ಸರ್ವ ನಾಶಕ್ಕೆ ಎರಡೇ ನಿಮಿಷ!

ವಾಷಿಂಗ್ಟನ್‌: ಪರಮಾಣು ಯುದ್ಧಕ್ಕೆ ತಿಕ್ಕಾಟ ಜೋರಾಗಿರುವ ನಡುವೆಯೇ ಡೂಮ್ಸ್‌ಡೇ ಕ್ಲಾಕ್‌ನ (ಅಂದರೆ ಸರ್ವನಾಶದ ಮುಳ್ಳು ಎಂದೂ ಭಾವಿಸಬಹುದು) ಮುಳ್ಳನ್ನು 30 ಸೆಕೆಂಡು ಮುಂದಕ್ಕೆ ಸರಿಸಲಾಗಿದೆ. ಮಧ್ಯರಾತ್ರಿಗೆ ಇನ್ನು ಕೇವಲ 2 ನಿಮಿಷಗಳು ಮಾತ್ರ! ಒಂದು ವೇಳೆ ಈ ಮುಳ್ಳು 12 ಗಂಟೆಗೆ (ಮಧ್ಯರಾತ್ರಿಗೆ) ಸರಿದರೆ ಜಗತ್ತು ನಾಶವಾಗುತ್ತದೆ ಎಂದರ್ಥ. ಜಗತ್ತಿನ ನಾಶಕ್ಕೆ ಕೇವಲ 2 ನಿಮಿಷದ ಅಂತರವಿದೆ ಎಂಬುದರ ಸೂಚ್ಯಾರ್ಥವನ್ನು ಈ ಡೂಮ್ಸ್‌ ಡೇ ಕ್ಲಾಕ್‌ ಸಾರಿ ಹೇಳುತ್ತಿದೆ.

ಒಂದೆಡೆ ಉತ್ತರ ಕೊರಿಯಾ ನಿರಂತರ ಅಣುಬಾಂಬ್‌ ಪರೀಕ್ಷೆ, ದಕ್ಷಿಣ ಚೀನಾ ಸಮುದ್ರದ ಸಂಘರ್ಷಗಳು ಡೂಮ್ಸ್‌ಡೇ ಕ್ಲಾಕ್‌ ಮುಂದೆ ಸರಿಯಲು ಪ್ರಮುಖ ಕಾರಣವಾಗಿದೆ. 1947ರಲ್ಲಿ ಈ ವಿಶೇಷ ಗಡಿಯಾರವನ್ನು ತಯಾರಿಸಿದಾಗ 12 ಗಂಟೆಗೆ ಇನ್ನು 7 ನಿಮಿಷವಿತ್ತು. ಈಗ ಕೇವಲ 2 ನಿಮಿಷವಿದೆ!

ವಿಜ್ಞಾನಿಗಳು ಗುರುವಾರ ಜಗತ್ತಿನ ಸರ್ವ ನಾಶದ ಸೂಚಕ ಗಡಿಯಾರ ಡೂಮ್ಸ್‌ಡೇ ಕ್ಲಾಕ್‌ನ ಮುಳ್ಳನ್ನು 30 ಸೆಕೆಂಡು ಮುಂದೂಡಿದರು. ಜಗತ್ತಿನ ನಾಯಕರ ನಡುವಣ ಶೀತಲ ಸಮರ, ಪರಮಾಣು ಯುದ್ಧದ ಭೀತಿಯಿದ್ದರೂ ತಡೆಯುವ ನಿಟ್ಟಿನಲ್ಲಿ ದುರ್ಬಲ ನಿರ್ಧಾರಗಳು ಪ್ರಳಯದ ಮುಳ್ಳು ಮುಂದೆ ಓಡಲು ಕಾರಣವಾಗಿವೆ. 1953ರಿಂದ ಸರ್ವನಾಶದ ಕಡೆಗೆ ಚಲಿಸುತ್ತಿರುವ ಮುಳ್ಳು ಅತ್ಯಂತ ಹತ್ತಿರಕ್ಕೆ ತಲುಪಿದೆ.

