ಈ ನರ್ಸ್ 100 ಕ್ಕೂ ಹೆಚ್ಚು ರೋಗಿಗಳನ್ನು ಸಾಯಿಸಿದ್ದು ಏಕೆ?

ಬರ್ಲಿನ್: ಜರ್ಮನ್‌ನ ನರ್ಸ್‌ ಒಬ್ಬ ಮಾರಕ ಔಷಧಗಳನ್ನು ನೀಡಿ ಅಥವಾ ನೀಡಬೇಕಾದ ಔಷಧಿಯನ್ನು ಸಮಯಕ್ಕೆ ಸರಿಯಾಗಿ ನೀಡದೇ 100ಕ್ಕೂ ಅಧಿಕ ರೋಗಿಗಳ ಸಾವಿಗೆ ಕಾರಣವಾಗಿರುವ ಘಟನೆ ಬಹಿರಂಗಗೊಂಡಿದೆ.

ಎರಡು ರೋಗಿಗಳ ಕೊಲೆ, ಕೊಲೆ ಯತ್ನ ಸೇರಿದಂತೆ ತೀವ್ರ ನಿಘಾ ಘಟಕದಲ್ಲಿದ್ದ ರೋಗಿಗಳಿಗೆ ದೈಹಿಕ ಹಿಂಸೆ ನೀಡಿದ್ದಕ್ಕೆ ನೀಲ್ಸ್ ಹೇಗೆಲ್ ಎಂಬ ನರ್ಸ್ ಜೀವಾವಧಿ ಶಿಕ್ಷೆ ಅನುಭವಿಸುತ್ತಿದ್ದಾನೆ. ಆದರೆ, ವಿಚಾರಣೆ ವೇಳೆ ರೋಗಿಗಳನ್ನು ಕೊಲ್ಲುವಂಥ ನಿರ್ಧಾರಕ್ಕೆ ಬಂದಿದ್ದೇಕೆ ಎಂಬುದನ್ನು ಬಾಯಿ ಬಿಟ್ಟಿದ್ದಾನೆ.

'ಹೃದ್ರೋಗಕ್ಕೆ ಸಂಬಂಧಿಸಿದ ಔಷಧಿಗಳ ಕೃತಕ ಕೊರತೆ ಸೃಷ್ಟಿಸಿ, ಡೆಲ್ಮಾನ್‌ಹಾರ್ಸ್ಟ್‌ನಲ್ಲಿ 90 ರೋಗಿಗಳ ಸಾವಿಗೆ ಕಾರಣವಾಗಿದ್ದೆ. ಅವರನ್ನು ಸಾಯೋ ಹಾಗೆ ಮಾಡಿ, ಪುನರ್ಜನ್ಮ ಪಡೆಯೋದನ್ನು ನೆನಪಿಸಿಕೊಂಡು, ನನಗೆ ಖುಷಿಯಾಗುತ್ತಿತ್ತು,' ಎಂದು ಹೇಗಲ್ ವಿಚಾರಣೆ ವೇಳೆ ಬಾಯಿ ಬಿಟ್ಟಿದ್ದಾನೆ. ಓಲ್ಡನ್‌ಬರ್ಗ್‌ನಲ್ಲಿಯೂ ರೋಗಿಗಳ ಸಾವಿಗೆ ಕಾರಣವಾಗಿರುವುದಾಗಿ ಈ ನರ್ಸ್ ಒಪ್ಪಿಕೊಂಡಿದ್ದಾಗಿಯೂ ತನಿಖಾಧಿಕಾರಿಗಳು ತಿಳಿಸಿದ್ದಾರೆ.

1999 ರಿಂದ 2005ರವರೆಗೂ ಎರಡು ಆಸ್ಪತ್ರೆಯಲ್ಲಿ ಕೆಲಸ ಮಾಡುತ್ತಿದ್ದ ಹೇಗಲ್, 16 ರೋಗಿಗಳ ಸಾವಿಗೆ ಕಾರಣವಾಗಿರುವುದು ತನಿಖೆಯಲ್ಲಿ ಸಾಬೀತಾಗಿದೆ. ಅಲ್ಲದೆ, 90ಕ್ಕೂ ಅಧಿಕ ರೋಗಿಗಳ ಜೀವಕ್ಕೆ ಕುತ್ತು ತಂದ ಆರೋಪವನ್ನು ಎದುರಿಸುತ್ತಿದ್ದಾನೆ.

ಚಿತ್ರ, ಸುದ್ದಿ: ಡೇಲಿ ಮೇಲ್