ಭಾರತಕ್ಕೆ ಅಪಾಚೆ ಯುದ್ಧ ಹೆಲಿಕಾಪ್ಟರ್‌ಗಳ ಮಾರಾಟ: ಅಮೆರಿಕ ಅನುಮೋದನೆ

ವಾಷಿಂಗ್ಟನ್‌: ಭಾರತೀಯ ಸೇನೆಗೆ 9,300 ಡಾಲರ್‌ ಮೌಲ್ಯದ 6 ಎಎಚ್‌-64ಇ ಅಪಾಚೆ ಯುದ್ಧ ಹೆಲಿಕಾಪ್ಟರ್‌ಗಳ ಮಾರಾಟಕ್ಕೆ ಅಮೆರಿಕ ಸರಕಾರ ಅನುಮೋದನೆ ನೀಡಿದೆ.

ಈ ಒಪ್ಪಂದಕ್ಕೆ ಅಮೆರಿಕ ಕಾಂಗ್ರೆಸ್‌ ಅನುಮೋದನೆ ನೀಡಿದ್ದು, ಸಂಸದರು ಯಾರೂ ಆಕ್ಷೇಪವೆತ್ತದಿದ್ದರೆ ಗುತ್ತಿಗೆ ಮುಂದುವರಿಯಲಿದೆ.

ಬೋಯಿಂಗ್ ಮತ್ತು ಭಾರತೀಯ ಪಾಲುದಾರ ಸಂಸ್ಥೆ ಟಾಟಾ ಜಂಟಿಯಾಗಿ ಭಾರತದಲ್ಲಿರುವ ಸ್ಥಾವರದಲ್ಲಿ ಅಪಾಚೆಯ ಸೂಕ್ಷ್ಮ ಬಿಡಿಭಾಗಗಳನ್ನು ಉತ್ಪಾದಿಸಲು ಆರಂಭಿಸಿವೆ. ಆದರೆ ಅಮೆರಿಕ ಸರಕಾರ ಮಂಗಳವಾರ ನೀಡಿದ ಅನುಮೋದನೆಯಿಂದ ಅಮೆರಿಕದ ಕಂಪನಿಗಳು ಸಿದ್ಧಪಡಿಸಿದ ಉತ್ಪನ್ನಗಳನ್ನೇ ನೇರವಾಗಿ ಮಾರಾಟ ಮಾಡುವ ಸಾಧ್ಯತೆಯೂ ಇದೆ.

ಲಾಕ್‌ಹೀಡ್‌ ಮಾರ್ಟಿನ್‌, ಜನರಲ್‌ ಎಲೆಕ್ಟ್ರಿಕ್‌ ಮತ್ತು ರೇಥಿಯಾನ್ ಕಂಪನಿಗಳು ಅಮೆರಿಕದ ಶಸ್ತ್ರಾಸ್ತ್ರಗಳು, ವೈಮಾನಿಕ ವಾಹನಗಳು ಮತ್ತು ಎಂಜಿನಿಯರಿಂಗ್‌ ಉತ್ಪಾದನೆಯ ದೈತ್ಯರಾಗಿವೆ.

ಏರ್‌ಕ್ರಾಫ್ಟ್‌ಗಳ ಜತೆಗೆ, ರಾತ್ರಿ ವೀಕ್ಷಣೆಯ ಸೆನ್ಸರ್‌ಗಳು, ಜಿಪಿಎಸ್‌ ಮಾರ್ಗಸೂಚಿಗಳು ಮತ್ತು ನೂರಾರು ಹೆಲಿಫೈರ್‌ ಆ್ಯಂಟಿ ಆರ್ಮರ್‌ ಮತ್ತು ಸ್ಟಿಂಗರ್‌ ಕ್ಷಿಪಣಿಗಳು ಈ ಮಾರಾಟದ ಗುತ್ತಿಗೆಯಲ್ಲಿ ಸೇರಿವೆ.