ಅಫ್ಘಾನ್ ಟಿವಿ ಕಟ್ಟಡದ ಮೇಲೆ ಉಗ್ರರ ದಾಳಿ

ಜಲಾಲಾಬಾದ್: ಅಫ್ಘಾನಿಸ್ತಾನದ ಪೂರ್ವ ವಲಯದಲ್ಲಿರುವ ಸರಕಾರಿ ಟಿವಿ ಕಟ್ಟಡದ ಮೇಲೆ ಅತ್ಮಾಹತ್ಯಾ ಬಾಂಬರ್‌ಗಳು ದಾಳಿ ನಡೆಸಿದ್ದು, ಕಟ್ಟಡದಲ್ಲಿ ಹಲವಾರು ಪತ್ರಕರ್ತರು ಸಿಕ್ಕಿಹಾಕಿಕೊಂಡಿದ್ದಾರೆ ಎಂದು ಪ್ರಾಂತೀಯ ಗವರ್ನರ್ ವಕ್ತಾರ ತಿಳಿಸಿದ್ದಾರೆ.

ಈ ದಾಳಿಯಲ್ಲಿ ಇಬ್ಬರು ನಾಗರಿಕರು ಸೇರಿದಂತೆ ನಾಲ್ವರು ಬಲಿಯಾಗಿದ್ದಾರೆ ಎಂದು ವರದಿಯಾಗಿದೆ.

ಕನಿಷ್ಠ ನಾಲ್ವರು ಉಗ್ರರು ಆಕ್ರಮಣ ಮಾಡಿದ್ದಾರೆ. ಇವರಲ್ಲಿ ಇಬ್ಬರು ತಮ್ಮನ್ನು ತಾವು ಸ್ಫೋಟಿಸಿಕೊಂಡಿದ್ದು, ಇನ್ನಿಬ್ಬರು ಮಾತ್ರ ಇನ್ನೂ ದಾಳಿ ಮುಂದುವರೆಸಿದ್ದಾರೆ ಎಂದು ​ ಅತ್ತಾವುಲ್ಲಾ ಖುಗ್ಯಾನಿ ಹೇಳಿದರು.

ಅಫ್ಘಾನಿಸ್ತಾನದ ಸರಕಾರಿ ಪ್ರಸಾರ ಸಂಸ್ಥೆ ರೇಡಿಯೋ ಟೆಲಿವಿಶನ್‌ ಅಫ್ಘಾನಿಸ್ತಾನ್ (ಆರ್‌ಟಿಎ) ಕಟ್ಟಡದ ಸುತ್ತಲೂ ಭಾರೀ ಗುಂಡಿನ ದಾಳಿ ನಡೆದಿದೆ.

ಜಲಾಲಾಬಾದ್ ನಂಗರ್‌ಹಾರ್ ಪ್ರಾಂತ್ಯದ ರಾಜಧಾನಿಯಾಗಿದ್ದು, ಈ ಪ್ರದೇಶ ಐಎಸ್ಐಎಸ್ಐ ಉಗ್ರರ ಭದ್ರ ನೆಲೆಯಾಗಿದೆ. ಕಳೆದ ತಿಂಗಳಷ್ಟೇ ಈ ಪ್ರದೇಶದಲ್ಲಿ ಅಮೆರಿಕ ಸೇನೆಯು ಇತಿಹಾಸದಲ್ಲಿಯೇ ಅತ್ಯಂತ ಬೃಹತ್ ಗಾತ್ರದ ಬಾಂಬ್‌‌ ಬಳಸಿ ದಾಳಿ ನಡೆಸಿತ್ತು.