ಮಾಜಿ ಪತ್ರಕರ್ತೆ, ಸಂಸತ್‌ ಸಲಹೆಗಾರ್ತಿ ಹತ್ಯೆ

ಕಾಬೂಲ್‌ : ಅಫ್ಘಾನಿಸ್ತಾನದ ಜನಪ್ರಿಯ ಟಿವಿ ಪತ್ರಕರ್ತೆ ಮತ್ತು ಸಂಸತ್‌ ಸಲಹೆಗಾರ್ತಿ ಮೆನಾ ಮಂಗಲ್‌ ಅವರನ್ನು ದುಷ್ಕರ್ಮಿಗಳು ಗುಂಡಿಕ್ಕಿ ಹತ್ಯೆಗೈದಿದ್ದಾರೆ. ಪೂರ್ವ ಕಾಬೂಲ್‌ನಲ್ಲಿ ಈ ಘಟನೆ ಜರುಗಿದೆ ಎಂದು ಗೃಹ ಸಚಿವಾಲಯ ವಕ್ತಾರ ನಸ್ರತ್‌ ರಹೀಮಿ ಹೇಳಿದ್ದಾರೆ.

ಕಾಬೂಲ್‌ನಲ್ಲಿನ ಅನೇಕ ಬಹುಚರ್ಚಿತ ವಿಚಾರಗಳ ಬಗ್ಗೆ ಟಿವಿ ಕಾರ್ಯಕ್ರಮ ನಡೆಸಿ ಮೆನಾ ಜನಪ್ರಿಯರಾಗಿದ್ದರು. ಬಳಿಕ ಪತ್ರಕರ್ತೆ ವೃತ್ತಿ ತೊರೆದು, ಅಫ್ಘಾನಿಸ್ತಾನ ಸಂಸತ್ತಿಗೆ ಸಾಂಸ್ಕೃತಿಕ ಸಲಹೆಗಾರ್ತಿಯಾಗಿ ನೇಮಕಗೊಂಡಿದ್ದರು. ಇತ್ತೀಚೆಗೆ ಸಾಮಾಜಿಕ ಜಾಲತಾಣದಲ್ಲಿ ತಮ್ಮ ಜೀವಕ್ಕೆ ಅಪಾಯ ಇರುವ ಬಗ್ಗೆ ಮೆನಾ ಬರೆದುಕೊಂಡಿದ್ದರು.

ಮೆನಾ ಹತ್ಯೆ ಕುರಿತು ಪ್ರತಿಕ್ರಿಯಿಸಿರುವ ಮಹಿಳಾ ಹಕ್ಕುಗಳ ಹೋರಾಟಗಾರ್ತಿ ವಾಜ್ಮಾ ಪ್ರೋಘ್‌, '' ಒಂದು ವೇಳೆ ತಾಲಿಬಾನ್‌ ಜತೆಗೆ ಅಮೆರಿಕ ಸೇನಾಪಡೆಗಳ ಸಂಧಾನ ಯಶಸ್ವಿಯಾದಲ್ಲಿ ಅಫ್ಘಾನಿಸ್ತಾನದಲ್ಲಿ ಮಹಿಳೆಯರ ಹಕ್ಕುಗಳಿಗೆ ಕುತ್ತು ಬರಲಿದೆ. ಈಗಾಗಲೇ ವಿಶ್ವದಲ್ಲಿ ಪತ್ರಕರ್ತರಿಗೆ ಅತಿಹೆಚ್ಚು ಪ್ರಾಣಾಪಾಯ ಇರುವ ರಾಷ್ಟ್ರ ಎಂಬ ಕುಖ್ಯಾತಿ ಅಫ್ಘಾನಿಸ್ತಾನಕ್ಕಿದೆ''ಎಂದು ಆತಂಕ ವ್ಯಕ್ತಪಡಿಸಿದ್ದಾರೆ.