ಚೀನಾ ವಾಯುಪ್ರದೇಶದಲ್ಲಿ ಭಾರತ ಡ್ರೋನ್: ಡ್ರ್ಯಾಗನ್ ಆರೋಪ

ಬೀಜಿಂಗ್: ಭಾರತದ ಡ್ರೋನ್ (ಮಾನವರಹಿತ ವೈಮಾನಿಕ ವಾಹನ-ಯಎವಿ) ಒಂದು ತಮ್ಮ ವಾಯುಪ್ರದೇಶದಲ್ಲಿ ಅತಿಕ್ರಮಣ ಮಾಡಿದೆ ಎಂದು ಚೀನಾ ಆರೋಪಿಸಿದೆ. ಆದರೆ ಆ ಡ್ರೋಲ್ ನೆಲಕ್ಕುರುಳಿತು ಎಂದು ಚೀನಾ ಸೇನೆ ಹೇಳಿಕೊಂಡಿದೆ.

'ಈ ಮೂಲಕ ಚೀನಾದ ಪ್ರಾದೇಶಿಕ ಸಾರ್ವಭೌಮತ್ವವನ್ನು ಭಾರತ ಉಲ್ಲಂಘಿಸಿದೆ. ಈ ಬಗ್ಗೆ ನಾವು ತೀವ್ರ ಅಸಹನೆ, ಆಕ್ಷೇಪಣೆ ವ್ಯಕ್ತಪಡಿಸುತ್ತಿದ್ದೇವೆ' ಎಂದು ಚೀನಾ ಸೇನಾ ಉಪಾಧ್ಯಕ್ಷ ಜಾಂಗ್ ಷೌಲಿ ಮಾಧ್ಯಮಗಳಿಗೆ ತಿಳಿಸಿದ್ದಾರೆ. ಆದರೆ ಡ್ರೋನ್ ಎಲ್ಲಿ, ಯಾವಾಗ ಹಾರಾಡಿತು ಎಂಬ ವಿಷಯವನ್ನು ಮಾತ್ರ ಅವರು ತಿಳಿಸಿಲ್ಲ.

ಚೀನಾದ ಗಡಿಭದ್ರಾತಾ ಪಡೆಗಳು ಡ್ರೋನನ್ನು ಗುರುತಿಸಿದ್ದಾಗಿ ತಿಳಿಸಿವೆ. ಆದರೆ ಭಾರತ ಈ ಬಗ್ಗೆ ಇನ್ನೂ ಯಾವುದೇ ರೀತಿಯ ಪ್ರತಿಕ್ರಿಯೆ ನೀಡಿಲ್ಲ. ಕೆಲವು ತಿಂಗಳ ಹಿಂದೆ ಭಾರತ-ಚೀನಾ ನಡುವೆ ಡೋಕ್ಲಾಮ್ ವಿವಾದ ತಲೆಯೆತ್ತಿದ್ದು ಗೊತ್ತೇ ಇದೆ. ಭಾರತದ ಭದ್ರತೆಗೆ ಧಕ್ಕೆಯುಂಟಾಗುವಂತೆ ಚೀನಾ ರಸ್ತೆ ನಿರ್ಮಿಸುತ್ತಿದೆ ಎಂದು ನಮ್ಮ ದೇಶ ಅದನ್ನು ತಡೆದಿತ್ತು. ಭಾರತ ಸೇನೆ ಅದನ್ನು ತಡೆದಿದ್ದಕ್ಕೆ ಚೀನಾ ಕೆಂಡಮಂಡಲವಾಗಿತ್ತು.

ಭಾರತದ ತನ್ನ ಸೇನೆಯನ್ನು ಹಿಂದೆ ಕರೆಸಿಕೊಳ್ಳಬೇಕೆಂದು, ಇಲ್ಲದಿದ್ದರೆ ಗಂಭೀರ ಪರಿಣಾಮ ಎದುರಿಸಬೇಕಾಗುತ್ತದೆಂದು ಹಲವು ಸಲ ಬೆದರಿಕೆಯೊಡ್ಡಿದ್ದು ಗೊತ್ತೇ ಇದೆ. ಸರಿಸುಮಾರು ಎರಡು ತಿಂಗಳ ಉದ್ವಿಗ್ನ ಪರಿಸ್ಥಿತಿ ಬಳಿಕ ಚೀನಾ ಸೇನಾಪಡೆ ಹಿಂದೆ ಸರಿಯುವ ಮೂಲಕ ಆಗಸ್ಟ್ ನಲ್ಲಿ ಡೋಕ್ಲಾಮ್ ವಿವಾದ ತಣ್ಣಗಾಗಿತ್ತು.