ಚಾಲಕನಿಲ್ಲದೇ 92 ಕಿ.ಮೀ ಕ್ರಮಿಸಿದ ಗೂಡ್ಸ್‌ ರೈಲು!

ಮೆಲ್ಬೋರ್ನ್‌: ಗಂಟೆಗೆ 100 ಕಿ.ಮೀ ವೇಗದಲ್ಲಿ 92 ಕಿಲೋಮೀಟರ್‌ ದೂರ ಕ್ರಮಿಸಿದ ರೈಲು ಹಳಿಯಿಂದ ಉರುಳಿದ ಘಟನೆ ಆಸ್ಪ್ರೇಲಿಯಾದ ಪಶ್ಚಿಮ ಭಾಗದಲ್ಲಿ ಸೋಮವಾರ ನಡೆದಿದೆ.

ಕಬ್ಬಿಣದ ಅದಿರು ಸಾಗಿಸುತ್ತಿದ್ದ ಗೂಡ್ಸ್‌ ರೈಲು ಚಾಲಕನಿಲ್ಲದೇ ಈ ರೀತಿ ಏಕಾಏಕಿ ಚಲಿಸಿ ದುರಂತಕ್ಕೀಡಾಗಿದ್ದು, ಘಟನೆ ಬೆನ್ನಲ್ಲೇ ಬಿಎಚ್‌ಪಿ ಬಿಲಿಟನ್‌ ಮೈನಿಂಗ್‌ ಕಂಪನಿಯು, ಖಾಸಗಿ ಮೌಂಟ್‌ ನ್ಯೂಮೆನ್‌ ರೈಲ್ವೆ ಮಾರ್ಗದಲ್ಲಿ ಅದಿರು ಸಾಗಣೆಗೆ ಬಳಸುತ್ತಿದ್ದ ಎಲ್ಲ ರೈಲುಗಳ ಸಂಚಾರವನ್ನು ಸ್ಥಗಿತಗೊಳಿಸಿದೆ.

ರೈಲು ಚಾಲಕ ಬೋಗಿಯೊಂದರ ತಪಾಸಣೆಗೆ ಎಂಜಿನ್‌ನಿಂದ ಕೆಳಗಿಳಿದಾಗ ಇದ್ದಕ್ಕಿದಂತೆ ರೈಲು ಗಂಟೆಗೆ ಸುಮಾರು 100 ಕಿ.ಮೀ ವೇಗದಲ್ಲಿ 92 ಕಿ.ಮೀ ದೂರ ಕ್ರಮಿಸಿ ಹಳಿಯಿಂದ ಉರುಳಿದೆ. ಆಸ್ಪ್ರೇಲಿಯಾದಲ್ಲಿ ಅದಿರು ಸಾಗಣೆಗೆ ಚಾಲಕ ರಹಿತ ರೈಲುಗಳನ್ನು ಪರಿಚಯಿಸುವ ಕಂಪನಿಯ ಯೋಜನೆಗೆ ಇದರಿಂದ ಹಿನ್ನಡೆಯಾಗಿದೆ.