ಭ್ರಷ್ಟಾಚಾರ: ಸಿಪೆಕ್‌ ಯೋಜನೆಗೆ ಹಣ ಬಿಡುಗಡೆ ಸ್ಥಗಿತಗೊಳಿಸಿದ ಚೀನಾ

ಪಾಕ್‌ ಸರಕಾರದ ಬದಲು ಪಾಕ್ ಸೇನೆಗೆ ಹೆಚ್ಚಿನ ಪಾತ್ರ ನೀಡಲು ಡ್ರ್ಯಾಗನ್‌ ಚಿಂತನೆ

ಬೀಜಿಂಗ್‌: ಮಹತ್ವಾಕಾಂಕ್ಷೆಯ ಚೀನಾ-ಪಾಕಿಸ್ತಾನ ಎಕನಾಮಿಕ್ ಕಾರಿಡಾರ್‌ (ಸಿಪಿಇಸಿ) ಯೋಜನೆಯಡಿ ನಿರ್ಮಾಣವಾಗುತ್ತಿರುವ ಮೂರು ಪ್ರಮುಖ ಹೆದ್ದಾರಿ ಯೋಜನೆಗಳಿಗೆ ಆರ್ಥಿಕ ನೆರವು ನೀಡುವುದನ್ನು ಚೀನಾ ನಿಲ್ಲಿಸಿದೆ. ಈ ಯೋಜನೆಗಳಲ್ಲಿ ಪಾಕ್‌ ಸೇನೆ ಹೆಚ್ಚಿನ ಪಾತ್ರವಹಿಸಬೇಕು ಮತ್ತು ಬಂಡವಾಳ ಹೂಡಬೇಕು ಎಂದು ಚೀನಾ ಬಯಸಿರುವುದಾಗಿ ಜಾಗತಿಕ ಚಿಂತಕರ ಚಾವಡಿ ದಕ್ಷಿಣ ಏಷ್ಯಾ ಅಧ್ಯಯನಗಳ ಯುರೋಪಿಯನ್ ಪ್ರತಿಷ್ಠಾನ (EFSAS) ತಿಳಿಸಿದೆ.

ನವೆಂಬರ್‌ 20ರಂದು ನಡೆದ ಜಂಟಿ ಕ್ರಿಯಾ ಸಮಿತಿ ಸಭೆಯಲ್ಲಿ ಹಣ ಬಿಡುಗಡೆಯ ಹೊಸ ನೀತಿಯನ್ನು ಜಾರಿಗೆ ತರುವುದಾಗಿ ಹೇಳಿದ್ದ ಚೀನಾ, ಹಳೆಯ ಮಾರ್ಗಸೂಚಿಗಳನ್ನು ರದ್ದುಪಡಿಸಿ ಶೀಘ್ರವೇ ಹೊಸ ಮಾರ್ಗಸೂಚಿ ಬಿಡುಗಡೆ ಮಾಡುವುದಾಗಿ ಪಾಕಿಸ್ತಾನಕ್ಕೆ ತಿಳಿಸಿದೆ.

ಯೋಜನೆಗಳಿಗೆ ಹಣ ಬಿಡುಗಡೆ ಮಾಡುವಲ್ಲಿ ವ್ಯಾಪಕ ಭ್ರಷ್ಟಾಚಾರ ನಡೆದಿರುವ ಹಿನ್ನೆಲೆಯಲ್ಲಿ ಪಾಕ್‌ ಸೇನೆಯೇ ಪ್ರಮುಖ ಪಾತ್ರವಹಿಸಿ ಯೋಜನೆಗಳ ಯಶಸ್ಸಿನಲ್ಲಿ ಭಾಗಿಯಾಗಬೇಕು ಎಂದು ಚೀನಾ ಬಯಸಿದೆ. ಪಾಕ್‌ ಸರಕಾರದ ಬದಲು ಪಾಕ್‌ ಸೇನೆಯನ್ನು ಪ್ರಮುಖ ಪಾಲುದಾರನನ್ನಾಗಿಸಲು ಚೀನಾ ಮುಂದಾಗಿದೆ.