ಅಮೆರಿಕವನ್ನು ತೃಪ್ತಿಪಡಿಸುವುದು ನಮ್ಮ ಕೆಲಸವಲ್ಲ: ಪಾಕ್‌ ರಕ್ಷಣಾ ಸಚಿವ

ಹೊಸದಿಲ್ಲಿ: ಅಮೆರಿಕ ಜತೆಗಿನ ಸಂಬಂಧ ಪುನರ್ ರಚನೆಗಾಗಿ ಪಾಕಿಸ್ತಾನ ಸಿದ್ಧವಾಗಿದೆ, ಆದರೆ ನಮ್ಮ ಸಾಕ್ಷಗಳಿಂದ ಅಮೆರಿಕವನ್ನು ತೃಪ್ತಿ ಪಡಿಸಲು ಸಾಧ್ಯವಿಲ್ಲ ಎಂದು ಪಾಕ್‌ ರಕ್ಷಣಾ ಸಚಿವ ಹೇಳಿರುವುದನ್ನು ಪಾಕ್‌ ಮಾಧ್ಯಮ ವರದಿ ಮಾಡಿದೆ.

ಕೆಲ ದಿನಗಳ ಹಿಂದೆ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್‌, 'ಪಾಕಿಸ್ತಾನ ಭಯೋತ್ಪಾದಕರ ಸ್ವರ್ಗ' ಎಂದು ಹೇಳಿದ್ದರು. ಈ ಹೇಳಿಕೆ ಎರಡೂ ದೇಶಗಳ ನಡುವಿನ ಸಂಬಂಧ ಹಳಸಲು ಕಾರಣವಾಗಿತ್ತು. ಇದಾದ ಬಳಿಕ ಅಮೆರಿಕದೊಂದಿಗೆ ಸಂಬಂಧವನ್ನು ಮತ್ತೆ ಸ್ಥಾಪಿಸಲು ಮುಂದಾಗಿರುವ ಪಾಕ್‌, ಯುಎಸ್‌ನೊಂದಿಗೆ ಮಾತುಕತೆ ನಡೆಸಲು ಸಿದ್ಧವಿದೆ ಎಂದು ಹೇಳಿದೆ.

'ಪಾಕ್‌ -ಅಮೆರಿಕ ನಡುವಿನ ಸಂಬಂಧ ಪುನರ್‌ ಸ್ಥಾಪನಗೆ ನಾವು ಸಿದ್ಧವಾಗಿದ್ದೇವೆ, ನಮ್ಮ ದೃಷ್ಟಿಕೋನದ ಮೂಲಕ ತರ್ಕಬದ್ಧವಾಗಿ ಮತ್ತು ಸಾಕ್ಷಿಗಳೊಂದಿಗೆ ಕೊಡಲು ನಾವು ಸಿದ್ಧರಿದ್ದೇವೆ. ಆದರೆ ಅವುಗಳಿಂದ ನಾವು ಅಮೆರಿಕವನ್ನು ತೃಪ್ತಿಗೊಳಿಸಲು ಸಾಧ್ಯವಿಲ್ಲ, ಇದು ನಮ್ಮ ಕೆಲಸವಲ್ಲ' ಎಂದು ಪಾಕಿಸ್ತಾನ ರಕ್ಷಣಾ ಸಚಿವ ಖುರ್ರಂ ದಸ್ತಗೀರ್ ಖಾನ್ ಹೇಳಿದ್ದಾರೆ.

ಉಗ್ರರ ಧಮನ ವಿಚಾರದಲ್ಲಿ ಅಮೆರಿಕ ಪ್ರತೀ ಬಾರಿಯೂ ತಮ್ಮ ನಿಲುವನ್ನು ಬದಲಾಯಿಸುತ್ತಲೇ ಇರುತ್ತದೆ ಎಂದಿರುವ ದಸ್ತಗೀರ ಖಾನ್‌, ಇದೇ ವೇಳೆ ಭಾರತದಿಂದ ಪಾಕಿಸ್ತಾನಕ್ಕೆ ಇರುವ ಬೆದರಿಕೆಯನ್ನು ವಾಷಿಂಗ್ಟನ್ ನಿರ್ಲಕ್ಷಿಸುತ್ತಿದೆ ಎಂದು ಆರೋಪಿಸಿದ್ದಾರೆ.