ಪ್ರಮುಖ ಕಾರಣಗಳು
* ಉತ್ತರ ಕೊರಿಯಾದ ನಿರಂತರ ಪರಮಾಣು ಚಟುವಟಿಕೆ, ಅಧ್ಯಕ್ಷ ಕಿಮ್‌ ಜಾಂಗ್‌ನ ಪರಮಾಣು ಯುದ್ಧದ ಬೆದರಿಕೆ
* ಅಮೆರಿಕ-ರಷ್ಯಾ ನಡುವಣ ತೊಡಕುಗಳು, ಭಯೋತ್ಪಾದನೆ ಮಟ್ಟ ಹಾಕುವ ನೆಪದಲ್ಲಿ ವೈಮಾನಿಕ ದಾಳಿಗಳು
* ದಕ್ಷಿಣ ಚೀನಾ ಸಮುದ್ರದ ಮೇಲಿನ ಹಿಡಿತಕ್ಕಾಗಿ ಚೀನಾ ಮತ್ತಿತರ ರಾಷ್ಟ್ರಗಳ ನಡುವಣ ತಿಕ್ಕಾಟ

ಉತ್ತರ ಕೊರಿಯಾದಲ್ಲಿ ಹೆಚ್ಚುತ್ತಿರುವ ಪರಮಾಣು ಪರೀಕ್ಷೆಗಳಿಗೆ ಅಮೆರಿಕ ಅಧ್ಯಕ್ಷ ಡೊನಾಲ್ಡ್‌ ಟ್ರಂಪ್‌ ಅವರ ಆಡಳಿತಾತ್ಮಕ ನೀತಿಗಳು ಕಾರಣ. ಅಂತಾರಾಷ್ಟ್ರೀಯ ರಾಜತಾಂತ್ರಿಕ ನಡೆ ಕ್ಷೀಣಿಸುತ್ತಿದ್ದು, ವಿಶ್ವ ಭದ್ರತೆ ಬಗ್ಗೆ ಆತಂಕದ ವಾತಾವರಣ ಸೃಷ್ಟಿಯಾಗಿದೆ ಎಂದು ವಿಜ್ಞಾನಿಗಳು ಗುಂಪು ತಿಳಿಸಿದೆ.

ವಿಜ್ಞಾನ ಮತ್ತು ಭದ್ರತೆ ಮಂಡಳಿ ಡೂಮ್ಸ್‌ಡೇ ಕ್ಲಾಕ್‌ನ ಮುಳ್ಳನ್ನು ಮುಂದೆ-ಹಿಂದೆ ಚಲಿಸುವಂತೆ ಮಾಡುತ್ತಾರೆ. ಈ ಮಂಡಳಿಯಲ್ಲಿ ನೋಬೆಲ್‌ ಪುರಸ್ಕೃತ 15 ವಿಜ್ಞಾನಿಗಳು ಕ್ಲಾಕ್‌ನ ಭವಿಷ್ಯವನ್ನು ನಿರ್ಧರಿಸುತ್ತಾರೆ.

ಪ್ರಳಯದ ಮುಳ್ಳನ್ನು ಕಳೆದ ವರ್ಷ 30 ಸೆಕೆಂಡು ಮುಂದೂಡಲಾಗಿತ್ತು. 2016ರಲ್ಲಿ ಮಧ್ಯರಾತ್ರಿಗೆ 3 ನಿಮಿಷಕ್ಕೆ ನಿಂತಿತ್ತು.

