ನ್ಯೂಜಿಲೆಂಡ್‌ನಲ್ಲಿ ವಾರದಲ್ಲಿ 4 ದಿನ ಕೆಲಸಕ್ಕೆ ಚಿಂತನೆ, ಪಿಎಂ ಸಲಹೆಗೆ ಉತ್ತಮ ಸ್ಪಂದನೆ

ವೆಲ್ಲಿಂಗ್ಟನ್‌: ನಯನ ಮನೋಹರ ಪರಿಸರ ತಾಣಗಳನ್ನು ಹೊಂದಿರುವ ನ್ಯೂಜಿಲೆಂಡ್‌ ಪ್ರವಾಸೋದ್ಯಮವನ್ನೇ ಆದಾಯ ಮೂಲವಾಗಿ ನಂಬಿಕೊಂಡಿರುವ ರಾಷ್ಟ್ರ. ಕೊರೊನಾ ವೈರಸ್ ಲಾಕ್‌ಡೌನ್‌ನಿಂದ ಪ್ರವಾಸೋದ್ಯಮಕ್ಕೆ ಭಾರಿ ಹೊಡೆತ ಬಿದ್ದಿದ್ದು, ಈ ಕ್ಷೇತ್ರದ ಚೇತರಿಕೆಗೆ ಪ್ರಧಾನಿ ಜಸಿಂದಾ ಆಡ್ರೆನ್‌ ಅವರು ದೇಶೀಯವಾಗಿ ಮುಂದಾಗಿದ್ದಾರೆ.

''ಸದ್ಯದ ಪರಿಸ್ಥಿತಿಯಲ್ಲಿ ವಿದೇಶಗಳಿಂದ ನ್ಯೂಜಿಲೆಂಡ್‌ಗೆ ಪ್ರವಾಸಿಗರು ಬರುವುದು ಅನುಮಾನ. ಹಾಗಾಗಿ ನಮ್ಮಲ್ಲಿರುವ ಕಂಪನಿಗಳಲ್ಲಿ ವಾರದಲ್ಲಿ ನಾಲ್ಕು ದಿನವಷ್ಟೇ ಕೆಲಸಕ್ಕೆ ಅವಕಾಶ ನೀಡಿದರೆ, ಉದ್ಯೋಗಿಗಳು ಉಳಿದ 3 ದಿನಗಳ ಬಿಡುವಿನ ವೇಳೆ ದೇಶದೊಳಗಿರುವ ಪ್ರವಾಸಿ ತಾಣಗಳಿಗೆ ಭೇಟಿಕೊಡಲು ಸಾಧ್ಯವಾಗುತ್ತದೆ. ಇದರಿಂದ ಕೊರೊನಾ ಕಾಲದಲ್ಲಿ ಉದ್ಯೋಗಿಗಳಿಗೂ ಒಂದಷ್ಟು ಲವಲವಿಕೆ ಬರುವುದರ ಜತಗೆ ಪ್ರವಾಸೋದ್ಯಮವೂ ಸುಧಾರಿಸಿಕೊಳ್ಳಲಿದೆ,'' ಎಂದು ಅವರು ಹೇಳಿದ್ದಾರೆ.

ಫೇಸ್‌ಬುಕ್‌ ಲೈವ್‌ ಮೂಲಕ ಪ್ರಧಾನಿ ಜಸಿಂದಾ ಇಂತಹದ್ದೊಂದು ಸಲಹೆ ತೇಲಿಬಿಟ್ಟಿದ್ದು, ಉದ್ಯೋಗದಾತರು ಈ ಬಗ್ಗೆ ಅಂತಿಮ ನಿರ್ಧಾರ ಕೈಗೊಳ್ಳಬೇಕು ಎಂದು ಹೇಳಿದ್ದಾರೆ. ಈ ಸಂದೇಶಕ್ಕೆ ದೇಶದ ಜನತೆ ಉತ್ತಮ ಖುಷಿಯಿಂದ ಸ್ಪಂದನೆ ನೀಡಿದ್ದು, ಪಿಎಂ ಸಲಹೆಯನ್ನು ಹೊಗಳಿದ್ದಾರೆ. ಮಾತ್ರವಲ್ಲ ಬೆಸ್ಟ್ ಪಿಎಂ ಎವರ್ ಎಂದು ಹಲವರು ಟ್ವೀಟ್ ಮಾಡಿದ್ದಾರೆ.