ಆ್ಯಪ್ನಗರ

ಮೆಕ್ಸಿಕೊದಲ್ಲಿ ಕಚ್ಚಾತೈಲ ಪೈಪ್‌ಲೈನ್‌ ಸ್ಫೋಟಗೊಂಡು 21 ಮಂದಿ ಬಲಿ

ಮೆಕ್ಸಿಕೊ ನಗರದಿಂದ ಉತ್ತರಕ್ಕೆ 105 ಕಿ.ಮೀ. ದೂರದ ಹಿಡಾಲ್ಗೊ ರಾಜ್ಯದ ತ್ರೆಲಾವೆಲ್ಪಾನ್‌ನಲ್ಲಿ ಶುಕ್ರವಾರ ಸಂಜೆ ಪೈಪ್‌ಲೈನ್‌ನಲ್ಲಿ ಸೋರಿಕೆ ಕಂಡುಬಂತು. ಸ್ಥಳೀಯರ ದೊಡ್ಡ ಗುಂಪು ಒಡೆದ ಪೈಪ್‌ಲೈನ್‌ನಿಂದ ಕ್ಯಾನ್‌ ಮತ್ತು ಬಕೆಟ್‌ಗಳಲ್ಲಿ ತೈಲವನ್ನು ತುಂಬಿಕೊಂಡು ಹೋಗುತ್ತಿದ್ದ ಸಮಯದಲ್ಲಿ ಸ್ಫೋಟ ಸಂಭವಿಸಿತು.

Vijaya Karnataka 20 Jan 2019, 5:00 am
ಮೆಕ್ಸಿಕೊ: ಕೇಂದ್ರ ಮೆಕ್ಸಿಕೊದಲ್ಲಿ ಅಕ್ರಮ ಕಚ್ಚಾತೈಲ ಪೈಪ್‌ಲೈನ್‌ ಸ್ಫೋಟಗೊಂಡು ಕನಿಷ್ಠ 21 ಮಂದಿ ಮೃತಪಟ್ಟಿದ್ದು, 71ಕ್ಕೂ ಹೆಚ್ಚು ಜನರು ಗಾಯಗೊಂಡಿದ್ದಾರೆ.
Vijaya Karnataka Web fuel pipeline blaze in mexico kills 21 injures dozens
ಮೆಕ್ಸಿಕೊದಲ್ಲಿ ಕಚ್ಚಾತೈಲ ಪೈಪ್‌ಲೈನ್‌ ಸ್ಫೋಟಗೊಂಡು 21 ಮಂದಿ ಬಲಿ


ಮೆಕ್ಸಿಕೊ ನಗರದಿಂದ ಉತ್ತರಕ್ಕೆ 105 ಕಿ.ಮೀ. ದೂರದ ಹಿಡಾಲ್ಗೊ ರಾಜ್ಯದ ತ್ರೆಲಾವೆಲ್ಪಾನ್‌ನಲ್ಲಿ ಶುಕ್ರವಾರ ಸಂಜೆ ಪೈಪ್‌ಲೈನ್‌ನಲ್ಲಿ ಸೋರಿಕೆ ಕಂಡುಬಂತು. ಸ್ಥಳೀಯರ ದೊಡ್ಡ ಗುಂಪು ಒಡೆದ ಪೈಪ್‌ಲೈನ್‌ನಿಂದ ಕ್ಯಾನ್‌ ಮತ್ತು ಬಕೆಟ್‌ಗಳಲ್ಲಿ ತೈಲವನ್ನು ತುಂಬಿಕೊಂಡು ಹೋಗುತ್ತಿದ್ದ ಸಮಯದಲ್ಲಿ ಸ್ಫೋಟ ಸಂಭವಿಸಿತು. ಇದರಿಂದ ಕತ್ತಲ ರಾತ್ರಿಯಲ್ಲಿ ದೊಡ್ಡ ಬೆಂಕಿ ಕಾಣಿಸಿಕೊಂಡಿತು. ಜನರು ಸಹಾಯಕ್ಕಾಗಿ ಅರಚುತ್ತಿದ್ದರು ಎಂದು ಪ್ರತ್ಯದರ್ಶಿ ತಿಳಿಸಿದ್ದಾರೆ.

