ಫೇಸ್‌ಬುಕ್‌‌ಗೆ ಡಿಜಿಟಲ್‌ ಗ್ಯಾಂಗ್‌ಸ್ಟರ್‌ ಪಟ್ಟ!

ಲಂಡನ್‌: ಫೇಸ್‌ಬುಕ್‌ ಸಂಸ್ಥೆಯನ್ನು 'ಡಿಜಿಟಲ್‌ ಗ್ಯಾಂಗ್‌ಸ್ಟರ್‌' ಎಂದು ಜರಿದಿರುವ ಬ್ರಿಟನ್‌ ಸಂಸತ್ತು, ಅರಿವಿದ್ದೇ ಮಾಹಿತಿ ಗೌಪ್ಯತೆ ಮತ್ತು ಸ್ಪರ್ಧಾತ್ಮಕ ಕಾನೂನುಗಳನ್ನು ಸಾಮಾಜಿಕ ಜಾಲತಾಣ ದೈತ್ಯ ಸಂಸ್ಥೆ ಉಲ್ಲಂಘಿಸಿದೆ ಎಂದು ಆರೋಪಿಸಿದೆ.

ಫೇಸ್‌ಬುಕ್‌ಗೆ ಸಂಬಂಧಿಸಿದಂತೆ 18 ತಿಂಗಳ ತನಿಖೆ ನಡೆಸಿದ ಸಂಸದರ ಸಮಿತಿಯು ಸೋಮವಾರ ಬ್ರಿಟನ್‌ ಸಂಸತ್‌ಗೆ ತನ್ನ ವರದಿಯನ್ನು ಸಲ್ಲಿಸಿದೆ. 2017ರ ಬ್ರಿಟನ್‌ ಸಾರ್ವತ್ರಿಕ ಚುನಾವಣೆಯಲ್ಲಿ ಪ್ರಭಾವ ಬೀರುವ ರಷ್ಯಾ ಯತ್ನಗಳನ್ನು ತಡೆಯಲು ಫೇಸ್‌ಬುಕ್‌ ವಿಫಲವಾಯಿತು ಎಂದು ಇದೇ ವೇಳೆ ಆರೋಪಿಸಲಾಗಿದೆ. ''ನಮ್ಮ ಪ್ರಶ್ನೆಗಳಿಗೆ ಫೇಸ್‌ಬುಕ್‌ ಅಪೂರ್ಣ, ಪ್ರಾಮಾಣಿಕವಲ್ಲದ ಮತ್ತು ಕೆಲವೊಮ್ಮೆ ತಪ್ಪು ಉತ್ತರಗಳನ್ನು ನೀಡಿದೆ. ಸಮಿತಿ ಮುಂದೆ ಹಾಜರಾಗುವಂತೆ ಮೂರು ಬಾರಿ ನಾವು ಮಾಡಿದ ಮನವಿಯನ್ನು ಫೇಸ್‌ಬುಕ್‌ ಸಹ ಸಂಸ್ಥಾಪಕ ಮತ್ತು ಮುಖ್ಯಸ್ಥ ಮಾರ್ಕ್‌ ಜುಕರ್‌ಬರ್ಗ್‌ ನಿರಾಕರಿಸಿದರು. ಆನ್‌ಲೈನ್‌ ಜಗತ್ತಿನಲ್ಲಿ ಕಾನೂನು ಮೀರಿ ಡಿಜಿಟಲ್‌ ಗ್ಯಾಂಗ್‌ಸ್ಟರ್‌ ರೀತಿ ವರ್ತಿಸುವ ಫೇಸ್‌ಬುಕ್‌ ರೀತಿಯ ಸಂಸ್ಥೆಗಳಿಗೆ ಕಡಿವಾಣ ಹಾಕಬೇಕು,'' ಎಂದು ಸಂಸದೀಯ ಸಮಿತಿಯೊಂದರ ಅಧ್ಯಕ್ಷ ಡಾಮಿಯನ್‌ ಕಾಲಿನ್ಸ್‌ ಆಗ್ರಹಿಸಿದ್ದಾರೆ.

''2017ರ ಬ್ರಿಟನ್‌ ಸಾರ್ವತ್ರಿಕ ಚುನಾವಣೆ, 2016ರ ಬ್ರಿಟನ್‌ ಜನಮತ ಸಂಗ್ರಹ ಮತ್ತು 2014ರ ಸ್ಕಾಟಿಶ್‌ ಜನಮತ ಸಂಗ್ರಹದ ವೇಳೆ ವಿದೇಶಿ ಪ್ರಭಾವ ಕೆಲಸ ಮಾಡಿದೆಯೇ ಎಂಬುದರ ಬಗ್ಗೆ ಸತ್ಯ ಬಹಿರಂಗವಾಗಲು ಸರಕಾರ ಸ್ವತಂತ್ರ ತನಿಖೆ ನಡೆಸಬೇಕು,'' ಎಂದು ಕಾಲಿನ್ಸ್‌ ಒತ್ತಾಯಿಸಿದ್ದಾರೆ.