ಕೊರೊನಾ ವೈರಸ್‌ನ ಕೇಂದ್ರ ಭಾಗವಾಗಿದ್ದ ವುಹಾನ್‌ನಲ್ಲಿ ಸೋಂಕಿನಿಂದ ಸಾವಿಗೀಡಾದವರ ಸಂಖ್ಯೆ ಶೇ. 50 ರಷ್ಟು ಹೆಚ್ಚಾಗಿದೆ. ಇಲ್ಲಿ 1,290 ಜನರು ಸಾವಿಗೀಡಾಗಿರುವುದು ತಡವಾಗಿ ವರದಿಯಾಗಿದೆ. 'ಸಾವಿನ ಸಂಖ್ಯೆಯನ್ನು ಪರಿಷ್ಕರಿಸಲಾಗಿದೆ, ಇವೆಲ್ಲಾ ಆಸ್ಪತ್ರೆ ಹೊರಗೆ ನಡೆದ ಸಾವುಗಳು' ಎಂಬುದಾಗಿ ವುಹಾನ್‌ ಅಧಿಕಾರಿಗಳು ತೇಪೆ ಹಚ್ಚಿದ್ದಾರೆ. ಜೊತೆಗೆ 'ನಾವೇನನ್ನೂ ಮುಚ್ಚಿಡುತ್ತಿಲ್ಲ' ಎಂಬುದಾಗಿ ಚೀನಾ ಸಮಜಾಯಿಷಿ ನೀಡಿದೆ.
ಸಾವಿನ ಸಂಖ್ಯೆ 4,636ಕ್ಕೆ ಏರಿಕೆ
ಈ ಪರಿಷ್ಕೃತ ಅಂಕಿ ಅಂಶಗಳಿಂದ ವುಹಾನ್‌ನಲ್ಲಿ ಸೋಂಕಿನಿಂದ ಸಾವಿಗೀಡಾದವರ ಸಂಖ್ಯೆ 3,869ಕ್ಕೆ ಏರಿಕೆಯಾಗಿದ್ದರೆ, ದೇಶದಲ್ಲಿ ಇಲ್ಲಿಯವರೆಗೆ ಅಸುನೀಗಿದವರ ಸಂಖ್ಯೆ ಬರೋಬ್ಬರಿ 4,636ಕ್ಕೆ ಹೆಚ್ಚಳವಾಗಿದೆ.
ಜೊತೆಗೆ ದೇಶದಲ್ಲಿನ ಕೋವಿಡ್‌-19 ಸೋಂಕಿತರ ಸಂಖ್ಯೆ 83,756ಕ್ಕೆ ಏರಿಕೆಯಾಗಿದೆ. ಸದ್ಯ ಚೀನ ಅತೀ ಹೆಚ್ಚಿನ ಕೊರೊನಾ ಪ್ರಕರಣ ದಾಖಲಾದ ರಾಷ್ಟ್ರಗಳ ಪೈಕಿ 7ನೇ ಸ್ಥಾನದಲ್ಲಿದೆ.
ಚೀನಾಗೆ ಅಪ್ಪಳಿಸಲಿದೆ ಎರಡನೇ ಸುತ್ತಿನ ಕೊರೊನಾ: ಇನ್ನು ಏನು ಕಾದಿದೆಯೋ?
ಚೀನಾ ಹೇಳುವುದೇನು?
ಹಲವು ಮೂಲಗಳ ಮೂಲಕ ಮಾಹಿತಿ ಪಡೆದು ಈ ದಾಖಲೆಗಳನ್ನು ಪರಿಷ್ಕರಿಸಲಾಗಿದೆ ಎಂಬುದಾಗಿ ಚೀನಾ ಹೇಳಿದೆ. ಅಂತ್ಯ ಸಂಸ್ಕಾರ ಕೇಂದ್ರಗಳು, ಜೈಲುಗಳಿಂದ ಸೋಂಕಿಗೆ ಸಾವಿಗೀಡಾಗಿರುವವರ ಹೊಸ ವರದಿಗಳು ಸಿಕ್ಕಿವೆ ಎಂಬುದಾಗಿ ವುಹಾನ್‌ ಅಧಿಕಾರಿಗಳು ಶುಕ್ರವಾರ ಪ್ರಕಟಿಸಿದ್ದಾರೆ. ಜೊತೆಗೆ ಮನೆಯಲ್ಲಿ ಸಾವಿಗೀಡಾವರ ಸಂಖ್ಯೆಯನ್ನು ಈ ಹಿಂದೆ ಲೆಕ್ಕಕ್ಕೆ ತೆಗೆದುಕೊಂಡಿರಲಿಲ್ಲ ಎಂದು ಹೇಳಲಾಗಿದೆ.
ಕೆಲವೊಮ್ಮೆ ಒಂದೇ ಪ್ರಕರಣಗಳನ್ನು ಎರಡೆರಡು ಬಾರಿ ಲೆಕ್ಕ ಹಾಕಲಾಗಿತ್ತು. ಕೆಲವು ಪ್ರಕರಣಗಳನ್ನು ಗಣನೆಗೇ ತೆಗೆದುಕೊಂಡಿರಲಿಲ್ಲ. ಆರಂಭದಲ್ಲಿ ಪರೀಕ್ಷಾ ಕಿಟ್‌ಗಳ ಅಭಾವದಿಂದ ಕೆಲವು ಪ್ರಕರಣಗಳನ್ನು ಪರೀಕ್ಷೆ ನಡೆಸಲು ಸಾಧ್ಯವಾಗಿರಲಿಲ್ಲ. ಹೀಗಾಗಿ ಅಂಕಿ ಅಂಶಗಳೀಗ ಬದಲಾಗಿವೆ ಎಂಬುದಾಗಿ ಅಧಿಕಾರಿಗಳು ಸುದೀರ್ಘ ಸಮಜಾಯಿಷಿ ನೀಡಿದ್ದಾರೆ.
