100 ಅಡಿ ಸುರಂಗ ತೋಡಿ ಜೈಲಿನಿಂದ ತಪ್ಪಿಸಿಕೊಂಡ ಆಧುನಿಕ ಚೀನಿ 'ಪ್ಯಾಪಿಲಾನ್'!

ತಂಗೇರಾಂಗ್: 1973ರಲ್ಲಿ ತೆರೆಕಂಡ ಹಾಲಿವುಡ್ ಚಿತ್ರ ಪ್ಯಾಪಿಲಾನ್ ಇಂದಿಗೂ ವಿಶ್ವದ ಶ್ರೇಷ್ಠ ಚಿತ್ರಗಳಲ್ಲಿ ಒಂದು ಎಂಬ ಖ್ಯಾತಿ ಪಡೆದಿದೆ. ಕೈದಿಯೋರ್ವ ಅತ್ಯಂತ ಭದ್ರತೆ ಇರುವ ಜೈಲಿನಿಂದ ತಪ್ಪಿಸಿಕೊಂಡ ನೈಜ ಘಟನೆಯಾಧಾರಿತ ಚಿತ್ರವದು.

ಇದೀಗ ಇಂತದ್ದೇ ಘಟನೆಯೊಂದು ಇಂಡೋನೇಷ್ಯಾದಲ್ಲಿ ನಡೆದಿದ್ದು, ಡ್ರಗ್ ಮಾಫಿಯಾ ಆರೋಪದ ಮೇಲೆ ಮರಣದಂಡನೆಗೆ ಗುರಿಯಾಗಿದ್ದ ಚೀನಿ ಕೈದಿಯೋರ್ವ 100 ಅಡಿ ಸುರಂಗ ತೋಡಿ ಜೈಲಿನಿಂದ ತಪ್ಪಿಸಿಕೊಂಡಿದ್ದಾನೆ.

ಪೊಲೀಸರಿಂದ ತಪ್ಪಿಸಿಕೊಂಡು ಕೈದಿ ಪರಾರಿ

ಇಲ್ಲಿನ ಸೆಂಟ್ರಲ್‌ ಜೈಲಿನಲ್ಲಿ ಮರಣದಂಡನೆ ಶಿಕ್ಷೆಗೆ ಕಾಯುತ್ತಿದ್ದ ಚೀನಾ ಪ್ರಜೆ ಕಾಯ್ ಜೀ ಫಾನ್ ಎಂಬಾತ, ತನ್ನ ಸೆಲ್‌ನಿಂದ ಜೈಲಿನ ಹೊರಗೆ ಸಂಪರ್ಕ ಕಲ್ಪಿಸಲು ಬರೋಬ್ಬರಿ 100 ಅಡಿ ಸುರಂಗ ತೋಡಿದ್ದು, ಜೈಲಿನಿಂದ ತಪ್ಪಿಸಿಕೊಳ್ಳುವಲ್ಲಿ ಯಶಸ್ವಿಯೂ ಆಗಿದ್ದಾನೆ.

2017ರಲ್ಲಿ ಬರೋಬ್ಬರಿ 110ಕೆಜಿ ಮೆಥಾಂಫೆಟಮೈನ್ ಎಂಬ ಮಾದಕ ವಸ್ತುವಿನೊಂದಿಗೆ ಸಿಕ್ಕಿಬಿದ್ದಿದ್ದ ಕಾಯ್ ಜೀ ಫಾನ್ ವಿಚಾರಣೆ ಬಳಿಕ ಇಂಡೋನೇಷ್ಯಾ ನ್ಯಾಯಾಲಯದಿಂದ ಮರಣದಂಡನೆ ಶಿಕ್ಷೆಗೆ ಗುರಿಯಾಗಿದ್ದ.

ಪೆರೋಲ್‌ ಮೇಲೆ ತೆರಳಿದ್ದ ಕೈದಿ ಪರಾರಿ

ಅದರಂತೆ ಕಾಯ್ ಜೀ ಫಾನ್‌ನನ್ನು ಇಂಡೋನೇಷ್ಯಾದ ತಂಗೇರಾಂಗ್ ಸೆಂಟ್ರಲ್‌ ಜೈಲಿನಲ್ಲಿ ಕೈದಿಯಾಗಿ ಇರಿಸಲಾಗಿತ್ತು. ಆದರೆ ಕಿರಿದಾದ ಸುರಂಗ ನಿರ್ಮಿಸಿ ಫಾನ್ ತಪ್ಪಿಸಿಕೊಂಡಿದ್ದಾನೆ.

ಈ ಹಿಂದೆ 2017ರ ಜನವರಿಯಲ್ಲೂ ಫಾನ್ ತನ್ನ ಸೆಲ್‌ನ ಬಾತ್‌ರೂಂನ ಗೋಡೆಗೆ ದೊಡ್ಡ ರಂಧ್ರ ಕೊರೆದು ತಪ್ಪಿಸಿಕೊಂಡಿದ್ದ. ಆದರೆ ಪಶ್ಚಿಮ ಜಾವಾದಲ್ಲಿ ಆತನನ್ನು ಮತ್ತೆ ಸೆರೆಹಿಡಿಯಲಾಗಿತ್ತು.

ಇದೀಗ ಮತ್ತೆ ಸುರಂಗ ಮಾರ್ಗ ನಿರ್ಮಿಸಿ ಪರಾರಿಯಾಗಿರುವ ಫಾನ್ ಹುಡುಕಾಟಕ್ಕೆ ಬಲೆ ಬೀಸಿರುವುದಾಗಿ ತಂಗೇರಾಂಗ್ ಪೊಲೀಸ್ ಮುಖ್ಯಸ್ಥ ಸುಗೆಂಗ್ ಹರಿಯಾಂಟೊ ಸ್ಪಷ್ಟಪಡಿಸಿದ್ದಾರೆ.

ಹೆಚ್ಚುತ್ತಿರುವ ಜೈಲ್‌ ಬ್ರೇಕ್‌ಗಳು: ಬೆಂಗಳೂರು ಜೈಲು ಎಷ್ಟು ಸುರಕ್ಷಿತ?

ಇಂಡೋನೇಷ್ಯದಾಲ್ಲಿ ಕೈದಿಗಳು ಜೈಲಿನಿಂದ ಪರಾರಿಯಾಗುವುದು ಸಾಮಾನ್ಯ ಸಂಗತಿಯಾಗಿದೆ. ಕಳಪೆ ಭದ್ರತಾ ವ್ಯವಸ್ಥೆಯ ಕಾರಣಕ್ಕೆ ಕೈದಿಗಳು ಸುಲಭವಾಗಿ ವಿವಿಧ ಜೈಲುಗಳಿಂದ ಪರಾರಿಯಾಗುತ್ತಿದ್ದಾರೆ.

ಕಳೆದ ಒಂದು ವರ್ಷದಲ್ಲಿ ಇಂಡೋನೇಷ್ಯಾದ ವಿವಿಧ ಜೈಲುಗಳಿಂದ ಸುಮಾರು 400ಕ್ಕೂ ಹೆಚ್ಚು ಕೈದಿಗಳು ಪರಾರಿಯಾಗಿದ್ದಾರೆ ಎಂದು ಹೇಳಲಾಗಿದೆ.