ಈ ರೀತಿಯ ಕಚ್ಚಾತೈಲ ಕಳ್ಳತನದಿಂದ 2017ರಲ್ಲಿ ಮೆಕ್ಸಿಕೊಗೆ ಬರೋಬ್ಬರಿ ಮೂರು ಶತಕೋಟಿ ಡಾಲರ್‌ ನಷ್ಟ ಉಂಟಾಗಿದೆ. ಕಚ್ಚಾತೈಲ ಕಳ್ಳತನ ತಡೆಗಟ್ಟಲು ಸರಕಾರ ಕಠಿಣ ಕಾನೂನು ಕ್ರಮಗಳನ್ನು ಘೋಷಿಸಿರುವ ನಡುವೆಯೇ ಈ ಘಟನೆ ನಡೆದಿದೆ.

ಸ್ಫೋಟದಿಂದ ಗಾಯಗೊಂಡ ಸ್ಥಳೀಯರನ್ನು ಹತ್ತಿರದ ಆಸ್ಪತ್ರೆಗಳಿಗೆ ದಾಖಲಿಸಲಾಗಿದೆ. ಸ್ಥಳಕ್ಕೆ ಅಗ್ನಿಶಾಮಕ ದಳ ಧಾವಿಸಿದ್ದು, ಮಧ್ಯರಾತ್ರಿ ವೇಳೆಗೆ ಬೆಂಕಿಯನ್ನು ತಹಬದಿಗೆ ತರಲಾಗಿದೆ. ಘಟನಾ ಸ್ಥಳಕ್ಕೆ ಶನಿವಾರ ಬೆಳಗ್ಗೆ ಅಧ್ಯಕ್ಷ ಆಂಡ್ರೆಸ್‌ ಮ್ಯಾನುಯೆಲ್‌ ಲೋಪೆಜ್‌ ಒಬ್ರಡರ್‌ ಭೇಟಿ ನೀಡಿದ್ದು, ಪರಿಸ್ಥಿತಿ ಅವಲೋಕಿಸಿದ್ದಾರೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಮೆಕ್ಸಿಕೊದ ಅಕ್ರಮ ಪೈಪ್‌ಲೈನ್‌ಗಳಲ್ಲಿ ಈ ರೀತಿಯ ಸ್ಫೋಟ ಪ್ರಕರಣಗಳು ಪದೇ ಪದೆ ಜರುಗುತ್ತಿವೆ. ಕಾನೂನುಬಾಹಿರ ತೈಲ ಸಾಗಾಟದ ಹಿಂದೆ ದೊಡ್ಡ ಮಟ್ಟದ ಜಾಲ ಕೆಲಸ ಮಾಡುತ್ತಿದ್ದು, ಕೋಟ್ಯಾಂತರ ಡಾಲರ್‌ ವ್ಯವಹಾರದಲ್ಲಿ ಭ್ರಷ್ಟ ಅಧಿಕಾರಿಗಳು ಶಾಮೀಲಾಗಿದ್ದಾರೆ ಎಂದು ಆರೋಪಿಸಲಾಗಿದೆ.

ಮುಂದಿನ ಲೇಖನ

Vijay Karnataka News App: ನಿಮ್ಮ ಸುತ್ತಮುತ್ತಲು ನಡೆಯುವ ವಿದ್ಯಮಾನಗಳನ್ನುಹಂಚಿಕೊಳ್ಳಲು ಬಯಸುತ್ತೀರಾ? ಹಾಗಿದ್ದಲ್ಲಿ ವಿಜಯ ಕರ್ನಾಟಕ ಆ್ಯಪ್‌ಡೌನ್‌ಲೋಡ್‌ ಮಾಡಿಕೊಳ್ಳಿ ಹಾಗೂ ರಿಪೋರ್ಟ್‌ ಕಳಿಸಿ
ಲೇಟೆಸ್ಟ್‌ ನ್ಯೂಸ್‌ ಅಪ್‌ಡೇಟ್‌ಗಳನ್ನು ಪಡೆಯಿರಿ, Vijay Karnataka ಫೇಸ್‌ಬುಕ್‌ಪೇಜ್‌ ಲೈಕ್‌ ಮಾಡಿರಿ