ಲಾಸ್‌ ಏಂಜಲೀಸ್‌: ಜಗತ್ತಿಗೆ ಫೇಸ್‌ ಬುಕ್‌ ಎಂಬ ಅಪರಿಮಿತ ಅವಕಾಶಗಳ ಸಾಮಾಜಿಕ ತಾಣವನ್ನು ಪರಿಚಯಿಸಿದ ಮಾರ್ಕ್‌ ಝುಕರ್‌ ಬರ್ಗ್‌ ಅವರ ಫೇಸ್‌ ಬುಕ್‌ ಒಂದನ್ನು ಹೊರತುಪಡಿಸಿ ಉಳಿದೆಲ್ಲ ತಾಣಗಳ ಅಕೌಂಟನ್ನು ಹ್ಯಾಕ್‌ ಮಾಡಲಾಗಿದೆ!
ಹೌದು, ಝುಕರ್‌ ಬರ್ಗ್‌ ಅವರ ಟ್ವಿಟರ್‌, ಪಿಂಟರೆಸ್ಟ್‌ ಸೇರಿದಂತೆ ಬಹುತೇಕ ಎಲ್ಲ ತಾಣಗಳ ಖಾತೆಗಳಿಗೆ ಕಳ್ಳಗನ್ನ ಕೊರೆದಿರುವ ಹ್ಯಾಕರ್‌ಗಳು ಅಲ್ಲೆಲ್ಲ ತಮ್ಮ ಯಶಸ್ಸಿನ ಸಂದೇಶಗಳನ್ನು ಬರೆದು ಸಂಭ್ರಮಿಸಿದ್ದಾರೆ.
ಅವರ್‌ ಮೈನ್‌ ಟೀಮ್‌ ಎಂಬ ಹ್ಯಾಕರ್‌ಗಳ ಗುಂಪು ಟ್ವಿಟರ್‌ ಮೂಲಕ ಝಕರ್‌ ಬರ್ಗ್‌ ಅವರ ತಾಣಗಳಿಗೆ ಲಗ್ಗೆ ಇಟ್ಟಿದೆ ಎನ್ನಲಾಗಿದ್ದು, ಈಗ ಗುಂಪಿನ ಟ್ವಿಟರ್‌ ಅಕೌಂಟನ್ನು ಅಮಾನತುಗೊಳಿಸಲಾಗಿದೆ.
ನಿಜಕ್ಕೂ ಈ ಹ್ಯಾಕಿಂಗ್‌ ಹೇಗೆ ಸಾಧ್ಯವಾಯಿತು ಎನ್ನುವುದು ಅಸ್ಪಷ್ಟವಾಗಿದೆ. ಕೆಲವು ವಾರಗಳ ಹಿಂದೆ ಲಿಂಕ್ಡ್‌ ಇನ್‌ ಪಾಸ್‌ವರ್ಡ್‌ನ್ನು ಬಳಸಿಕೊಂಡು ಹ್ಯಾಕ್‌ ಮಾಡಲು ಸಾಧ್ಯವಾಯಿತು ಎಂದು ಅವರ್‌ ಮೈನ್‌ ಟೀಮ್‌ ಹೇಳಿಕೊಂಡಿದೆ.
2012ರಲ್ಲಿ ಲಿಂಕ್ಡ್‌ ಇನ್‌ ತಾಣದ ಪಾಸ್‌ವರ್ಡ್‌ಗಳಿಗೆ ಕನ್ನ ಹಾಕಲಾಗಿತ್ತು. ಸುಮಾರು 100 ಮಿಲಿಯನ್‌ ಖಾತೆದಾರರ ಈಮೇಲ್‌ ಮತ್ತು ಪಾಸ್‌ ವರ್ಡ್‌ಗಳು ಅಂದು ಹೊರಬಿದ್ದಿದ್ದರಿಂದ ಕಂಪನಿ ಎಲ್ಲ ಖಾತೆಗಳನ್ನು ಅಸಿಂಧುಗೊಳಿಸಿತ್ತು. ಹೀಗೆ ಸೋರಿಕೆಯಾದ ಐಡಿ ಮತ್ತು ಪಾಸ್‌ ವರ್ಡ್‌ಗಳಲ್ಲಿ ಫೇಸ್‌ ಬುಕ್‌ ಸಿಇಒ ಅವರ ಲಿಂಕ್ಡ್‌ ಇನ್‌ ಅಕೌಂಟ್‌ ಕೂಡಾ ಇದ್ದಿರಬಹುದು ಎಂದು ಅಂದಾಜಿಸಲಾಗಿದೆ. ಝುಕರ್‌ಬರ್ಗ್‌ ಅವರು ಅದೇ ಪಾಸ್‌ ವರ್ಡನ್ನು ಇತರ ಅಕೌಂಟ್‌ಗಳಿಗೂ ಬಳಸುತ್ತಿದ್ದರು. ಹ್ಯಾಕಿಗರ ಪ್ರಕಾರ ಆ ಪಾಸ್‌ ವರ್ಡ್‌ 'ಡಾಡಾಡಾ' (ಘ್ಕಿdadada).
ಅವರ್‌ ಮೈನ್‌ ಟೀಮ್‌ ತಾನು ಇನ್‌ಸ್ಟಾಗ್ರಾಮ್‌ ಅಕೌಂಟನ್ನೂ ಭೇದಿಸಿರುವುದಾಗಿ ಹೇಳಿಕೊಂಡಿದೆಯಾದರೂ ಫೇಸ್‌ ಬುಕ್‌ ಇದನ್ನು ನಿರಾಕರಿಸಿದೆ. ಮತ್ತು ಹ್ಯಾಕ್‌ ಆದ ಎಲ್ಲ ಖಾತೆಗಳನ್ನು ಸುರಕ್ಷಿತವಾಗಿ ಮರುಸ್ಥಾಪಿಸಲಾಗಿದೆ ವಕ್ತಾರರು ಹೇಳಿದ್ದಾರೆ.
ಆರೋಪ ಕೇಳಿಬಂದಿತ್ತು:
ಫೇಸ್‌ ಬುಕ್‌ ತನ್ನ ಖಾತೆದಾರರ ಸಂಭಾಷಣೆಯನ್ನು ಅವರಿಗೆ ಗೊತ್ತಿಲ್ಲದಂತೆ ಗುಪ್ತವಾಗಿ ದಾಖಲಿಸಿಕೊಳ್ಳುತ್ತಿದೆ ಎಂಬ ಮಾತು ಇತ್ತೀಚೆಗೆ ಕೇಳಿಬಂದಿತ್ತು. ಆದರೆ, ಸಾಮಾಜಿಕ ತಾಣದ ದೈತ್ಯಶಕ್ತಿಯಾಗಿರುವ ಫೇಸ್‌ ಬುಕ್‌ ಇದನ್ನು ನಿರಾಕರಿಸಿತ್ತು.