ಜಗತ್ತಿಗೆ ಕೊರೊನಾ ಚಿಂತೆ..! ಚೀನಾದಿಂದ ಅಣು ಪರೀಕ್ಷೆಗೆ ಸಿದ್ಧತೆ: ಅಮೆರಿಕ ಆರೋಪ
ಚೀನಾದ ಮೇಲೇಕೆ ಅನುಮಾನ?
ಚೀನಾದಲ್ಲಿ ಡಿಸೆಂಬರ್‌ನಲ್ಲೇ ವೈರಸ್‌ ಕಾಣಿಸಿಕೊಂಡಿದ್ದರೂ ವಿಶ್ವ ಸಂಸ್ಥೆಯ ಅಧೀನ ಸಂಸ್ಥೆ ವಿಶ್ವ ಆರೋಗ್ಯ ಸಂಸ್ಥೆಗೆ ಸ್ಥಳಕ್ಕೆ ಭೇಟಿ ನೀಡಲು ಅಲ್ಲಿನ ಅಧಿಕಾರಿಗಳು ಅವಕಾಶ ನೀಡರಲಿಲ್ಲ.
ಆರಂಭದಲ್ಲಿ ಪರಿಣಾಮಕಾರಿ ಕ್ರಮಗಳನ್ನೂ ತೆಗೆದುಕೊಂಡಿರಲಿಲ್ಲ ಎಂಬುದಾಗಿ ವುಹಾನ್‌ ಮೇಯರ್‌ ತಪ್ಪೊಪ್ಪಿಕೊಂಡಿದ್ದರು. ವೈದ್ಯರೊಬ್ಬರು ಹೊಸ ವೈರಸ್‌ ಬಗ್ಗೆ ಸಹೋದ್ಯೋಗಿಗಳನ್ನು ಎಚ್ಚರಿಸಿದಾಗಲೂ ಯಾರೂ ಆ ಬಗ್ಗೆ ತಲೆ ಕೆಡಿಸಿಕೊಂಡಿರಲಿಲ್ಲ. ಕೊನೆಗೆ ಡಾ. ಲಿ ವೆನ್ಲಿಯಾಂಗ್‌ ಅದೇ ವೈರಸ್‌ನಿಂದ ಅಸುನೀಗಿದರು.
ಹೊಸ ವೈರಸ್‌ ಕಾಣಿಸಿಕೊಂಡಿದೆ ಎಂಬುದಾಗಿ ಚೀನಾ ಡಬ್ಲ್ಯೂಎಚ್‌ಒಗೆ ಮಾಹಿತಿ ನೀಡಿದ್ದು ಡಿಸೆಂಬರ್‌ 31 ರಂದು. ಕೊನೆಗೆ ಆರೋಗ್ಯ ಸಂಸ್ಥೆ ಅಧಿಕಾರಿಗಳಿಗೆ ಸ್ಥಳಕ್ಕೆ ಭೇಟಿ ನೀಡಲು ಸಾಧ್ಯವಾಗಿದ್ದು ಬರೋಬ್ಬರಿ ಒಂದೂವರೆ ತಿಂಗಳ ನಂತರ, ಅಂದರೆ ಫೆ. 10 ರಂದು. ಅದಾಗಲೇ ಚೀನಾದಲ್ಲಿ 40,000 ಕ್ಕೂ ಹೆಚ್ಚಿನ ಪ್ರಕರಣಗಳು ವರದಿಯಾಗಿದ್ದವು.
ಟ್ರಂಪ್ ಆರೋಪ, ಅಂತಾರಾಷ್ಟ್ರೀಯ ಒತ್ತಡ
ಚೀನಾದ ಈ ಕ್ರಮದ ಬಗ್ಗೆ ಅಮೆರಿಕಾ ಅಧ್ಯಕ್ಷ ಡೊನಾಲ್ಡ್‌ ಟ್ರಂಪ್ ಆರಂಭದಿಂದಲೂ ಅಸಮಧಾನ ವ್ಯಕ್ತಪಡಿಸುತ್ತಲೇ ಬಂದಿದ್ದರು. ಚೀನಾ ಸತ್ಯ ಮುಚ್ಚಿಟ್ಟಿದೆ ಎಂಬುದಾಗಿ ಹಲವಾರು ಬಾರಿ ಟ್ರಂಪ್ ಕಿಡಿಕಾರಿದ್ದರು. ನಿಜವಾಗಿಯೂ ಚೀನಾದಲ್ಲಿ ವೈರಾಣು ದಾಳಿಗೆ ಅಸುನೀಗಿದವರೆಷ್ಟು ಎಂಬ ಪ್ರಶ್ನೆ ಜಾಗತಿಕ ಮಟ್ಟದಲ್ಲಿಯೂ ಕೇಳಿ ಬಂದಿತ್ತು. ಈ ಸಂದರ್ಭದಲ್ಲೇ ಅಂಕಿ ಅಂಶಗಳನ್ನು ಬದಲಾಯಿಸಿರುವುದು ಚೀನಾದ ಮೇಲಿನ ಅನುಮಾನಗಳು ಮತ್ತಷ್ಟು ಗಟ್ಟಿಯಾಗುವಂತೆ ಮಾಡಿವೆ.