30 ವರ್ಷ ಸರ್ವಾಧಿಕಾರ ನಡೆಸಿದ್ದ ಈಜಿಪ್ತ್‌ ಮಾಜಿ ಅಧ್ಯಕ್ಷ ಹೋಸ್ನಿ ಮುಬಾರಕ್‌ ನಿಧನ

ಕೈರೋ: ಮೂರು ದಶಕಗಳ ಕಾಲ ಈಜಿಪ್ತ್ ದೇಶವನ್ನಾಳಿದ ಸರ್ವಾಧಿಕಾರಿ ಹೋಸ್ನಿ ಮುಬಾರಕ್‌ (91) ಮಂಗಳವಾರ ನಿಧನರಾಗಿದ್ದಾರೆಂದು ಸರಕಾರಿ ಸ್ವಾಮ್ಯದ ಸುದ್ದಿವಾಹಿನಿ ವರದಿ ಮಾಡಿದೆ.

ಸಂಘರ್ಷ ಪೀಡಿತ ಮಧ್ಯಪ್ರಾಚ್ಯದಲ್ಲಿಸ್ಥಿರ ಆಡಳಿತ ನೀಡಿದ ನಾಯಕರಲ್ಲಿಮುಬಾರಕ್‌ ಒಬ್ಬರೆನಿಸಿದ್ದರು. ಇವರ ನಾಯಕತ್ವದ ವೇಳೆ ಈಜಿಪ್ತ್‌, ಅಮೆರಿಕ ಹಾಗೂ ಇಸ್ರೇಲ್‌ ಜತೆ ಉತ್ತಮ ಬಾಂಧವ್ಯ ಹೊಂದಿತ್ತು. ಆದರೆ 2011ರಲ್ಲಿಇವರ ದುರಾಡಳಿತದಿಂದ ಬೇಸತ್ತ ಜನತೆ ಪ್ರಜಾಪ್ರಭುತ್ವ ಸ್ಥಾಪನೆಯ ಭಾಗವಾಗಿ ಕೈರೋದಲ್ಲಿ ಬೀದಿಗಿಳಿದು 18 ದಿನಗಳ ಕಾಲ ಬೃಹತ್‌ ಹೋರಾಟ ನಡೆಸಿದ್ದರು. ಅವರ ಅರಮನೆಗೂ ಮುತ್ತಿಗೆ ಹಾಕಿದ್ದರು.

ಈ ಹೋರಾಟವನ್ನೇ 2011ರ ಅರಬ್ ಸ್ಪ್ರಿಂಗ್ ಕ್ರಾಂತಿ ಎಂದು ಕರೆಯಲಾಗಿದೆ. ಈ ವೇಳೆ ಅವರು ಮುಬಾರಕ್‌ ಅವರನ್ನು ಅಧ್ಯಕ್ಷ ಸ್ಥಾನದಿಂದ ಉಚ್ಛಾಟಿತಗೊಳಿಸಲಾಯಿತು. ಸುಮಾರು 30 ವರ್ಷಗಳ ಅವರ ಆಡಳಿತ 2011, ಫೆ. 11ರಂದು ಅಂತ್ಯಗೊಂಡಿತ್ತು. ಈ ಮೂಲಕ ಈಜಿಪ್ತ್‌ನಲ್ಲಿ ಸರ್ವಾಧಿಕಾರ ಕೊನೆಗೊಂಡು, ಪ್ರಜಾಪ್ರತ್ವ ನೆಲೆಯೂರಿತು.

ಇದಾದ ನಂತರ ಹತ್ಯೆ ಮತ್ತು ಭ್ರಷ್ಟಾಚಾರ ಪ್ರಕರಣದಲ್ಲಿ ಮುಬಾರಕ್‌ ಅವರು ಸೆರೆವಾಸ ಅನುಭವಿಸಿದರು. ಇವರನ್ನು 2013ರಲ್ಲಿಜೈಲಿನಿಂದ ಬಿಡುಗಡೆ ಮಾಡಲಾಗಿತ್ತು.