ವೆಲ್ಲಿಂಗ್ಟನ್‌: ನ್ಯೂಜಿಲೆಂಡ್‌ನಲ್ಲಿ ಭಾನುವಾರ ಪ್ರಬಲ ಭೂಕಂಪ ಸಂಭವಿಸಿದ್ದು, ಭೂಕಂಪದ ತೀವ್ರತೆ 7.4 ದಾಖಲಾಗಿದೆ. ಸರಕಾರ ಸುನಾಮಿಯ ಎಚ್ಚರಿಕೆ ನೀಡಿದೆ.
ಕಡಲಿನಲ್ಲಿ ಐದರಿಂದ ಎಂಟು ಅಡಿ ಎತ್ತರದ ಹೆದ್ದೆರೆಗಳು ಎದ್ದಿವೆ. ಭಾನುವಾರ ಮಧ್ಯರಾತ್ರಿಯ ಹೊತ್ತಿಗೆ ಈ ಅಲೆಗಳು ಇನ್ನಷ್ಟು ತೀವ್ರವಾಗಿವೆ. ಜನ ಭಯಭೀತರಾಗಿ ಮನೆ ತೊರೆದು ಖಾಲಿ ಪ್ರದೇಶಗಳಲ್ಲಿ ಆಶ್ರಯ ಪಡೆಯುತ್ತಿದ್ದಾರೆ.
ದಕ್ಷಿಣ ಐಲ್ಯಾಂಡ್‌ನ ಕ್ರೈಸ್ತ್‌ಚರ್ಚ್‌ನ ಉತ್ತರ ಭಾಗದಲ್ಲಿ ಭೂಕಂಪದ ಕೇಂದ್ರಬಿಂದುವಿತ್ತು. ಅದರ ಪ್ರಮಾಣ 7.8 ಎಂದು ಅಂದಾಜು ಮಾಡಲಾಗಿದೆ. ಭೂಕಂಪ ಸಂಭವಿಸಿದ ತಕ್ಷಣ ಸರಕಾರ ಸುನಾಮಿಯ ಎಚ್ಚರಿಕೆ ನೀಡಿತು. ನಿರೀಕ್ಷಿಸಿದಂತೆ ಸಮುದ್ರದಲ್ಲಿ ಹೆದ್ದೆರೆಗಳು ಕಾಣಿಸಿಕೊಂಡಿದ್ದು ಜನ ಕಂಗಾಲಾಗಿದ್ದಾರೆ.
ನ್ಯೂಜಿಲೆಂಡ್‌ನಾದ್ಯಂತ ಭೂಕಂಪ ಭಾರಿ ಹಾನಿಯನ್ನೇ ಮಾಡಿದೆ ಎಂದು ವರದಿಯಾಗಿದೆ. ಪ್ರಾಥಮಿಕ ವರದಿಯ ಪ್ರಕಾರ ಒಬ್ಬ ವ್ಯಕ್ತಿ ಸತ್ತಿದ್ದಾನೆ. ಸಾವಿನ ಸಂಖ್ಯೆ ಹೆಚ್ಚುವ ಸಾಧ್ಯತೆಗಳು ದಟ್ಟವಾಗಿವೆ.
ದಕ್ಷಿಣ ಐಲ್ಯಾಂಡ್‌ನ ಕರಾವಳಿ ಪ್ರದೇಶ ಮತ್ತು ಉತ್ತರ ಐಲ್ಯಾಂಡ್‌ನ ಪೂರ್ವ ಕರಾವಳಿಯಲ್ಲಿ ಸುನಾಮಿ ಎಚ್ಚರಿಕೆ ನೀಡಿದ ತಕ್ಷಣ ಪೊಲೀಸರು ಮತ್ತು ರಕ್ಷಣಾ ಕಾರ್ಯಕರ್ತರು ಮನೆ ಮನೆಗಳಿಗೆ ತೆರಳಿ ಜನರನ್ನು ತೆರವುಗೊಳಿಸುವ ಮತ್ತು ಎಚ್ಚರಿಕೆ ನೀಡುವ ಕೆಲಸದಲ್ಲಿ ತೊಡಗಿದರು.
