ಭಾರತೀಯ ಉತ್ಪನ್ನಗಳ ಮೇಲಿನ ಆಮದು ಸುಂಕ ಕಡಿತಗೊಳಿಸಿದ ಚೀನಾ

ಬೀಜಿಂಗ್‌: ಜುಲೈ 1ರಿಂದ ಅನ್ವಯವಾಗುವಂತೆ ಸೋಯಾಬೀನ್‌ ಸೇರಿದಂತೆ ಭಾರತದ ಅನೇಕ ಉತ್ಪನ್ನಗಳ ಮೇಲಿನ ಆಮದು ಸುಂಕವನ್ನು ಚೀನಾ ಕಡಿತಗೊಳಿಸಿದೆ.

ಚೀನಾ ಸಂಸತ್‌ನ ವಿದೇಶಾಂಗ ಮಂಡಳಿ ಘೋಷಣೆಯಂತೆ ಭಾರತ, ದಕ್ಷಿಣ ಕೊರಿಯಾ, ಬಾಂಗ್ಲಾದೇಶ, ಲಾವೋಸ್‌ ಮತ್ತು ಶ್ರೀಲಂಕಾದಿಂದ ಅಮದಾಗುವ ಸೋಯಾಬೀನ್‌ ಮೇಲೆ ಸದ್ಯ ಇರುವ ಶೇ.3 ಅಮದು ಸುಂಕವನ್ನು ಸಂಪೂರ್ಣವಾಗಿ ತೆಗೆದುಹಾಕಲಾಗಿದೆ. ಹಾಗೆಯೇ ರಾಸಾಯನಿಕಗಳು, ಕೃಷಿ ಉತ್ಪನ್ನಗಳು, ವೈದ್ಯಕೀಯ ಸರಬರಾಜು, ಬಟ್ಟೆ, ಉಕ್ಕು ಮತ್ತು ಅಲ್ಯೂಮಿನಿಯಂ ಸೇರಿದಂತೆ ಈ ನಿರ್ದಿಷ್ಟ ದೇಶಗಳಿಂದ ಆಮದು ಮಾಡಲಾದ ಉತ್ಪನ್ನಗಳ ಮೇಲಿನ ಆಮದು ಸುಂಕವನ್ನು ಕಡಿತ ಮಾಡಲಾಗಿದೆ.

ಈ ಐದು ದೇಶಗಳಿಂದ ಆಮದು ಮಾಡಿಕೊಳ್ಳುವ ಉತ್ಪನ್ನಗಳಿಗೆ ಏಷ್ಯಾ-ಪೆಸಿಫಿಕ್‌ ವಾಣಿಜ್ಯ ಒಪ್ಪಂದದ ಎರಡನೇ ತಿದ್ದುಪಡಿ ಅನ್ವಯ ಆಮದು ಸುಂಕದ ಹೊಸ ದರ ನಿಗದಿಪಡಿಸಲಾಗಿದೆ ಎಂದು ಚೀನಾ ಸರಕಾರಿ ಮಾಧ್ಯಮ 'ಚೀನಾ ಡೈಲಿ' ವರದಿ ಮಾಡಿದೆ.

ಏಪ್ರಿಲ್‌ನಲ್ಲಿ ನಡೆದ ಭಾರತ-ಚೀನಾ ವ್ಯೂಹಾತ್ಮಕ ಮಾತುಕತೆಯ ಸಂದರ್ಭದಲ್ಲಿ ನೀತಿ ಆಯೋಗದ ಉಪಾಧ್ಯಕ್ಷ ರಾಜೀವ್‌ ಕುಮಾರ್‌ ಅವರು ಭಾರತದಿಂದ ಚೀನಾಕ್ಕೆ ಸೋಯಾಬೀನ್‌ ಮತ್ತು ಸಕ್ಕರೆ ರಫ್ತು ಮಾಡುವ ಪ್ರಸ್ತಾಪವನ್ನು ಇಟ್ಟಿದ್ದರು. ಪ್ರಧಾನಿ ನರೇಂದ್ರ ಮೋದಿ ಮತ್ತು ಚೀನಾ ಅಧ್ಯಕ್ಷ ಕ್ಸಿ ಜಿನ್‌ಪಿಂಗ್‌ ನಡುವಿನ ವೂಹಾನ್‌ ಅನೌಪಚಾರಿಕ ಶೃಂಗಸಭೆಯಲ್ಲಿಯೂ ಭಾರತದಿಂದ ಅಕ್ಕಿ, ಸಕ್ಕರೆ, ಔಷಧೀಯ ಉತ್ಪನ್ನಗಳು ವಿಶೇಷವಾಗಿ ಕ್ಯಾನ್ಸರ್‌ ಗುಣಪಡಿಸುವ ಔಷಧಗಳನ್ನು ಚೀನಾಕ್ಕೆ ರಫ್ತುಪಡಿಸಲು ಉಭಯ ನಾಯಕರ ನಡುವೆ ಒಪ್ಪಂದ ಏರ್ಪಟ್ಟಿತ್ತು.