ಅಮೆರಿಕದ ಆಶ್ರಯಕ್ಕೆ ಮನವಿ

ನ್ಯೂಯಾರ್ಕ್: ತಮ್ಮ ವಿರುದ್ಧ ಇಮ್ರಾನ್‌ ಖಾನ್‌ ಸರಕಾರ ದೇಶ ವಿರೋಧಿ ಚಟುವಟಿಕೆಗಳ ಆರೋಪ ಹೊರಿಸಿ ಜೈಲಿಗೆ ಕಳುಹಿಸಬಹುದು ಎಂಬ ಭೀತಿ ಎದುರಿಸುತ್ತಿದ್ದ ಪಾಕಿಸ್ತಾನದ ಮಹಿಳಾ ಹಕ್ಕುಗಳ ಹೋರಾಟಗಾರ್ತಿ ಗುಲಾಲಾಯಿ ಇಸ್ಮಾಯಿಲ್‌ ಅಮೆರಿಕಕ್ಕೆ ಪರಾರಿಯಾಗಿದ್ದಾರೆ. ರಾಜಕೀಯ ಆಶ್ರಯ ನೀಡುವಂತೆ ಅಮೆರಿಕ ಸರಕಾರಕ್ಕೆ ಅವರು ಮನವಿ ಮಾಡಿದ್ದಾರೆ. ದೇಶವಿರೋಧಿ ಚಟುವಟಿಕೆಗಳಲ್ಲಿಭಾಗಿಯಾಗಿದ್ದಾರೆ, ಹಾಗಾಗಿ ಈಕೆಯನ್ನು ನಿರ್ಬಂಧಿತರ ಪಟ್ಟಿಗೆ ಸೇರಿಸಿ ಎಂದು ಇಮ್ರಾನ್‌ ಖಾನ್‌ ಸರಕಾರಕ್ಕೆ ಪಾಕ್‌ನ ಗುಪ್ತಚರ ಸಂಸ್ಥೆ ಐಎಸ್‌ಐ ನಿರ್ದೇಶಿಸಿತ್ತು. ಸ್ಪಷ್ಟನೆಗೆ ಅವಕಾಶ ಕೂಡ ನೀಡದೆ ಪಾಕ್‌ ಪೊಲೀಸರು ಬಂಧಿಸಲಿದ್ದಾರೆ ಎಂಬ ಸುಳಿವು ಪಡೆದ ಗುಲಾಲಾಯಿ ಕಳೆದ ತಿಂಗಳು ನ್ಯೂಯಾರ್ಕ್ಗೆ ಪ್ರಯಾಣ ಬೆಳೆಸಿ ತಮ್ಮ ಸಹೋದರಿಯೊಂದಿಗೆ ನೆಲೆಸಿದ್ದಾರೆ ಎಂದು ನ್ಯೂಯಾರ್ಕ್ ಟೈಮ್ಸ್‌ ಪತ್ರಿಕೆ ವರದಿ ಮಾಡಿದೆ.

ಇತ್ತೀಚೆಗೆ ಗುಲಾಲಾಯಿ ನೀಡಿರುವ ಸಂದರ್ಶನವೊಂದರಲ್ಲಿತಾವು ಪಾಕ್‌ ತೊರೆದ ಬಗ್ಗೆ ವಿವರಿಸಿರುವ ಅವರು, ''ನಾನು ವಿಮಾನನಿಲ್ದಾಣದಿಂದ ಅಮೆರಿಕಕ್ಕೆ ಬರಲಿಲ್ಲ. ನಾನು ಹೇಗೆ ಪಾಕ್‌ನಿಂದ ಪರಾರಿಯಾದೆ ಎಂದು ಬಹಿರಂಗಪಡಿಸಿದರೆ ನನಗೆ ಸಹಾಯ ಮಾಡಿದ ಹಲವರು ಪ್ರಾಣ ತೆರಬೇಕಾಗುತ್ತದೆ. ಹಾಗಾಗಿ ಈ ವಿಚಾರ ಗೌಪ್ಯವಾಗಿಯೇ ಇರಲಿ,'' ಎಂದು ಇಮ್ರಾನ್‌ ಖಾನ್‌ ಆಡಳಿತದ ಕರಾಳ ಮುಖವನ್ನು ಬಿಚ್ಚಿಟ್ಟಿದ್ದಾರೆ.