ಚೀನಿ ವೈರಸ್ ಆಗಮನಕ್ಕೂ ಮೊದಲು ಅಮೆರಿಕದ ಸ್ಥಿತಿ ಚೆನ್ನಾಗಿತ್ತು: ಟ್ರಂಪ್ ಅಭಿಮತ!

ವಾಷಿಂಗ್ಟನ್: ಚೀನಾ ವಿರುದ್ಧದ ತಮ್ಮ ವಾಗ್ದಾಳಿಯನ್ನು ಮುಂದುವರೆಸಿರುವ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್, ಚೀನಾ ವೈರಸ್‌ ಕಾಲಿಡುವುದಕ್ಕೂ ಮೊದಲು ಅಮೆರಿಕದ ಸ್ಥಿತಿ ಉತ್ತಮವಾಗಿತ್ತು ಎಂದು ಅಭಿಪ್ರಾಯಪಟ್ಟಿದ್ದಾರೆ.

ಅಮೆರಿಕದ 244ನೇ ಸ್ವಾತಂತ್ರ್ಯ ದಿನಾಚರಣೆ ಅಂಗವಾಗಿ 'ಸೆಲ್ಯೂಟ್ ಟು ಅಮೆರಿಕ' ಕಾರ್ಯಕ್ರಮ ಉದ್ದೇಶಿಸಿ ಮಾತನಾಡಿದ ಟ್ರಂಪ್, ಮಾರಕ ಕೊರೊನಾ ವೈರಸ್ ಹಾವಳಿಗೂ ಮುನ್ನ ದೇಶದ ಸರ್ವಾಂಗೀಣ ಅಭಿವೃದ್ಧಿ ಉತ್ತಮವಾಗಿತ್ತು ಎಂದು ಹೇಳಿದ್ದಾರೆ.

ಅಮೆರಿಕದ ಆರ್ಥಿಕ ಹಿಂಜರಿಕೆಗೆ ಚೀನಾದಿಂದ ಇಡೀ ವಿಶ್ವಕ್ಕೆ ಪಸರಿಸಿದ ಕೊರೊನಾ ವೈರಸ್ ಕಾರಣ ಎಂದಿರುವ ಟ್ರಂಪ್, ಕೊರೊನಾ ವೈರಸ್‌ನ್ನು ಚೀನಾ ವೈರಸ್ ಎಂದು ಕರೆಯುವ ಮೂಲಕ ಮತ್ತೆ ತಮ್ಮ ಕೋಪವನ್ನು ಹೊರ ಹಾಕಿದ್ದಾರೆ.

ಒಪ್ಪಂದದ ಶಾಯಿ ಆರುವ ಮುನ್ನವೇ ವೈರಸ್ ಕಳುಹಿಸಿದ ಚೀನಾ: ಮತ್ತೆ ಗುಡುಗಿದ ಟ್ರಂಪ್!


ತಮ್ಮ ಸರ್ಕಾರದ ಉತ್ತಮ ನಿರ್ಧಾರಗಳಿಂದಾಗಿ ಅಮೆರಿಕದ ಆರ್ಥಿಕ ಸ್ಥಿತಿ ಈ ಹಿಂದೆಂದಿಗಿಂತಲೂ ಸದೃಢವಾಗಿತ್ತಲ್ಲದೇ, ವಿಶ್ವದಾದ್ಯಂತ ಅಮೆರಿಕದ ಪ್ರಾಬಲ್ಯವನ್ನು ಮತ್ತಷ್ಟು ಗಟ್ಟಿಯಾಗಿತ್ತು ಎಂದು ಟ್ರಂಪ್ ಹೇಳಿದ್ದಾರೆ.

ಆದರೆ ಕೊರೊನಾ ವೈರಸ್ ಹಾವಳಿಯಿಂದ ಅಪಾರ ಸಾವು-ನೋವು ನೊಡಬೇಕಾದ ಸ್ಥಿತಿ ಎದುರಾಗಿದ್ದು, ಆರ್ಥಿಕವಾಗಿಯೂ ನಾವು ಕೆಲವು ಹೆಜ್ಜೆ ಹಿಂದಕ್ಕೆ ಹೋಗಿದ್ದೇವೆ ಎಂದು ಟ್ರಂಪ್ ನುಡಿದರು.

ಚೀನಾದ ಅಸಮರ್ಥತೆ ವಿಶ್ವದಾದ್ಯಂತ ಸಾಮೂಹಿಕ ಸಾವಿಗೆ ಕಾರಣ: ಟ್ರಂಪ್ ಕಿಡಿ!

ಕೊರೊನಾ ವೈರಸ್ ಹರಡುವಿಕೆಯ ಕುರಿತು ಚೀನಾದ ಮೌನ ಅಮೆರಿಕವೂ ಸೇರಿದಂತೆ ಇಡೀ ವಿಶ್ವವನ್ನು ಅಂಧಕಾರದಲ್ಲಿ ಮುಳುಗಿಸಿದ್ದು, ಈ ಎಲ್ಲಾ ಅಡೆತಡೆಗಳನ್ನು ಮೀರಿ ಅಮೆರಿಕ ಮತ್ತೆ ಯಶಸ್ಸಿನ ಹಳಿಯ ಮೇಲೆ ತನ್ನ ನಾಗಾಲೋಟ ಮುಂದುವರೆಸಲಿದೆ ಎಂದು ಟ್ರಂಪ್ ಭರವಸೆ ವ್ಯಕ್ತಪಡಿಸಿದ್ದಾರೆ.