ಅಮೆರಿಕ ಕಂಪನಿ ಜತೆಗಿನ ರಕ್ಷಣಾ ಒಪ್ಪಂದ ರದ್ದುಪಡಿಸಿದ ಚೀನಾ, ಮುಂದುವರಿದ ಶೀತಲ ಸಮರ!

ಬೀಜಿಂಗ್‌: ಅಮೆರಿಕದ ಹೆಸರಾಂತ ಕ್ಷಿಪಣಿ ಮತ್ತು ಯುದ್ಧ ವಿಮಾನ ತಯಾರಿಕಾ ಕಂಪನಿ ಲಾಕ್‌ಹೀಡ್‌ ಮಾರ್ಟಿನ್‌ ವಿರುದ್ಧ ಚೀನಾ ಸರಕಾರ ಮಂಗಳವಾರ ನಿರ್ಬಂಧ ಹೇರಿ ಆದೇಶ ಹೊರಡಿಸಿದೆ. ಕಂಪನಿಯ ಪಿಎಸಿ-3 ಕ್ಷಿಪಣಿ ಒಪ್ಪಂದ ಪರಿಷ್ಕರಣೆಗೆ ತೈವಾನ್‌ ಸಲ್ಲಿಸಿದ್ದ ಮನವಿಗೆ ಅಮೆರಿಕದ ಗೃಹ ಸಚಿವಾಲಯ ಒಪ್ಪಿಗೆ ಸೂಚಿಸಿದ ಬೆನ್ನಿಗೆ ಚೀನಾ ತಿರುಗೇಟಾಗಿ ಈ ಕ್ರಮ ಕೈಗೊಂಡಿದೆ.

ತೈವಾನ್‌ ವಿರುದ್ಧ ಹಗೆ ಸಾಧಿಸುತ್ತಿರುವ ಚೀನಾ ಈ ಬಗ್ಗೆ ಪ್ರತಿಕ್ರಿಯಿಸಿದ್ದು, ''ತೈವಾನ್‌ಗೆ ಅಮೆರಿದ ಶಸ್ತ್ರಾಸ್ತ್ರಗಳ ಮಾರಾಟವನ್ನು ಚೀನಾ ಸರಕಾರ ವಿರೋಧಿಸುತ್ತದೆ. ಒನ್‌ ಚೀನಾ ಸಿದ್ಧಂತಕ್ಕೆ ಬದ್ಧವಾಗಿ ಅಮೆರಿಕ ಈ ಕೂಡಲೇ ತೈವಾನ್‌ ಜತೆಗಿನ ಮಿಲಿಟರಿ ಒಪ್ಪಂದಗಳನ್ನು ರದ್ದುಗೊಳಿಸಬೇಕು. ಇಲ್ಲವಾದರೆ ಚೀನಾ -ಅಮೆರಿಕ ದ್ವಿಪಕ್ಷೀಯ ಸಂಬಂಧಕ್ಕೆ ಧಕ್ಕೆಯಾಗಲಿದೆ.

ತೈವಾನ್‌ನಲ್ಲಿನ ಕಾನೂನು ಸುವ್ಯವಸ್ಥೆ, ಶಾಂತಿ ಭಂಗಗೊಳ್ಳಬಹುದು. ಹಾಗಾಗಿ ಲಾಕ್‌ಹೀಡ್‌ ಮಾರ್ಟಿನ್‌ ಕಂಪನಿ ಮೇಲೆ ನಾವು ನಿರ್ಬಂಧ ಹೇರುತ್ತಿದ್ದೇವೆ,'' ಎಂದು ಚೀನಾ ವಿದೇಶಾಂಗ ಸಚಿವಾಲಯ ವಕ್ತಾರ ಝಾವೊ ಲಿಜಿಯಾನ್‌ ತಿಳಿಸಿದ್ದಾರೆ. ಚೀನಾ-ಅಮೆರಿಕ ನಡುವಿನ ತಿಕ್ಕಾಟದಲ್ಲಿ ಲಾಕ್‌ಹೀಡ್‌ಗೆ ನಿರ್ಬಂಧವನ್ನು ಹೊಸ ತಿರುವು ಎಂದು ವಿಶ್ಲೇಷಿಸಲಾಗುತ್ತಿದೆ.

ಇಸ್ರೇಲ್‌ನಿಂದ ಶೀಘ್ರದಲ್ಲೇ ಭಾರತಕ್ಕೆ ಬರಲಿದೆ ಅತ್ಯಾಧುನಿಕ ಶಸ್ತ್ರಾಸ್ತ್ರ, ಚೀನಾಗೆ ಠಕ್ಕರ್ ನೀಡಲು ಸಜ್ಜು!‌

ಕಳೆದ ಕೆಲವು ತಿಂಗಳಿನಿಂದ ಚೀನಾ ಹಾಗೂ ಅಮೆರಿಕದ ಸಂಬಂಧ ಹಳಸಿದೆ ಎಂದರು ತಪ್ಪಾಗಲ್ಲ. ಚೀನಾ ಏಟಿಗೆ ಅಮೆರಿಕ ಎದುರೇಟು ನೀಡುತ್ತಲೆ ಇದೆ. ಭಾರತದ ವಿಚಾರದಲ್ಲೂ ಅಮೆರಿಕ, ಡ್ರ್ಯಾಗನ್‌ ದೇಶದ ವಿರುದ್ಧ ತಿರುಗಿಬಿದ್ದಿತ್ತು.