ಟ್ರಂಪ್‌ ಅಮೆರಿಕದಲ್ಲಿ ಗ್ರೀನ್‌ ಕಾರ್ಡ್‌ ವಲಸಿಗರಿಗೆ ರಿಲೀಫ್‌

ವಾಷಿಂಗ್ಟನ್: ಏಳು ಮುಸ್ಲಿಂ ರಾಷ್ಟ್ರಗಳಿಗೆ ನಿಷೇಧ ಹೇರಿದ ಬಳಿಕ ತೇಪೆ ಹಾಕಲು ಯತ್ನಿಸಿರುವ ಟ್ರಂಪ್‌ ಆಡಳಿತ, ಅಮೆರಿಕದ ಕಾಯಂ ನಿವಾಸಗಳಿಗೆ (ಗ್ರೀನ್‌ ಕಾರ್ಡ್‌ ಉಳ್ಳವರಿಗೆ) ಮರಳಿ ಅಮೆರಿಕಕ್ಕೆ ಆಗಮಿಸಲು ಅಥವಾ ತೆರಳಲು ವಿಶೇಷ ಅನುಮತಿಯ ಅಗತ್ಯವಿಲ್ಲ ಎಂದು ಆದೇಶ ಹೊರಡಿಸಿದೆ.

ಈ ಕುರಿತು ಮಾತನಾಡಿರುವ ಶ್ವೇತಭವನದ ವಕ್ತಾರ ಸೀನ್‌ ಸ್ಪೈಸರ್‌, ''ಗ್ರೀನ್‌ ಕಾರ್ಡ್‌ ಹೊಂದಿರುವ ನಿಷೇಧಿತ ರಾಷ್ಟ್ರಗಳ ಮೂಲ ನಿವಾಸಿಗಳ ಮೇಲೆ ಯಾವದೇ ನಿಷೇಧ ಹೇರದಂತೆ ಮನವಿ ಮಾಡಿದ್ದರು. ಹೀಗಾಗಿ ಗ್ರೀನ್‌ ಕಾರ್ಡ್‌ ಹೊಂದಿರುವ ಈ ರಾಷ್ಟ್ರಗಳ ನಿವಾಸಿಗಳಿಗೆ ಯಾವುದೇ ನಿರ್ಬಂಧನೆಗಳಿಲ್ಲ'' ಎಂದು ಹೇಳಿದ್ದಾರೆ.

ಕಳೆದ ಶುಕ್ರವಾರ ಟ್ರಂಪ್‌ ಸರಕಾರ ಏಳು ರಾಷ್ಟ್ರಗಳಿಂದ ಅಮೆರಿಕಕ್ಕೆ ಆಗಮಿಸುವ ವಲಸೆಗಾರರ ಮೇಲೆ ಮೂರು ತಿಂಗಳ ಕಾಲ ನಿಷೇಧ ಹೇರಿ ಆಜ್ಞೆ ಹೊರಡಿಸಿದ್ದರು. ಈ ಆದೇಶದ ಬಳಿಕ ಹಲವಾರು ರಾಷ್ಟ್ರಗಳು ಟ್ರಂಪ್‌ ಕ್ರಮದ ವಿರುದ್ಧ ವಿರೋಧ ವ್ಯಕ್ತಪಡಿಸಿದ್ದವು. ಇಷ್ಟೆಲ್ಲಾ ಬೆಳವಣಿಗೆ ಬಳಿಕ ಬುಧವಾರ ಸರಕಾರ, ಗ್ರೀನ್‌ ಕಾರ್ಡ್‌ ಇರುವ ವಲಸಿಗರ ಮೇಲೆ ನಿರ್ಬಂಧನೆಯನ್ನು ಸಡಿಲಗೊಳಿಸಿದೆ.