ನಾಯಿ ಎಂದು ಸಾಕಿದ್ದು ಕರಡಿಯಾಗಿ ಬದಲಾಯ್ತು

ಯುನ್ನಾನ್‌: ಸಾಕು ಪ್ರಾಣಿಗಳನ್ನು ಹೊಂದಿರುವುದು ನಿಜಕ್ಕೂ ಆಹ್ಲಾದಕರ, ಅದರಲ್ಲೂ ನಾಯಿಯೊಂದಿಗಿನ ಒಡನಾಟವಂತೂ ಮತ್ತಷ್ಟು ಅಪ್ಯಾಯಮಾನವಾಗಿರುತ್ತದೆ. ಆದರೆ ತಾವು ಸಾಕಿ ಬೆಳಸಿದ ನಾಯಿಮರಿ, ಬೆಳೆದ ಮೇಲೆ ನಾಯಿಯಾಗಿರದೇ ಕ್ರೂರ ಮೃಗವಾಗಿ ಬದಲಾದರೇ? ಅದು ಹೇಗೆ ಸಾಧ್ಯ ಎನ್ನುತ್ತೀರಾ? ಚೀನಾದಲ್ಲಿದು ಸಾಧ್ಯವಾಗಿದೆ.

ಹೌದು ಕಳೆದ ಎರಡು ವರ್ಷಗಳಿಂದ ತಾವು ಸಾಕುತ್ತಿರುವ ನಾಯಿ, ವಾಸ್ತವವಾಗಿ ನಾಯಿ ಅಲ್ಲ ಬದಲಾಗಿ ಏಷಿಯಾದ ಕಪ್ಪು ಕರಡಿ ಎಂದು ಗೊತ್ತಾಗುತ್ತಿದ್ದಂತೆ ಚೀನಾದ ಕುಟುಂಬವೊಂದು ಹೌಹಾರಿ ಹೋಗಿದೆ.

ಕಳೆದೆರಡು ವರ್ಷಗಳ ಹಿಂದೆ ಪುಟ್ಟ ಮರಿಯೊಂದನ್ನು ಮನೆಗೆ ತೆಗೆದುಕೊಂಡು ಬಂದಿದ್ದ ಸು ಯೆನ್ ಅದರ ಹಸಿವೆಯನ್ನು ನೋಡಿ ದಿಗ್ಭ್ರಮೆಗೊಂಡಿದ್ದ. ಆ ಹೆಣ್ಣು ಮರಿ ದಿನಕ್ಕೆ ಒಂದು ಫುಲ್ ಬಾಕ್ಸ್ ಹಣ್ಣು, 2 ಬಕೆಟ್ ನೂಡಲ್ಸ್‌ನ್ನು ಗಬಗಬನೆ ತಿನ್ನುತ್ತಿತ್ತು. ಆಗಲೇ ಅವರಿಗೆ ಅದು ನಾಯಿಯಲ್ಲ ಎನ್ನುವ ಸಂಶಯ ಬಂದಿತ್ತು ಆದರೆ ಉದ್ದ ಕೂದಲು ಹೊಂದಿರುವ ಟಿಬೆಟಿಯನ್ ಮಾಸ್ಟಿಫ್ ನಾಯಿ ಇರಬಹುದೆಂದು ಸುಮ್ಮನಾಗಿದ್ದಾರೆ. ಆದರೆ ನೋಡನೋಡುತ್ತಿದ್ದಂತೆ ಬೆಳೆಯುತ್ತಲೇ ಹೋದ ಪ್ರಾಣಿ 250 ಪೌಂಡ್‌ನಷ್ಟು ತೂಗ ಹತ್ತಿದೆ ಮತ್ತು 2 ಕಾಲಲ್ಲಿ ನಡೆಯಲು ಸಹ ಪ್ರಯತ್ನಿಸಿದೆ. ಸಾಕಲು ಪ್ರಾರಂಭಿಸಿದ ಎರಡು ವರ್ಷಗಳ ಬಳಿಕವಷ್ಟೇ ಅದು ಕರಡಿ ಎಂದವರಿಗೆ ಅರಿವಾಗಿದೆ.

ಮತ್ತಿಗ ಸು ಯುನ್ ಸಾಕಿದ್ದ ಕರಡಿ ಈಗ ಯುನ್ನಾನ್‌ನ ವನ್ಯಜೀವಿ ಸಂರಕ್ಷಣಾ ಕೇಂದ್ರದ ಆಶ್ರಯದಲ್ಲಿ ಬೆಳೆಯುತ್ತಿದೆ.

ಯುನ್ನಾನ್‌ನಲ್ಲಿ ನಾಯಿ ಎಂದುಕೊಂಡು ಕರಡಿಯನ್ನು ಸಾಕಿದ್ದ ಪ್ರಕರಣ ಇದೇ ಮೊದಲಲ್ಲ. ಈ ಹಿಂದೆ ಕೂಡ ವ್ಯಕ್ತಿಯೊಬ್ಬ ಬೀದಿ ನಾಯಿ ಎಂದುಕೊಂಡು ಕರಡಿಯನ್ನು ಸಾಕಿದ್ದ ಪ್ರಕರಣ ಬೆಳಕಿಗೆ ಬಂದಿತ್ತು.