H-1B ವೀಸಾ ನೀತಿ: ಭಾರತ ಐಟಿ ಕಂಪನಿಗಳಿಗೆ ಹೊಡೆತ

ವಾಷಿಂಗ್ಟನ್‌: ಹೆಚ್‌-1 ಬಿ ವೀಸಾದಾರರ ಕನಿಷ್ಠ ವೇತನವನ್ನು ದುಪ್ಪಟ್ಟುಗೊಳಿಸುವ ವಿಧೇಯಕವನ್ನು ಅಮೆರಿಕ ಸಂಸತ್ತು ಮಂಗಳವಾರ ಮಂಡಿಸಿದ್ದು, ಭಾರತೀಯ ಐಟಿ ಉದ್ಯಮಕ್ಕಿದು ಭಾರಿ ಆಘಾತ ನೀಡಿದೆ.

ವೀಸಾ ಸುಧಾರಣಾ ವಿಧೇಯಕದಡಿ, ಕನಿಷ್ಠ ವೇತನವನ್ನು130,00 ಡಾಲರ್‌ಗೆ ಏರಿಸಲಾಗಿದೆ. ಇದರಿಂದ ಹೆಚ್‌-1ಬಿ ವೀಸಾ ಯೋಜನೆಯಡಿ ಭಾರತದ ಐಟಿ ನೌಕರರು ಸೇರಿದಂತೆ ವಿದೇಶಿ ನೌಕರರನ್ನು ಕೆಲಸಕ್ಕೆ ನೇಮಿಸಿಕೊಳ್ಳುವ ಅಮೆರಿಕದ ಕಂಪನಿಗಳು ಸಂಕಷ್ಟ ಎದುರಿಸಲಿವೆ.

ಈ ಮಧ್ಯೆ , ಹೆಚ್‌-1ಬಿ ವೀಸಾ ನೀತಿ ಸುಧಾರಣೆ ವಿಧೇಯಕ ಮಂಡನೆ ಸುದ್ದಿ ಹೊರಬೀಳುತ್ತಿದ್ದಂತೆ ಬಿಎಸ್‌ಇ ಐಟಿ ಸೂಚ್ಯಂಕ ಶೇ.4ರಷ್ಟುಏರಿಕೆ ಕಂಡಿದೆ.

ಅಮೆರಿಕದ ಇನ್ಫೋಸಿಸ್‌ ಉದ್ಯೋಗಿಗಳ ಪೈಕಿ ಶೇ.60ಕ್ಕಿಂತ ಹೆಚ್ಚಿನವರು ಹೆಚ್‌-1ಬಿ ವೀಸಾದಾರರು. ಹೊಸ ನಿಯಮದ ಪ್ರಕಾರ ಹೆಚ್‌-1ಬಿ ವೀಸಾದಾರರ ಸಂಗಾತಿ ಅಮೆರಿಕದಲ್ಲಿ ಉದ್ಯೋಗ ಮಾಡುವಂತಿಲ್ಲ.

ಅಮೆರಿಕ ನಾಗರಿಕರಿಗೆ ಉದ್ಯೋಗದಲ್ಲಿ ಹೆಚ್ಚಿನ ಅವಕಾಶ ಕಲ್ಪಿಸುವ ಯತ್ನ ನಡೆಸಿರುವ ಅಂಶವನ್ನು ಟೆಕ್‌ ಕಂಪನಿಗಳು ಸಾಬೀತು ಪಡಿಸಬೇಕು. ಸೂಕ್ತ ಅಭ್ಯರ್ಥಿಗಳು ದೊರೆಯದ ಸಂದರ್ಭದಲ್ಲಿ ವಿದೇಶಿ ನೌಕರರಿಗೆ ಅವಕಾಶ ನೀಡಬೇಕು. ವಿದೇಶಿ ನೌಕರರನ್ನು ನೇಮಿಸಿಕೊಳ್ಳುವುದಾದರೆ, ಹೆಚ್ಚು ಅನುಭವ ಇರುವ ನುರಿತ ಕೆಲಸಗಾರರನ್ನು ಉನ್ನತ ಹುದ್ದೆಗಳಿಗೆ ಅಗತ್ಯಾನುಸಾರ ನೇಮಿಸಿಕೊಳ್ಳಬಹುದು ಎಂದು ಹೇಳಲಾಗಿದೆ.

'ಹೆಚ್ಚು ವೇತನ ನೀಡಲು ಸಿದ್ಧವಿರುವ ಕಂಪನಿಗಳಿಗೆ ಮಾರುಕಟ್ಟೆ ಆಧಾರಿತ ಪರಿಹಾರ ದೊರಕಿಸಿಕೊಡುವ ಉದ್ದೇಶದಿಂದ ಈ ವಿಧೇಯಕ ಮಂಡಿಸಲಾಗಿದೆ,'ಎಂದು ಈ ವಿಧೇಯಕ ಮಂಡಿಸಿದ ಸಂಸದ ಜೊಯಿ ಲೊಫ್‌ಗ್ರೆನ್‌ ಹೇಳಿದ್ದಾರೆ.

ಏನಿದು ಹೆಚ್‌-1ಬಿ ವೀಸಾ ?

ಸ್ಥಳೀಯವಾಗಿ ನುರಿತ ಕೆಲಸಗಾರರು ದೊರೆಯದ ಪಕ್ಷದಲ್ಲಿ ವಿದೇಶಿ ನೌಕರರನ್ನು ನೇಮಿಸಿಕೊಳ್ಳಲು ಅನುಕೂಲವಾಗುವಂತೆ ಹೆಚ್‌-1ಬಿ ವೀಸಾ ನೀಡಲಾಗುತ್ತದೆ. ಆದರೆ, ಈ ವೀಸಾ ಯೋಜನೆಯ ದುರ್ಬಳಕೆ ಆಗಿದ್ದು, ಅಮೆರಿಕನ್ನರಿಗೆ ಉದ್ಯೋಗ ನಿರಾಕರಿಸಿ ಕಡಿಮೆ ವೇತನಕ್ಕೆ ದುಡಿಯುವ ವಿದೇಶಿ ನೌಕರರನ್ನು ನೇಮಿಸಿಕೊಳ್ಳಲಾಗುತ್ತದೆ ಎಂಬ ಆರೋಪ ಕೇಳಿಬಂದಿತ್ತು.