ತೈವಾನ್ ಮರು ವಿಲೀನ ವಿರೋಧಿಸಿದರೆ ಕೊನೆಯ ವರೆಗೂ ಸಮರ: ಅಮೆರಿಕಕ್ಕೆ ಚೀನಾ ಎಚ್ಚರಿಕೆ

ಬೀಜಿಂಗ್‌: ಏಷ್ಯಾದಲ್ಲಿ ಅಮೆರಿಕದ ಮಿಲಿಟರಿ ಉಪಸ್ಥಿತಿ ವಿರುದ್ಧ ಹರಿಹಾಯ್ದಿರುವ ಚೀನಾ, ಮುಖ್ಯಭೂಮಿ ಜತೆ ತೈವಾನ್ ಮರು ವಿಲೀನ ವಿಚಾರದಲ್ಲಿ ಯಾರೇ ಹಸ್ತಕ್ಷೇಪ ನಡೆಸಿದರೂ ಕೊನೆಯವರೆಗೂ ಹೋರಾಡುವುದಾಗಿ ಎಚ್ಚರಿಕೆ ನೀಡಿದೆ.

ಬೀಜಿಂಗ್ ಮತ್ತು ತೈಪೈ ಅನ್ನು ಬೇರ್ಪಡಿಸಲು ಯತ್ನಿಸುವವರ ವಿರುದ್ಧ 'ಕೊನೆಯ ವರೆಗೂ ಯುದ್ಧ ಮಾಡುವುದಾಗಿ' ಚೀನಾ ರಕ್ಷಣಾ ಸಚಿವ ವೈ-ಫೆಂಘೆ ಎಚ್ಚರಿಸಿದ್ದಾರೆ.

ಸಿಂಗಾಪುರದಲ್ಲಿ ನಡೆಯುತ್ತಿರುವ ಶಾಂಘ್ರಿ-ಲಾ ಸಂವಾದದಲ್ಲಿ ಮಾತನಾಡಿದ ಅವರು, ಈ ಎಚ್ಚರಿಕೆ ನೀಡಿದರು.

ಅಮೆರಿಕದ ಜತೆ ಈಗಾಗಲೇ ವ್ಯಾಪಾರ ಸಮರ ನಡೆಸುತ್ತಿರುವ ಚೀನಾ, ದಕ್ಷಿಣ ಚೀನಾ ಸಮುದ್ರದಲ್ಲಿ ಅಮೆರಿಕದ ಯುದ್ಧನೌಕೆಗಳ ಚಲನವಲನವನ್ನೂ ವಿರೋಧಿಸುತ್ತಿದೆ. ಚೀನಾ ಮತ್ತು ತೈವಾನ್‌ ನಡುವಣ ತೈವಾನ್‌ ಜಲಸಂಧಿಯಲ್ಲಿ ಅಮೆರಿಕ ನೌಕಾಪಡೆ ಹಡುಗುಗಳು ಗಸ್ತು ತಿರುಗುತ್ತಿದ್ದುದನ್ನು ಪ್ರಸ್ತಾಪಿಸಿದ ವೈ ಫೆಂಘೆ, ಚೀನಾವನ್ನು ಹತ್ತಿಕ್ಕಲು ಅಮೆರಿಕಕ್ಕೆ ಸಾಧ್ಯವಿಲ್ಲ ಎಂದು ಸಾರಿದರು.

'ಚೀನಾವನ್ನು ಪಡೆಯುವ ಯಾವುದೇ ಯತ್ನ ಯಶಸ್ವಿಯಾಗದು. ತೈವಾನ್ ವಿಚಾರದಲ್ಲಿ ಹಸ್ತಕ್ಷೇಪ ನಡಸುವ ಯಾವುದೇ ಪ್ರಯತ್ನ ವಿಫಲವಾಗುತ್ತದೆ' ಎಂದು ಅವರು ತಿಳಿಸಿದರು. ಸಂವಾದದಲ್ಲಿ ಚೀನಾದ ಪೀಪಲ್ಸ್ ಲಿಬರೇಶನ್ ಆರ್ಮಿಯ ಸಮವಸ್ತ್ರದಲ್ಲೇ ಕಾಣಿಸಿಕೊಂಡು ಅವರು ಮಾತನಾಡಿದರು.

'ಅಮೆರಿಕವನ್ನು ಒಡೆಯುವುದು ಹೇಗೆ ಅಸಾಧ್ಯವೋ, ಅದೇ ರೀತಿ ಚೀನಾವನ್ನೂ ವಿಭಜಿಸಲು ಸಾಧ್ಯವಿಲ್ಲ. ಒಂದಿಂಚು ಭೂಮಿಯನ್ನೂ ನಾವು ವಿದೇಶಿ ಶಕ್ತಿಗಳಿಗೆ ಬಿಟ್ಟುಕೊಡುವುದಿಲ್ಲ' ಎಂದು ವೈ-ಫೆಂಘೆ ಸಾರಿದರು.

ವಿದೇಶಿ ಆಕ್ರಮಣದಿಂದ ತೈವಾನ್‌ ಅನ್ನು ರಕ್ಷಿಸುವ ಹಾಗೂ ಅದಕ್ಕೆ ಶಸ್ತ್ರಾಸ್ತ್ರಗಳನ್ನು ಪೂರೈಸುವ ಅಮೆರಿಕದ 1979ರ ತೈವಾನ್ಸ್‌ ರಿಲೇಶನ್ಸ್‌ ಕಾಯ್ದೆಯನ್ನು ಚೀನೀ ಸಚಿವರು ಖಂಡಿಸಿದರು.

ತೈವಾನ್ ಅನ್ನು ದಂಗೆಯ ಪ್ರಾಂತ್ಯ ಎಂದು ಚೀನಾ ಪರಿಗಣಿಸಿದ್ದು, 1949ರ ಅಂತರ್ಯುದ್ಧದ ಬಳಿಕ ಪ್ರತ್ಯೇಕಗೊಂಡಿತ್ತು. ಹೀಗಾಗಿ ಚೀನಾದ ಆಂತರಿಕ ವಿಚಾರದಲ್ಲಿ ಅಮೆರಿಕ ಕಾನೂನು ರೂಪಿಸುವಂತಿಲ್ಲ. ಅದು ಅರ್ಥಹೀನ ಎಂದು ವೈ ಪ್ರತಿಪಾದಿಸಿದರು.