ಏನಿದು ಡೂಮ್ಸ್‌ಡೇ ಕ್ಲಾಕ್‌?
1945ರಲ್ಲಿ ಶಿಕಾಗೊ ವಿಶ್ವವಿದ್ಯಾಲಯದ ವಿಜ್ಞಾನಿಗಳು 'ಬುಲೆಟಿನ್‌ ಆಫ್‌ ಅಟೊಮಿಕ್‌ ಸೈಂಟಿಸ್ಟ್‌' ಎಂಬ ಸೈನ್ಸ್‌ ಜರ್ನಲ್‌ಅನ್ನು ಹುಟ್ಟು ಹಾಕಿದರು. 2ನೇ ಪ್ರಪಂಚ ಯುದ್ಧದಲ್ಲಿ ಜಪಾನಿನ ಹಿರೋಶಿಮಾ ಮತ್ತು ನಾಗಾಸಾಕಿ ಮೇಲೆ ಅಮೆರಿಕ ಅಣುಬಾಂಬ್‌ ಪ್ರಯೋಗಿಸಿದ ಸಂದರ್ಭವದು. ಅಣು ಬಾಂಬ್‌ನಿಂದ ಸಂಭವಿಸುವ ಭೀಕರ ಅಪಾಯ ತಿಳಿಸುವುದು ಇವರ ಗುರಿಯಾಗಿತ್ತು. ನೋಬೆಲ್‌ ಪುರಸ್ಕೃತ 16 ವಿಜ್ಞಾನಿಗಳು ಸೈನ್ಸ್‌ ಜರ್ನಲ್‌ನ ಸದಸ್ಯರು. ಇವರೆಲ್ಲರೂ ಸೇರಿ 'ಜಗತ್ತು ಎಷ್ಟರ ಮಟ್ಟಿಗೆ ಅಪಾಯದ ಸ್ಥಿತಿಯಲ್ಲಿದೆ' ಎಂಬುದನ್ನು ಸಾಂಕೇತಿಕವಾಗಿ ತೋರಿಸಲು 1947ರಲ್ಲಿ ಡೂಮ್ಸ್‌ಡೇ ಕ್ಲಾಕ್‌ ಸೃಷ್ಟಿಸಿದರು.

ಆರಂಭದಲ್ಲಿ ಗಂಟೆಯ ಮುಳ್ಳು 12ನ್ನು ತೋರಿಸುತ್ತಿದ್ದು, ನಿಮಿಷದ ಮುಳ್ಳು ಮಧ್ಯರಾತ್ರಿಗೆ 7 ನಿಮಿಷ ಇದೆ ಎನ್ನುವುದನ್ನು ತೋರಿಸುತ್ತಿತ್ತು. ಆ ಬಳಿಕ ಅಪಾಯದ ಮಟ್ಟವನ್ನು ಗಮನಿಸಿ ವಿಜ್ಞಾನಿಗಳು ನಿಮಿಷದ ಮುಳ್ಳನ್ನು ಹಿಂದಕ್ಕೆ ಮತ್ತು ಮುಂದಕ್ಕೆ ಸರಿಸುತ್ತಿದ್ದಾರೆ. ಈ ಮುಳ್ಳು ಒಮ್ಮೆಯೂ 12ನ್ನು ಮುಟ್ಟಿಲ್ಲ. ಒಂದು ವೇಳೆ ನಿಮಿಷದ ಮುಳ್ಳು 12ರ ಮೇಲೆ ಬಂದರೆ ಜಗತ್ತಿನ ಸರ್ವ ನಾಶ ಎಂದೇ ಅರ್ಥ. ಆಯಾಯ ಪರಿಸ್ಥಿತಿಗೆ ತಕ್ಕಂತೆ ಗಡಿಯಾರದ ಮುಳ್ಳನ್ನು ಮುಂದಕ್ಕೆ ತಳ್ಳಬೇಕೇ ಅಥವಾ ಅದನ್ನು ಹಾಗೆಯೇ ಬಿಡಬೇಕೇ ಎಂಬ ನಿರ್ಧಾರವನ್ನು ಬುಲಿಟಿನ್‌ನ ವಿಜ್ಞಾನಿಗಳೇ ಕೈಗೊಳ್ಳುತ್ತಾರೆ.