ಇದೊಂದು 'ವಿದ್ವಂಸಕ ಸುನಾಮಿ' ಎಂದು ಸರಕಾರವೇ ಎಚ್ಚರಿಕೆ ನೀಡಿದೆ. ಈಗ ಕಡಲಿನಲ್ಲಿ ಎದ್ದಿರುವ ಹೆದ್ದೆರೆಗಳು ಇನ್ನಷ್ಟು ಉಗ್ರ ರೂಪ ತಾಳಬಹುದು ಎಂದೂ ತಿಳಿಸಲಾಗಿದೆ. ದಕ್ಷಿಣ ಕರಾವಳಿ ಪ್ರದೇಶದ ಕೈಕೌರಾದಲ್ಲಿ ಸಾವು-ನೋವು ಸಂಭವಿಸಿರುವ ಬಗ್ಗೆ ವರದಿಯಾಗಿದೆಯಾದರೂ ಆ ಬಗ್ಗೆ ಸ್ಪಷ್ಟತೆ ಇಲ್ಲ ಎಂದು ನಾಗರಿಕ ರಕ್ಷಣಾ ಸಚಿವ ಗೆರಿ ಬ್ರೌನ್ಲಿ ತಿಳಿಸಿದ್ದಾರೆ.
ಸುನಾಮಿಯ ಮೊದಲ ಅನುಭವವಾಗಿದ್ದೇ ಸೋಮವಾರ ಬೆಳಗಿನ ಜಾವ ಕೈಕೌರಾದಲ್ಲಿ. ಅದಾದ ಬಳಿಕ ಅನೇಕ ಬಾರಿ ಲಘು ಭೂಕಂಪಗಳೂ ಸಂಭವಿಸಿದವು. ಸಾಧ್ಯವಾದಷ್ಟು ಬೇಗದ ಎತ್ತರದ ಪ್ರದೇಶಗಳಿಗೆ ತೆರಳುವಂತೆ ಜನರಿಗೆ ಸೂಚಿಸಲಾಯಿತು. ಕರಾವಳಿ ಪ್ರದೇಶದಲ್ಲಿ ನೂರಾರು ಮನೆಗಳು ಉರುಳಿ ಬಿದ್ದಿವೆ ಎಂದು ವರದಿಯಾಗಿದೆ.
'ಇದು ಅತ್ಯಂತ ವಿದ್ವಂಸಕ ಸುನಾಮಿ ಎಂಬುದು ನಮಗೆ ತಿಳಿದಿದೆ, ಆದರೆ ಗಾಬರಿಯಾಗದಿರಿ, ನಾವು ನಿಮ್ಮೊಂದಿಗಿದ್ದೇವೆ' ಎಂಬ ಸಂದೇಶವನ್ನು ನ್ಯೂಜಿಲೆಂಡ್‌ ಸರಕಾರದ ಅಧಿಕೃತ ವೆಬ್‌ಸೈಟ್‌ನ ಮೂಲಕ ರಾತ್ರಿ ಟ್ವೀಟ್‌ ಮಾಡಲಾಗಿದೆ.
ನ್ಯೂಜಿಲೆಂಡ್‌ನ ಅನೇಕ ನಗರಗಳಲ್ಲಿ ಬೀಡುಬಿಟ್ಟಿದ್ದ ವಿದೇಶಿಗರನ್ನು ತೆರವುಗೊಳಿಸುವ ಕೆಲಸವನ್ನೂ ತ್ವರಿತಗತಿಯಲ್ಲಿ ಮಾಡಲಾಗಿದೆ. ಪಾಕಿಸ್ತಾನ ಕ್ರಿಕೆಟ್‌ ಟೀಮ್‌ ನ್ಯೂಜಿಲೆಂಡ್‌ ಪ್ರವಾಸ ಕೈಗೊಂಡಿದ್ದು, ಭೂಕಂಪ ಸಂಭವಿಸಿದ 200 ಕಿ.ಮೀ. ದೂರದ ನೆಲ್ಸನ್‌ನಲ್ಲಿ ಬೀಡುಬಿಟ್ಟಿದೆ. ಅವರ ಸುರಕ್ಷತೆಗೆ ಹೆಚ್ಚಿನ ಗಮನ ಹರಿಸಲಾಗಿದೆ.
'ಟೀಮ್‌ನ ಅನೇಕ ಆಟಗಾರರು ಭಾರತ-ಇಂಗ್ಲಂಡ್‌ ಟೆಸ್ಟ್‌ ಪಂದ್ಯವನ್ನು ಟೀವಿಯಲ್ಲಿ ನೋಡುತ್ತಿದ್ದರು. ಕೆಲವರು ಪ್ರಾರ್ಥನೆಗೆ ತೆರಳಿದ್ದರು. ಆ ಸಂದರ್ಭದಲ್ಲೇ ಕಿಟಕಿಗಳು ಅಲುಗಾಡಿದ ಅನುಭವವಾಗಿದೆ. ಕಿಟಕಿ ಗಾಜುಗಳು ಪುಡಿಯಾದವು,'' ಎಂದು ಟೀಮ್‌ ಮ್ಯಾನೇಜರ್‌ ವಾಸಿಂ ಬರಿ ತಿಳಿಸಿದ್ದಾರೆ.