಣ ವ್ಯವಹಾರಗಳ ಸಚಿವಾಲಯ, ಭಾರತದಲ್ಲಿ ಆಫ್ರಿಕನ್ ಹಂದಿ ಜ್ವರ ಕ್ಷೀಣಿಸುವವರೆಗೂ ಹಂದಿ ಮತ್ತು ಕಾಡು ಹಂದಿಗಳ ಆಮದಿನ ಮೇಲೆ ತಡೆ ನೀಡಲಾಗಿದೆ ಎಂದು ಸ್ಪಷ್ಟಪಡಿಸಿದೆ.

ಕೊರೊನಾ ನಡುವಲ್ಲೇ ಮತ್ತೊಂದು ಕಂಟಕ..! ಅಸ್ಸಾಂ ಹಂದಿಗಳಿಗೆ ಆಫ್ರಿಕನ್‌ ಜ್ವರ

ಆಫ್ರಿಕನ್ ಹಂದಿ ಜ್ವರಕ್ಕೆ ತುತ್ತಾಗಿ ಅಸ್ಸಾಂನ ಕಾಜಿರಂಗ ರಾಷ್ಟ್ರೀಯ ಉದ್ಯಾನವನದಲ್ಲಿ ಸುಮಾರು 14 ಸಾವಿರ ಹಂದಿಗಳು ಸಾವನ್ನಪ್ಪಿರುವುದನ್ನು ಇಲ್ಲಿ ಸ್ಮರಿಸಬಹುದು.

ಭಾರತದೊಂದಿಗಿನ ಗಡಿ ಸಮಸ್ಯೆ ನಡುವೆಯೇ ಭಾರತದಿಂದ ಹಂದಿ ಮತ್ತು ಕಾಡು ಹಂದಿಗಳ ಆಮದನ್ನು ಚೀನಾ ನಿಲ್ಲಿಸಿದ್ದು, ಇದು ತಾತ್ಕಾಲಿಕ ಕ್ರಮ ಎಂದೂ ಸ್ಪಷ್ಟಪಡಿಸಿದೆ. ಚೀನಾ ವಿಶ್ವದ ಅತಿದೊಡ್ಡ ಹಂದಿಮಾಂಸ ಗ್ರಾಹಕ ದೇಶವಾಗಿದೆ ಎಂಬುದು ಗಮನಾರ್ಹ.