ಗಡಿ ಗೋಡೆ ನಿರ್ಮಾಣಕ್ಕೆ ಟ್ರಂಪ್‌ ಪಟ್ಟು

ವಾಷಿಂಗ್ಟನ್‌: ಮೆಕ್ಸಿಕೊ ಗಡಿಯಲ್ಲಿ ಗೋಡೆ ನಿರ್ಮಾಣಕ್ಕೆ 5.7 ಶತಕೋಟಿ ಡಾಲರ್‌ ಅನುದಾನ ಬಿಡುಗಡೆಗೆ ವಿಚಾರವಾಗಿ ಅಧ್ಯಕ್ಷ ಡೊನಾಲ್ಡ್‌ ಟ್ರಂಪ್‌ ಮತ್ತು ಪ್ರತಿಪಕ್ಷ ಡೆಮಾಕ್ರಟಿಕ್‌ ಪಾರ್ಟಿಗಳು ತಮ್ಮ ನಿಲುವಿಗೆ ಅಂಟಿಕೊಂಡಿರುವುದರಿಂದ ಅಮೆರಿಕದಲ್ಲಿನ ಬಿಕ್ಕಟ್ಟು ಮುಂದುವರಿದಿದೆ.

ಗೋಡೆ ನಿರ್ಮಾಣ ಮತ್ತು ಸರಕಾರಿ ನೌಕರರ ವೇತನ ಅನುದಾನ ಬಿಡುಗಡೆ ಮಾಡಲು ವೆಚ್ಚ ವಿಧೇಯಕಕ್ಕೆ ಸಂಸತ್ತು ಅನುಮತಿ ನಿರಾಕರಿಸಿರುವುದರಿಂದ ಮೂರು ವಾರಗಳಿಂದ ಅಮೆರಿಕ ಸರಕಾರ ಸ್ಥಗಿತಗೊಂಡಿದೆ. ಈ ಕುರಿತು ಚರ್ಚಿಸಲು ಅಧ್ಯಕ್ಷ ಟ್ರಂಪ್‌ ಗುರುವಾರ ಪ್ರತಿಪಕ್ಷ ನಾಯಕರ ಸಭೆ ಕರೆದಿದ್ದರು. ಗಡಿ ಗೋಡೆ ನಿರ್ಮಾಣ ಅಗತ್ಯ ಎಂದು ಟ್ರಂಪ್‌ ಪ್ರತಿಪಾದಿಸಿದರೆ, ಅನಗತ್ಯ ಎಂದು ಡೆಮಾಕ್ರಟಿಕ್‌ ಪಕ್ಷದ ಸಂಸದರು ವಾದಿಸಿದರು. ಇದರಿಂದ ಸಿಟ್ಟಿಗೆದ್ದ ಟ್ರಂಪ್‌ ಸಭೆಯಿಂದ ಹೊರನಡೆದರು. ಹೀಗಾಗಿ 19 ದಿನಗಳ ಹಿಂದೆ ಉದ್ಭವಿಸಿದ್ದ ಬಿಕ್ಕಟ್ಟು ಸದ್ಯಕ್ಕೆ ಶಮನವಾಗುವ ಲಕ್ಷಣಗಳಿಲ್ಲ.

''ಟ್ರಂಪ್‌ ಕುಪಿತರಾಗಿ ಮೇಜನ್ನು ಕುಟ್ಟಿ ಸಭೆಯಿಂದ ಹೊರನಡೆದರು,'' ಎಂದು ಆರೋಪಿಸಿರುವ ಸಂಸತ್‌ನ ಕೆಳಮನೆ (ಕಾಂಗ್ರೆಸ್‌) ಸ್ಪೀಕರ್‌ ನ್ಯಾನ್ಸಿ ಪಿಲೊಸಿ ಮತ್ತು ಮೇಲ್ಮನೆ (ಸೆನೆಟ್‌)ಯಲ್ಲಿ ಅಲ್ಪಸಂಖ್ಯಾತ ನಾಯಕ ಚಕ್‌ ಸ್ಕುಮರ್‌, ಪ್ರತಿಪಕ್ಷಗಳು ಗಡಿ ಗೋಡೆ ನಿರ್ಮಾಣಕ್ಕೆ ವಿರೋಧ ವ್ಯಕ್ತಪಡಿಸಿದ್ದರಿಂದ ಟ್ರಂಪ್‌ ಸರಕಾರವನ್ನು ಮತ್ತೆ ಕ್ರಿಯಾಶೀಲಗೊಳಿಸುವ ಬೇಡಿಕೆಯನ್ನು ತಿರಸ್ಕರಿಸಿದರು ಎಂದು ತಿಳಿಸಿದ್ದಾರೆ.

ಅಕ್ರಮ ವಲಸೆ ತಡೆಗಟ್ಟುವಿಕೆ, ಮಾದಕ ದ್ರವ್ಯ ಮತ್ತು ಮಾನವ ಕಳ್ಳಸಾಗಣೆ ತಡೆಯುವ ಕಾರಣಕ್ಕಾಗಿ ಮೆಕ್ಸಿಕೊ-ಅಮೆರಿಕ ಗಡಿಯುದ್ದಕ್ಕೂ ಗೋಡೆ ನಿರ್ಮಾಣಕ್ಕೆ ಟ್ರಂಪ್‌ ಮುಂದಾಗಿದ್ದಾರೆ. ಕಳೆದ ಅಧ್ಯಕ್ಷೀಯ ಚುನಾವಣೆ ಸಂದರ್ಭದಲ್ಲಿ ಅವರು ನೀಡಿದ್ದ ಪ್ರಮುಖ ಭರವಸೆಗಳಲ್ಲಿ ಇದೂ ಒಂದು. ಆದರೆ, ''ಗಡಿಯಲ್ಲಿ ಗೋಡೆ ನಿರ್ಮಾಣ ವೆಚ್ಚದಾಯಕ ಮತ್ತು ಭದ್ರತೆ ದೃಷ್ಟಿಯಿಂದ ಇದು ಹೆಚ್ಚು ಪರಿಣಾಮಕಾರಿಯೂ ಅಲ್ಲ,'' ಎಂಬುದು ಡೆಮಾಕ್ರಟಿಕ್‌ ಪಕ್ಷ ದ ಅಭಿಪ್ರಾಯವಾಗಿದೆ.

ಡಿ.22ರಂದು ಸಂಸತ್‌ನಲ್ಲಿ ಸರಕಾರಿ ನೌಕರರಿಗೆ ವೇತನ ಹಂಚಿಕೆ ಮತ್ತು ಗೋಡೆ ನಿರ್ಮಾಣ ಅನುದಾನ ಬಿಡುಗಡೆಗಾಗಿ ಜಂಟಿಯಾಗಿ ವೆಚ್ಚ ವಿಧೇಯಕವನ್ನು ಟ್ರಂಪ್‌ ಮಂಡಿಸಿದ್ದರು. ಪ್ರತಿಪಕ್ಷದ ವಿರೋಧದಿಂದ ಇದಕ್ಕೆ ಅಂಗೀಕಾರ ಸಿಕ್ಕಿಲ್ಲ.

80,000 ಮಂದಿ ಅಮೆರಿಕದ ಸರಕಾರಿ ನೌಕರರಿಗೆ ವೇತನ ಬಿಡುಗಡೆ ಇನ್ನೂ ಮರೀಚಿಕೆಯಾಗಿದೆ.