ಉಗ್ರ ಅಜರ್‌ಗೆ ರಕ್ಷಣೆ ವಿಸ್ತರಿಸಿದ ಚೀನಾ

ಬೀಜಿಂಗ್‌: ನೆರೆಯ ಚೀನಾ ನಂಬಿಕೆಗೆ ಅರ್ಹ ರಾಷ್ಟ್ರವಲ್ಲ ಎಂಬುದು ಮತ್ತೊಮ್ಮೆ ದೃಢಪಟ್ಟಿದೆ. ಜೈಷೆ ಮೊಹಮದ್‌ ಉಗ್ರ ಅಜರ್‌ ಮಸೂದ್‌ ರಕ್ಷಣೆಯನ್ನು ಚೀನಾ ಮುಂದುವರಿಸಿದೆ.

ಮಸೂದ್‌ನನ್ನು ಅಂತಾರಾಷ್ಟ್ರೀಯ ಭಯೋತ್ಪಾದಕ ಎಂದು ಘೋಷಿಸಿ, ಆತನ ಚಲನವಲನವನ್ನು ನಿರ್ಬಂಧಿಸಬೇಕು ಎಂದು ವಿಶ್ವಸಂಸ್ಥೆ ಭದ್ರತಾ ಮಂಡಳಿಯಲ್ಲಿ ಭಾರತ ಮಂಡಿಸಿರುವ ನಿರ್ಣಯದ ವಿರುದ್ಧ ಚೀನಾ ಚಲಾಯಿಸಿರುವ ವಿಟೊ ಅವಧಿಯನ್ನು ವಿಸ್ತರಿಸಲಾಗಿದೆ ಎಂದು ಚೀನಾದ ವಿದೇಶಾಂಗ ವಕ್ತಾರ ಗೆಂಜ್‌ ಶುವಾಂಗ್‌ ಹೇಳಿದ್ದಾರೆ.

ಚೀನಾದ ಆಕ್ಷೇಪದ ಅವಧಿ ಸೋಮವಾರಕ್ಕೆ ಮುಗಿಯುತ್ತಿದ್ದು, ಅದನ್ನು ಮತ್ತೆ ಆರು ತಿಂಗಳ ಕಾಲ ವಿಸ್ತರಿಸಲಾಗಿದೆ. ಭಾರತದ ವಾದದ ಕುರಿತಂತೆ ಹಲವು ಆಕ್ಷೇಪಗಳಿವೆ. ಈ ಕುರಿತು ಇನ್ನಷ್ಟು ಚರ್ಚೆ, ಸಮಾಲೋಚನೆ ಅಗತ್ಯ ಇರುವುದರಿಂದ ನಿರ್ಣಯದ ವಿರುದ್ಧದ ವಿಟೊವನ್ನು ವಿಸ್ತರಿಸಲಾಗಿದೆ ಎಂದು ಶುವಾಂಗ್‌ ತಿಳಿಸಿದ್ದಾರೆ.

ಸುಳ್ಳಾದ ನಿರೀಕ್ಷೆ

ಅಜರ್‌ ಮಸೂದ್‌ ಮತ್ತು ಆತನ ಉಗ್ರರ ಪಡೆ ನಡೆಸುತ್ತಿರುವ ದಾಂಧಲೆ, ಅದನ್ನು ಬೆಳೆಯಲು ಬಿಟ್ಟರೆ ನಾಗರಿಕ ಸಮಾಜಕ್ಕೆ ಆಗುವ ಅನಾಹುತದ ಕುರಿತಂತೆ ಚೀನಾದ ಜತೆ ಭಾರತ ಹಲವು ಸುತ್ತಿನ ಚರ್ಚೆ ನಡೆಸಿದೆ. ವಿದೇಶಾಂಗ ಸಚಿವೆ ಸುಷ್ಮಾ ಸ್ವರಾಜ್‌ ಕೂಡ, ಚೀನಾದ ವಿದೇಶಾಂಗ ಸಚಿವರ ಜತೆಗಿನ ಚರ್ಚೆಯಲ್ಲಿ ಈ ವಿಷಯವನ್ನು ಮನವರಿಕೆ ಮಾಡಿಕೊಟ್ಟಿದ್ದರು. ಈ ಹಿನ್ನೆಲೆಯಲ್ಲಿ ಭಾರತದ ನಿರ್ಣಯಕ್ಕೆ ಚೀನಾ ಆಕ್ಷೇಪ ಮುಂದುವರಿಸದು ಎಂಬ ನಿರೀಕ್ಷೆ ಇತ್ತು. ಒಂದೊಮ್ಮೆ ಚೀನಾ ತನ್ನ ಆಕ್ಷೇಪವನ್ನು ಮುಂದುವರಿಸದಿದ್ದರೆ ಅಜರ್‌ ವಿರುದ್ಧದ ನಿಷೇಧ ತನ್ನಿಂದತಾನೇ ಚಾಲ್ತಿಗೆ ಬರುತ್ತಿತ್ತು. ಆದರೆ, ಚೀನಾ ತಾನು ಭಾರತದ ಪಾಲಿಗೆ ಯಾವತ್ತಿಗೂ ನಂಬಿಕೆಗೆ ಅರ್ಹವಾದ ದೇಶವಲ್ಲ ಎಂಬುದನ್ನು ಕೃತಿ ಮೂಲಕ ತೋರಿಸಿದೆ.