ತಮಗೆ ಕೊರೊನಾ ವೈರಸ್‌ ಸೋಂಕು ತಟ್ಟಿರುವುದು ‘ದೇವರ ಆಶೀರ್ವಾದ’ಎಂದ ಟ್ರಂಪ್‌, ಚೀನಾ ವಿರುದ್ಧ ಕಿಡಿ!

ವಾಷಿಂಗ್ಟನ್‌: ತಮಗೆ ಬಂದಿರುವ ಕೊರೊನಾ ವೈರಸ್‌ ಸೋಂಕು ದೇವರ ಆಶೀರ್ವಾದ ಎಂದು ಟ್ರಂಪ್ ಹೇಳಿಕೊಂಡಿದ್ದಾರೆ. ಸಾಮಾಜಿಕ ಜಾಲತಾಣ ಟ್ವಿಟರ್‌ನಲ್ಲಿ ಅಧ್ಯಕ್ಷ ಡೊನಾಲ್ಡ್‌ ಟ್ರಂಪ್‌ ಅವರು ಕೊರೊನಾ ಸೋಂಕು ಕುರಿತು ಬುಧವಾರ ವಿಡಿಯೊ ಸಂದೇಶ ಹಂಚಿಕೊಂಡಿದ್ದಾರೆ.

ಇದರಲ್ಲಿ ತಮಗೆ ಬಂದಿರುವ ಕೊರೊನಾ ವೈರಸ್‌ ಸೋಂಕು ದೇವರ ಆಶೀರ್ವಾದ. ಈ ಮೂಲಕ ರೋಗಕ್ಕೆ ನೀಡುವ ಸಂಭಾವ್ಯ ಔಷಧ, ಚಿಕಿತ್ಸೆಯ ಬಗ್ಗೆ ತಮಗೆ ಅರಿವು ಸಿಕ್ಕಂತಾಗಿದೆ. ಅಲ್ಲದೆ ತನಗೆ ನೀಡಿದ ಸಂಭಾವ್ಯ ಔಷದವನ್ನು ನಾನು ಧೈರ್ಯದಿಂದ ತೆಗೆದುಕೊಂಡೆ. ಈಗ ನಾನು ಸಂಪೂರ್ಣ ಆರೋಗ್ಯವಾಗಿದ್ದೇನೆ ಎಂದು ಅವರು ಹೇಳಿದ್ದಾರೆ.

ಟ್ರಂಪ್‌ ಅವರಿಗೆ ಕೊರೊನಾ ಪಾಸಿಟಿವ್‌ ಆದ ಬಳಿಕದ ಮೊದಲ ಟ್ವೀಟ್‌ ಇದಾಗಿದೆ. ಇನ್ನು ವಿಡಿಯೋದ ಆರಂಭದಲ್ಲಿ ತನಗೆ ನೀಡಿದ ಚಿಕಿತ್ಸೆ ಹಾಗೂ ಔಷಧಗಳ ಬಗ್ಗೆ ಮಾಹಿತಿ ಹಂಚಿಕೊಂಡ ಡೊನಾಲ್ಡ್‌ ಟ್ರಂಪ್‌ ಕೊರೊನಾ ಬಗ್ಗೆ ಭಯಬೇಡ ಧೈರ್ಯದಿಂದ ಹೋರಾಡಿ ಎಂದು ಹುರಿದುಂಬಿಸಿದರು. ಅಲ್ಲದೇ ಆಸ್ಪತ್ರೆ ಹಾಗೂ ವೈದ್ಯರುಗಳ ಕಾರ್ಯವೈಖರಿ ಬಗ್ಗೆಯೂ ಶ್ಲಾಘಿಸಿದರು.

ಇಬ್ಬರು ವಿಜ್ಞಾನಿಗಳಿಗೆ ರಸಾಯನಶಾಸ್ತ್ರ ನೊಬೆಲ್‌ ಪ್ರಶಸ್ತಿ

ಚೀನಾ ವಿರುದ್ಧ ಟ್ರಂಪ್‌ ಕಿಡಿ!
ಇನ್ನು ಕೊರೊನಾ ವೈರಸ್‌ ಸಂಬಂಧ ಚೀನಾ ವಿರುದ್ಧ ಗುಡುಗುತ್ತಲೆ ಇದ್ದ ಡೊನಾಲ್ಡ್‌ ಟ್ರಂಪ್‌ ಇದೀಗ ಡ್ರ್ಯಾಗನ್‌ ದೇಶದ ವಿರುದ್ಧ ಮತ್ತೆ ಕಿಡಿಕಾರಿದ್ದಾರೆ. ಸಾಂಕ್ರಾಮಿಕ ರೋಗದಿಂದ ನಿಮ್ಮನ್ನು ಮುಕ್ತಗೊಳಿಸಲು ನಾನು ಹೊರಟಿದ್ದೇನೆ. ನನಗೆ ಯಾವ ಔಷಧಿ ದೊರೆಯಿತೋ? ಅದೇ ನಿಮಗೂ ನೀಡುತ್ತೇನೆ. ಯಾಕೆಂದರೆ ಕೊರೊನಾ ಹರಡಲು ನೀವು ಕಾರಣಿಭೂತರಲ್ಲ.

ನೀವು ಅದಕ್ಕಾಗಿ ಬೆಲೆ ತೆರಬೇಕಿಲ್ಲ. ಈಗ ಏನು ಸಂಭವಿಸಿದೆಯೋ ಅದಕ್ಕೆ ಕಾರಣ ಚೀನಾ. ಇದು ಚೀನಾ ಮಾಡಿದ ತಪ್ಪು. ಈ ದೇಶಕ್ಕೆ, ವಿಶ್ವಕ್ಕೆ ಬಗೆದ ಈ ಕೃತ್ಯಕ್ಕಾಗಿ ಚೀನಾ ದೊಡ್ಡ ಬೆಲೆ ತೆರಬೇಕಾಗುತ್ತದೆ ಎಂದು ಬಹಿರಂಗವಾಗೇ ಟ್ರಂಪ್‌ ಚೀನಾ ವಿರುದ್ಧ ವಾಗ್ಧಾಳಿ ನಡೆಸಿದರು. ಇನ್ನು ಕೊರೊನಾ ಲಸಿಕೆ ಬಗ್ಗೆ ಮಾಹಿತಿ ನೀಡಿದ ಟ್ರಂಪ್‌ ಕೆಲವರು ಚುನಾವಣೆಗಾಗಿಯೇ ಲಸಿಕೆ ತರುವುದನ್ನು ತಡೆಗಟ್ಟಲು ನೋಡುತ್ತಿದ್ದಾರೆ. ಅತೀ ಶೀಘ್ರದಲ್ಲೇ ನಾವು ಕೊರೊನಾ ಲಸಿಕೆ ತರುತ್ತೇವೆ ಎಂದು ವಿಶ್ವಾಸ ವ್ಯಕ್ತಪಡಿಸಿದರು.